Ram Leh Hnam Kohna
Mi pangngai, fuke kima piang chin chuan vawi khat pian manah mahni ram leh hnam kohna chhân hi kan bat ṭheuh a ni. Chu kohna chhan dan ṭha ber chu eng nge ni ta ang le?
Ram leh hnam kohna chhang tura political party-a inhnim phûm khera chet lak duhna hi chu a rûk taka mahni hmasial duh vang leh party politics tui nûa in-baptist-na mai a ni châwk.
Rinawm leh taima taka mahni eizawnna thawh mai leh roreltute thu zawm te, mahni chhungkua ṭheuh Pathian rinna kawng dika kaihhruai hi ram neitu Pathianin ram leh hnam din chhuah nana mal a sâwm ṭhin chu a ni.
Mahni eizawnna rinawm taka thawk ṭhinte’n ramah rorêlna fel a awm theih nan ram hruaitûte kut an tichak ṭhin. Mahni leh party hmakhûa chauh ngaihtuah party worker ten rorêlna fel kawng chu an dâl tlat thung si ṭhin.
Tunlaia kan rama party worker tam berte sawrkar kalpui tum dan hi chu ram neitu Pathian leh a duh zâwng rorêlna fel kawng dâlna mai leh ram hmasawnna hmelma mai niin a lang. I ngaihtuah chiang teh ang u khai.
A chunga sawi khi party worker ṭhate sawiselna a ni lo. Party worker pamham tak tak karah ram hmangaihtu tak tak awm chhunte erawh a leh hniha chawimawi tlak an ni ang a, i chawimawi zel bawk ang u.
Hetih lai hian, party worker tih tling chin ngatte hi chu sawrkar thau sawh tuma ṭhahnemngai zualte hi an ni ber a, sawh pawh an sâwk nge nge. An sim thei tawh lo va, an party dinchantirna tur kawngah chuan mahni hrehawm pawisa lova thih ngam lu púa ṭang ṭhinte an ni. Hetiang party worker-te hi chuan sakhaw zirtirna aiin an party thuchhuak an dah pawimawh zawk daih a, an party kalphung ṭha lo lai khawih deuh kohhran thuchhuak chu an party beihnaah an ngai thuai ṭhin. Kohhran duh dan chu party dangin zâwm se la, chumi azarah an party chu dîp buai lohvin awm se an duh ber a. Chuvangin, Bible thu zawm chu, "A hnuhnung hnung phungin seh," tih tluk chauhah an dah tawh ṭhin.
In veng/khuaah khan party worker, eizawnna kawng dang leh sum hnâr dang nei hauh si lo, sawrkar zar zova khawsa thei tak, kohhran leh khawtlanga inhmang phian si in ngah em? Khangho kha ram hmasawnna aia mahni sahmîm tihpuar kawnga mi vervêk, ram hmasawnna hmelma mai an nih kha. Anmahni chu ram hmangaihtu dik takah an inchhâl ang a, mahse, dik lo taka mipui chanvo tur kuai pênga intinuamsa mai an ni tih i lo hre dawn nia.
I ram tan rinawm la, taima leh dik takin i hna thawk rawh. Chu chu ram leh hnam din chhuah nan leh van thlenga chhawm tura Pathian malsawm ṭhin kawng chu a ni. Heng bak nihlawhna dangte hi erawh van lam chhuak ni lo, lei lam chhuak, ram tichhetu, boral tur mai an ni thung.
- PC Hmangaihzauva