Khawchhak lungpui a ni em?

Mizoram hi zawlnei ngah ram kan ni mai awm mang e. Inthlan dawnah phei chuan an rawn inlâr sup sup ṭhin a nih kha. Bible ringtute kan ni a, Thuthlung Hlui hunah zawlnei tam tak an awm a, Thuthlung Thar hun ṭan tirh lam thlengin zawlnei thupuan lâwk nei an awm tih kan hre ṭheuh awm e.

Tuna kan sawi tum chu kan Mizoram zawlneite zinga tu ber nge tih ka hre chiah lo, khawchhak lungpui lo lum tur lo sawitu hi. Kan hlau hlawm viau mai a, tun hma deuhva Champhai chhak lawka pêm khawmte pawh khi khawchhak lungpui hlau ni âwm takin an sawi. Khawchhak lungpui lo lum tur hlau ta chêng a, khawchhak lama pêm leh si chu a mak viau mai.

Hun eng emaw lai tawh aṭang khan heti zawng hian rilruah a lo awm a. Khawchhak lungpui lo lum tura kan zawlnei tu tute’n emaw an lo sawi ṭhin hi thil dang ni lovin, 'Ruihhlo' hi a ni mai âwm mang e, ka ti ta a ni. Lo ngaihtuah ve teh, a ni thei mai lo'ng maw? Ṭhenkhat rilruah chuan lungpui dang ni lovin China sawrkar khi a ni ang a, indona a lo awm hunah China a rawn lian ang a, kan ngam lo hle dawn a ni ang, tih lamte pawh a ni âwm e.

Tunlai khawvel boruak thlirin China sawrkar pawh chu lo ni dawn ta the reng se la, an hlauhawm hranin ka ring lo. China sawrkar hi ropuiin chak hle mah se, India hian kan hlau hran lo ve. Russia sawrkar ropui lutuk pawhin rei tawk a bei chung pawhin sawrkar tereuhtê Ukraine pawh a la hneh hlei thei lo a nia. Hmânah lo tlâwm deuh hlek tawh mah ila, tunlai India sawrkar chak leh ropui tak tan hian China hi a huphurhawm lo ve. Kan hlau hran lo.

Aw le, kan thupui zawk lam lo hawi ila. Kan zawlnei tu tute emawin an lo sawi, khawchhak lungpui 'ruihhlo' chu a lo lum daih tawh a, min delh mek chu a nih ber hi. Mahse, kan indelh behtir reng tur a ni lo. Kristian Vanram Kawngzawh bua Zahna-kâwna Kristiana'n, "Ka hmelma pa, ka chungah lawm suh, tlu mah ila, ka tho leh ang," a ti ang khan, Lalpa chakna rin chhanin, sawrkar, kohhran, NGO leh chhung tinte’n kan bei ang a, kan la hneh ngei dawn tih ring ang.

Tunah hian kan ramah ruihhlo ti lo, Pathian ringtu 'chhuan thar' an lo chhuak ṭan mek tih hria ila. Kan hma lam hi thim hlir chu a ni lo tih hria ang aw. Mizo Kristiante'n Lalpa chakna hmachhuanin kan bei ang a, kan la hneh ang. Heng ruihhlo chi tin hmanga sum zawngtute pawh hi an inlamlêt ṭan mek a, eizawnna dang ṭha leh zahawm zawk an zawng ṭan mek niin a lang.

- Rev. Lalbiaksanga Chinzah