Aizawla taxi stand enfiah a hun

Aizawl khawpuiah four wheeler taxi eng emaw zat a awm a, taxi a awm tirhin veng tin kawng lûn lai leh mual ṭha lai lai stand atan pek a ni. Hun a lo kal zel a, stand ṭhenkhat chu sâwr zîm a ni ta hlawm a; tuna awm mek pawh hi lirthei pung nasa leh tam ta lutuk avang hian taxi stand-in hmun a awh dan hi mipuiin kan thîk nasa ta hle. Hei ai hian general parking vekin ti se, taxi pawh din phal ni tho se a ṭha mai ang em?

Taxi kan neih tirh kha chuan lirthei a la tlem em em a, veng tinah hmun ṭha lai lai pek an ni a, luah chho zelin an ta neih lo thei bik lo a. Lirthei dang han park ve dawn pawhin an keipui sa hauh hlur tawh mai si a. Kawn ṭha lai ber an luah tlat si chuan dawr awm ṭhatna lai vek a ni bawk nen, thil han lei tura han din lawkna tur pawh a awm ta ngang lo.

Taxi stand-ah a âwl laiin han ding ve zawk duh pawh ni ila min um chhuak vat zel mai si a. Kan duhna dawr pawh kan pan thei ṭhin lo a nih ber mai hi maw. State dangah chuan hmun ṭha ṭha-ah stand pek an ni lem lo niin an sawi ṭhin a, khawpui hrang hrang tlawha han zin hian taxi stand kan pan ngai lo. Kawng kamah taxi lo tlan kan phar ding mai ṭhin.

Aizawlah taxi stand kan siam a nih pawhin AMC hian endik se, stand khatah sawm aia tam dinna an neih hi taxi pathum emaw chauh din theih nan sâwr zîm se, mipui vantlang lirthei tan zuah ve se a ṭha tawh khawp mai.

Tun hnai khan Khatla kawn phei tluanin taxi stand an neih chu AMC chuan a sâwr zîm a, a hnung leh hmaah dropping zone a siam a. Châkkhai han lama han din lawkna tur pawh a awm ta a, a thawventhlak hle. Bara Bazar stand te pawh hi sâwr zîm ngei chi a ni. Hmunpui laiah taxi stand-in hmun a awh khat deuh vek a, mipui lirtheia kalte han in drop leh thil han lei lawkna tur pawh a awm lo tluk a ni. He lai hmunah hian school lûn tak a awm a, naupang thlah leh hruaia han din lawkna tur zuah ngei chi a ni.

Mission Veng Bazar chhukthla pawh dropping zone chhetê a awm a, a bak chu taxi dinna hlir a ni mai a. Helai hmunah hian sikul ṭha tak tak, naupang luh tamna a awm nual a; two wheeler pawhin han in drop-na a awm bar lo. Hei pawh hi sâwr zîm ngei ngei chi a ni.

Mipui vangtlang tana thawk AMC hian taxi stand hrang hrang hi enfiah se, mipui nâwlpui a tam zawkin lirthei park-na awm mang loa mi tlemtein taxi stand atana an luah vek hi chu a dik bik tawh lo tih min hriatpui teh se.

Hei hi taxi huatna lam ni loin, kan khawpui mila parking emaw, taxi stand emaw siam rem a hun ta tih vang a ni. Aizawl khawpui enkawltu AMC kan nei a, anni hian mipui vantlang tana kan ṭhat tlanna tur an siam thiam ngeiin a rinawm.

- Lal Rinmawia