MZP hian party ṭan bik neiin hma a la
ZPM sawrkar hnuah National Health Mission hnuaiah dan lovin, advertisement chhuah lovin thawktu mi pasarih lak an ni a. Chu chu MZP-in dodalin, bân turin sawrkar an phût a. Sawrkar pawhin kumin June thla chawhma lam khan an bân zui a ni.
NHM hnuaia dan lova thawktu mi pasarih ZPM sawrkar hnua lakte hi RTI Act hmangin an hming leh an post te dil chhuah a ni a, social media-ah thehdarh a ni. Zawhna dang aṭanga a lan danin, MNF worker tuin emaw a dil chhuah leh thehdarh a nih a rinawm. Chu social media-a thehdarh hmang chuan MZP hian hma an la ta niin a lang bawk.
MNF sawrkar lai kum 2018-2023 chhunga NHM hnuaiah dan lo leh advertisement chhuah lovin thawktu mi 272 lak an nih thu tarlanna RTI Act hmanga zawhna chhanna social media-ah bawk thehdarh a ni a. MNF sawrkar laia advertisement chhuah lova NHM hnuaia thawktu lak mi 272-te chu post chi hrang 48 atan a ni tih a lang.
RTI Act hmanga zawhna chhanna social media-a an hmuh hmangin MZP-in ZPM sawrkar laia lak mi pasarihte bân tura an phût lai hian, MNF sawrkar laia lak mi 272-te erawh chu bân turin sorkar an phût ve duh ta hauh lo mai, hma an lak thâwm hriat tur a awm lo. A mak hi ka'n ti mai mai khawpah!!!
ZPM sawrkar hnua advertisement chhuah lova NHM hnuaia thawk tur mi pasarih lak chhan chu, 'Mipui tawrhna pumpelh turin urgent taka lak' a nih thu tarlan a ni a. Chuti chung chuan Health Minister hmalaknain mi pasarihte chu bântir zui an ni ta tho.
Engvangin nge MNF sawrkar laia NHM hnuaia thawk tur advertisement chhuah lo leh dan lova lakte bân turin MZP hian hma an lak ve loh? MZP hruaitu lawk zualte hi MNF party thlâwptu an nih vang em ni? Hetianga hleih nei taka MZP hian hmalak duhna leh duh lohna an nei dawn a nih chuan an kal dan a dik lo tawp tihna a ni a, an hruaitute hi zui tlak loh leh an hmalakna dangte pawh thlâwp tlak loh a ni mai dawn tihna a ni. MZP hruaitute an inenfiah a ngai tak zet.
Dik tak chuan NHM chauh ni lovin, tuna Samagra an tih tak SSA leh RMSA bakah, CSS dang hnuaiah dan lo leh advertisement chhuah lova thawktu lak a tamzia chu Mizoram mipui hian kan hre tlang a, MZP hruaitute pawhin an hre viau ang. MNF sawrkar lai vêk kum 2018-2023 chhungin Samagra hnuaia thawk tur advertisement chhuah lovin mi 696 lak an ni tih RTI Act hmanga zawhna chhanna social media darhte pawh hi MZP hruaitute hian an hmuh hmaih bikin ka ring lo. Zirna kaihhnawih a ni a, MZP hmalakna awm tak a nih laiin, hma an la duh tlat chuang lo zu nia!
ZPM sawrkar hnua NHM hnuaia thawk tur advertisement chhuah lova lak dodal a, bân tura MZP-in sawrkar an phût hi a ṭha reng mai. Dan lova thawktu lak hi Mizo mipui, a bikin ṭhalaite duh loh a ni. Mahse, sawrkarna chelhtu azira dan lova thawktu lak dodal duh leh duh loh neih erawh a dik bik lo. ZPM sawrkar laia dan lova thawktu lakte bân tura an phût a nih chuan, party dang sawrkar laia dan lova lakte pawh bân turin phût ve se la, hma la ve rawh se tiin MZP hi kan phût ve leh chhâwng a ni.
- Lalhlanpuia