Lungrual taka Remna Ni lawm dan mumal deuh neih a pawimawh
Kan hriat tawh angin Mizoram hi kum 20 chhung rambuai niin, kum 1986 June ni 30-ah India sorkar leh MNF ten inremna thuthlung (Peace Accord) an sign kha a ni a. Remna thuthlung sign ni aṭang chuan kumin 2025 hi kum 39-na a ni.
Ka la hriat ve reng chu, remna thuthlung sign a nih khan Mizo mipuite kan hlimin kan lawm em em vek khan ka hria. Eng ni chiah nge ka hre chhuak thei ta lo va, remna thuthlung sign hnu rei vak lohah Pu Laldenga, ex-MNF President (RIP) kha Tuirial Airfield-ah a lo ṭum a, ropui takin Aizawl mipuiin kan lo lawm a, mipui leh lirthei pawh an tam thawkhat hle a, AR Lammualah lawmna program siam a ni. Khatih lai khan Police sub-inspector probationer ka la ni a, AR Lammual main gate, Zodin lamah ka duty ve a, khatih hun lai atan chuan mipui pungkhawm kha tam hlein ka hmu.
Khati khawp khan Mizo mipuite’n remna kan lo thlakhlelhzia leh hlutzia vawin thlengin a lang a, a ropuiin a lawmawm em em. Remna thuthlung hi vawng nung zelin, India khua leh tui rinawm tak leh rintlak ni zel turin rilru i pu ang u.
Hetiang taka remna hlut site hian lungrual tlang taka Remna Ni lawm dan mumal deuh zawk vawiin thlenga kan la nei thei lo hi a makin a pawi hle a ni. Remna Ni a lo thlen apiangin Mizoram pum huapa lawm dan mumal nei lovin, a remchan dan leh ṭha tih danin political party leh pawlin an lawm deuh mai niin a lang a. Political party ṭhenkhat leh politician ṭhenkhat ten thangṭhat inchuhna atan leh politics hamṭhat inchuhna atan remchangah an hmang ni berin a hriat a. Hetiang rilru hrisel lo hi bânsanin, Mizo mipuite’n lungrual taka Remna Ni hi kan lawm ho theih dan tur siam chhuah a hun ta khawp mai. Tu nge hma han la ang a, bul han ṭan tur ni ang le?
Remna Ni lungrual taka kan lawm ho theih dan tura ka rin chu, politics rawngkai lo turin neutral thei tur ber Mizoram chhunga tlawmngai pawl hrang hrangte thawhhona committee, Mizoram NGO Coordination Committee kaihhruaina hnuaiah lawm ni ṭhin ta se, nakin zel atan pawh a ṭha ngawtin ka ring. Mizoramah remna leh muanna vawn nun a nih zel theih nan Remna Ni hi mumal deuh zawka lawm ho dan tur duan chhuah a hun hle ta mai.
- C. Lalthanmawia, IPS (Rtd), Tuikhuahtlang