Vawkhniahzan Thla / Vawkhniakzawn Thla

Kum 2025 Vawkhniahzawn thla/Vawkhniakzawn thla kan lo thleng leh ta reng mai a, a lawmawm e. He thla hming sawi danah hian a thupuia kan hman ang khian ngaih dan inang lo a awm a. Dik kan inti ve ve a. Hemi thu hi tlem ka han sawi ve teh ang.

Mizo ṭawngah hian thu pangngai lam hnih lam thuma lama a thu pangngai te kan nei nual a. Entir nan, vua vuak vaw–ui a vua a, a vuak nat loh avangin a vaw nawn leh a. Chutiang zelin, liak liah–meivap a liak a, meivap liah chu a ṭha lo. Kan ṭawnga thu mal tawpa 'k' awm hi a lam hnihnaah hian a tawpa 'h' hman a awm nual mai.

Entirna 'ak' 'ah’; iptê ka ak ṭhin a, iptê ah chu a ṭha. 'Awk' 'awh'; sava ka âwk a, ka awh vawi khatna a ni. 'Bawk' 'bawh'; saw ui bawk saw, a bawh dan a fel thlap mai. 'Chawk' 'chawh'; bai kha chawk rawh, chawh ngun poh leh a tui. 'Dâk' 'dah'; tukverhah dâk suh, i dah chuan i tla ang. 'Ek' 'eh'; thing i ek elo, eh a va har awm ve. 'Nghak' 'nghah'; min lo nghak la, nghah rei ka ngai lo'ng.

'Hhniak' 'hniah'; kan vawk hniak hi a hniahna hmun azirin a inlen hleih. July thlaah khawlai a diak ṭhin a, vawk hian an ‘hniah’ zawn thliai ṭhin avangin VAWKHNIAHZAWN thla an ti ṭhin.

'Hnûk' 'hnuh'; a samah a hnûk a, a hnuh chhung chu a ṭap. 'Kâwk' 'kawh'; zungchalin a kâwk a, a kawh veleh a ṭap a. 'Lâwk' 'lawh'; buh hâk a lâwk a, a lawh zawhah a dêng nghal. 'Riak' 'riah'; zanin riak leh ila, kan zan thum riahna a ni ang. 'Suak' 'suah'; tui va suak la, min rawn suah kêp rawh. 'Thliak' 'thliah'; pangpar a thliak a, thliah a awlsam hle.

'Ṭiak' 'ṭiah'; thlai a kûi ṭiak a, a ṭiah hma pawhin a en fo ṭhin. 'Vâk' 'vah'; ram kan vâk a, ram vah chu a nuam khawp mai. 'Ziak' 'ziah'; i lehkha ziak chu ziah chhan i mamawh a nih kha.

Kan ṭawngah hian thu mal pakhat lam hnih hman zingah hian 'ziak' 'ziah' tih hi ṭhangthar kan mi thiamte thu inchuh pakhat chu a ni. Chutiangin 'hniak' 'hniah' pawh hi hman lâr vak loh a ni bawk. Kan mi thiam ṭhenkhatte’n 'ziak' 'ziah' tihah hian ziak tiin a hman theih vek a, ziah tih hi hman a ngai lo ti an awm a, ṭhenkhatte’n ziah tih hmana sawi nuam zawk a awm an ti bawk. Pathian Lehkha Bu hi kan rinrawl deuh ber a ni a, Roreltute 8:14-ah te, Thufingte 22:21-ah te leh Luka 16:2-ah te chuan 'ziah' a hmang a ni. Tunlai pawh hian lehkha ziak mite zingah 'ziah' hi hmang an awm tho mai.

Tichuan, ‘ziak’ leh ‘ziah’ chungchangah hian inpawm tawn mai hi a ṭha. Chutiang bawkin ‘hniak’ leh ‘hniah’ pawh hi hniak tiin a lam theih vek ti an awm ngei ang. Mahse, hniah tia lam remchan riauna lai chu a awm ve tho a ni. Tichuan, ‘hniak’ leh ‘hniah’ tih pawh hi dik lo intitawn lo hian inpawm tawn mai zawk ila, hah a dam ang a, ṭhangthar lokal zelte pawh an buai lo zawk ang. Vawkhniakzawn thla tih ai chuan Vawkhniahzawn thla tih hi lam nuam ka tih zawk chu a ni.

- SR Lalkailuaia