Thlarau Thianghlim leh meia baptisma chang lo rawngbawltute!
Kan ram zim tê, pît dawr tiat lekah hian a maka maka tam thuhril rawngbawlna nei mek an awm a. Synod hnuaiah hian revival speaker 70 an awm a, BCM hnuaiah hian evangelistic team 54 an awm bawk. Hengte bakah hian kohhran dangte hian evangelist an nei vek a, heng bakah tualṭo evan kan la nei ṭeuh bawk. Khaw te din tham lawih evangelist nei ram kan ni tlat!
Pathian kohna dawnga chhangtu vek nia inchhâl heti zat evangelist nei ta chu, Zoram hmun tinah Pathian hnathawh thleng mawlh mawlh ṭhin âwma mawi a ni. Kohhran tinin kum khatah vawi khat emaw camping/crusade buatsaihin, heng thuhriltute hi an ruai ṭhin a. An camp-a lut zawng zawngte lah piang thar leh siam tharna chang an ni fai deuh vek zel a! Mahse, khawi kohhranah mah hian danglamna (Thlarau Thianghlim hnathawh) a thleng thei tak tak ngai si lo!
Johana khan tuiin simna baptisma a chantir laiin, a hnunga lo kal tur chuan Thlarau Thianghlim leh meia a baptis ṭhin tur thu a sawi a. Chu baptisma chu Pentikos ni takah, zirtir 120-te chungah a rawn thleng ta a; a nghawng kha na tak a ni! Zirtirte kalna hmun apiangah Thlarau Thianghlim hnathawh a thleng a, miin taksa leh thlarau damna an chang mawlh mawlh mai a nih kha.
Kan evangelist-te hian Pathian kohna an dawng lo kan ti hauh lo; Pathian pawhin anmahni hi hman a duh tak zet bawk. Mahse, Pathian danglam tak a nih tlat avangin a rawng bawl tura a kohte a fiah ṭhin a. Rinna pa Abrahama meuh pawh malsawmna tam tak a vûr hnuin, malsawmna tam tak ka pe ang che tia ko chhuak siin, kha a hnena a thutiam dawng tlak a ni em tih hre turin fiahna hautak ber hmangin a enchhin leh zet a nih kha!
Kan ram hi khawvelah Kristian sakhaw puithiam leh rawngbawltu, evangelist-te tana paradis a ni tlat a. Rawngbawl tura kohna an dawn tirh chuan ṭhahnemngai takin Pathian an buan a. Mal min sawm ngei ngei la, ka ramri min zauhsak ang che titu Jabeza ang maiin, Pathian hriak thihna an chan hma loh zawng an inserh hrang peih ṭhin. Tichuan, Thlarau Thianghlim thil tih theihna nen rawng an bawl ta ṭhin a nih hi.
Mahse, an rawngbawlna a han hlawhtling chho deuh deuh a, chawimawina, ngaihhlutna leh chawisanna hmunah awm chhoin, evangelist-te paradis-ah an chuang kai ta a. He paradis-ah hian khawsak thiam lo fe fe an awm ta ṭhin a nih hi. Kohhran mipuite lah thlêmna duhawm berah chang zoin, kan evan-te hi khawvel thila entertainer-te ang maiin an lo dawngsawng a. Malsawmna tinrengin an lo vûr a, chaw tuihnâi ber bera lo châwm thauin, an lo maih ta kûng mai ṭhin a ni.
Chu paradis aṭang chuan rawngbawl tura sawmna dawngin, inbuatsaihna em em pawh nei lovin, an tawnhriat tawh sa nen an feh chhuak ta a. Thlarau Thianghlim hriak thihna a thara dawn thu awm hek suh, an sermon ngai bawk thlakin thlarau lên an dêng a. Mizote lah rilru nghet ta lo chu, a taka Pathian nena intawhna tak tak nei si lovin, ṭhiante rualin sawmna an han chhang ve mai zel a! A dera sim ta chu, kan thuhriltute hian simna nun neitu tak tak thlarau fa an hring thei ta reng reng lova nih hi!
Tun hunah pawh hian kan evan hlawhtling ber berte thu sawi Youtube lamah han ngaithla teh. An sermon ngai bak sawi tur rêng an hre ta lo emaw tih mai tur a nih zawh tak hi! Evangelist-te paradis aṭang hian kan evan-te hi Jakoba anga zankhuaa Pathian buan leh turin an tha a ṭhum zo a. Mal min sawm phawt loh chuan ka thlah lo ang che, tia fianriala Pathian buan hlawhtling leh turin an nuamsa tawh tlat. Zirtirte anga ni 50 Pathian buan peih, Thlarau Thianghlim leh meia baptisma chang nawn leh turin hreawm an pawisa zo ta a. An sermon ṭhing her lum her lumin an tei ta suau suau hlawm a ni!
Zoram kohhrana upa leh rawngbawltute zingah phei chuan he Thlarau Thianghlim leh meia baptisma chang an vâng leh zual a. Kohhran inkhawm sermon-te pawh thlaler ang maiin an ro hulh hlawm reng mai a ni. Lal Isua khan he Thlarau Thianghlim leh meia baptisma chang lovin, a zirtirte khan rawngbawlna an ṭan mai ang tih a hlauh em em chhan chu kan hre thiam tawh mai awm e. Campaign ru chunga laina leh chhûng khat ngah vanga upaa thlan tlin satliah ve ngawtte tan chuan Thlarau Thianghlim baptisma chante hi chu a thleng mawh hle ta ve ang.
Tichuan, he Zoram zim têah hian Thlarau Thianghlim hriak thihna chang lo upa leh rawngbawltu, evangelist rual an tei ta suau suau a. An pianpui finna leh hriatna, an thu sawi thiamna hmachhuanin Zoram kohhrante min han uap ta a. Ṭhâlvaekchâr laia tuihna kang chat ang maiin kan thlarau nun a ro tlâng ta em em a lo ni. Thlarau Thianghlim leh meia baptisma erawh mahni ngeiin a man sâng tak pêka chan theih chauh a nih si avangin, kan ramah a man pe ṭhin mi tlem tê chauh lo chu nung taka rawngbawlna kalpuitu kan nei thei ta lova ni.
- Lalremliana Pachuau