Khawng taka ILP endik

Sairang thlengin rel a tlan ṭan ṭep a, Chief Minister Lalduhoma sawi danin Prime Minister Narendra Modi hman hun chiah nghah a ni tawh a, engkim peihfel thawhkhat tawh a ni.

Rel tlan tur hi Mizo mipui tan chanchin duhawm a ni a, hmasawnna tam tak a keng tel dawn. Chutihrualin tun ṭumah erawh a ṭhatna lam ni lovin inven ngaihna lam han tarlan ta ila.

Vanglaini–July 2, Nilaini chhuakah khan Mizoram Merchant Association (MIMA) chuan Sairang thlenga rel a luh dawn avangin Bairabi leh Sairang chawlhhmun bakah, a kara rél chawhmunahte khawng taka ILP endik an duh thu leh ILP endikna changtlung tak siam an duh thu Home Minister hnenah an thlen thu tarlan a ni.

MIMA hian an sumdawnna tur ngaihtuah ranin hma an la tia ngaitu an awm thei a, amaherawhchu an hmalakna hi Mizo mipui pawhin an ṭawmpui ngei ngei tur thil a ni zawk. ILP chungchang hi chu uluk zawka ngaihtuah a ṭul hle.

Sairanga rel rawn luh hma pawhin ILP a mumal tawh lo a, CYMA pawhin theihtawpa hma a lak pawhin tih ngaihna vak a hre ṭhin lo. CYMA-in a hnuaia Branch YMA te a check tir chiam ṭhin a, ILP nei lo ho chungah pawh hremna tak tak a awm chiah lo.

CYMA hmalakna anga ILP an endik hnuhnung berah phei chuan Police station-ah ILP nei lo hnamdang an hruai khawm a, tih ngaihna tak an hre lo. Tun hma chuan Mizoram pawnah an zuk dah ṭhin kha a nia, a hnuhnung berah chuan pawisa an chawitir a, an chhuah leh mai niin an sawi.

CYMA leh a hnuaia branch te hmalakna fakawm viau mah se hrem dan mumal tak a awm miau loh avangin an thil tum erawh a hlawhtling lo tiin a sawi theih. ILP hian keini tribal 'Mizo mipui' te min hum viau mah se keini a chengte ngei ngei hian kan hlut tawk lo.

Mizo hmeichhe te pawhin hnamdang pasal neiin an fate tribal nihtir an tum a, tam takin engtin tin emaw tribal an nihtir a, kan ham ṭhatna neih tur ang an chen ve zel bawk. Cheng ho ta na na chu lungrual tak chuan kan awm ho a, an hmingah 'Zo' tih dah telin an inti Mizo em em a, document an neih miau avangin Mizo chu an ni ngei a, an thisen aṭang erawhin an ni der si lo.

Rel tlan luh hnuah phei chuan Mizoramah hnamdang an rawn lut nasa. General class coach-ah hian mi 250-300 an chuang thei a, Sleeper class coach-ah mi 72 chuang theiin AC coach-ah 64-72 vel an chuang thei a, rel pakhat hian mihring a phur hnem thei tlat.

Mizo tlangval thawh duh loh tur kha hnamdangin an thawk dawn a, nasa takin hnamdang an pung dawn tih a chiang reng mai. Sawrkar hian tun ṭanga ILP khawng taka endik dan tura ruahmanna a siam ṭan a nih loh chuan buai chiah kan hmabak a ni thei a, ruahmanna ṭha tak pawh siam se, ṭha taka hmalak a nih loh chuan kan buai dawn tho tho. Hnamdangin min chim buai loh nan khawng takin ILP hi endik ni rawh se.

- Lalngaihdama