Zoram thar tan nun thar

Zoram thar a lo thlen theihna tur atan thil pawimawh awmte chu:

inkalpawhna kawngpui tha te, kawlphetha hnianghnar te, thil siam chhuahna puitling lian leh tha te, ei leh bara intodelh te anni hlawm a. Nimahsela, heng mihringte thil siam chhuah ringawt hian zoram tharah min thlen thei dawn lova, a chhunga cheng mihring thinlung leh ngaihtuahna te chu a danglam hunah mihring nun chu nun tharin a lo awm anga, chu ngei chu Zoram din tharna tura thil pawimawh ber chu a ni.

Hausaknate, nihna leh dinhmun sang te, thil tih thatte avanga nun lo chapo hian mimal, khawtlang leh kohhranah inenhranna te, inhmuhsitna te, mahni indah pawimawhna biknate, mahni thu duh bikna te, mi dang ngaih pawimawh lohna te, a thlen thin a, chu chuan mi hnuaihnung zawkte nun a hnawt chep thin. Heng nun zia thalo te hian Zoram thar lo awm turah hmun an chan ve a rem tawh dawn lo a ni.

Zo nun ze mawi leh Krista tlawmna nun tangkawp chuan, thenawm building hrana awm kan va biak pawh ngai loh leh tlawhpawh ngai lohte leh chenna pindan piaha awm kan va biak pawh ngai lohte chu a chhui zel a, a va zawng chhuak a, chuta tang chuan inpawhna nun thar an lo nei a, inpawh leh hlim tlang takin an awm ho ta a. kan pi leh pute hun laia Saum leh Chingal an insuah tawn hun lai nun inthlunzawm kha an va tawm leh ta a.

Sumdawnna hmunah a zuartute leh a leitute inkara rilru tina vawng vawngtu buk tlinglo leh a man chhiar chawp dik lo tak te, hralh chhuah atana tlinglo thil zawrhte chu Zoram tharah luh pui tlak an ni dawn lo va. Mahni hmasialna leh duhamna tello nun neitu ten mi harsate kep zel thei turin eizawnna an zauhva, an thawk rim em em zel.

Rinawmna leh dikna thiltih chuan ram hmasawnna a rawn thlen a, mahni chan tawka lungawina te, midang chanpual va awh lohna te, Ram development sum mahni tana lak pen duh lohna te, chutiang ang nun neitute thil tih avangin eirukna te, hlem hletna te a lo bo zo ta.

Mi dangte thawh chhuaha innghat mai lovin, mahni thawh chhuaha innghah ve tumin chhung tina thalaite chuan intodelh ve an tum a, a remchang apiangah va thawk turin an pen chhuak suau suau ta mai.

Heng kan han sawi tak nun ze ropui tak takte hi zoram thar kan panna kawngah kan nunin a ken tel turte chu an ni. Kan chenna Mizoram hi hmuh theihin hma lo sawnin, lo changkang mah se la, a chhunga cheng Zofate nun kal diklo hi siam thata khalh ngil a nih theih loh chuan ‘Zoram thar’ tih hi a lo thleng thei dawn lo a ni.

- H. Neihchungnunga

Durtlang North