Property Tax VC lak tur chungchang

Building chhiah, Property Tax V/C lak tura tihna ka lo hmu a. Lehlamah chuan VC fund ve tur anmahniin an intum chawp tur hi an thawh ṭhat leh ṭhat loh azirin an hmu ṭhain an hmu ṭha dawn lo niin a lang. An lawmpuiawm rualin, village leh town chu a inthlau deuh mai thei.

Tun ṭumah Property Tax khawn turah hian building tax-te hi an hrût rual deuh ṭhup dawn niin a lang a. Assam type-ah Rs 100, semi pucca-ah Rs 150 leh RCC-ah Rs 200 angin hrût rual a nih hmel a. Revenue Department-in building tax an lo lak ṭhin ang khan an ti dawn lo a nih hmel. Revenue Department-in a lakah kha chuan flat emaw, a chhawng dang angah khan rate nei hrang vekin a la a; RCC 170 niin flat 2 lo nei ta se, 240 belh leh tur a ni a, flat/chhawng a tam leh an building tax chawi a tam mai a ni.

VC ten an lak turah hian flat emaw, a chhawng emaw rate a awm hran loh chuan a chhawng sang leh flat nei tam apiang an vannnei dawn tihna a ni a; sawrkar tan chuan hlohna nasa tak a nih ngei ka ring.

Surcharges pawh hi miin a in luahtir zat thla khata a lak luh aṭangin 21.6% sawrkarah an chhûn luh a ngai bawk a. Entir nan, miin thla khatah Rs 10,000-in in a luahtir chuan kum khatah Rs 2,160 sawrkarah a chhûn luh ngei ngei a ngai a; hei pawh hi Revenue Department-in Aizawl AMC huam ni lo district dang zawng zawnga a kalpui leh chhiah a lo lakte zinga mi a ni. VC-te hian an la chhunzawm dawn lo a nih chuan sawrkar tan chuan chânna nasa tak a ni ngei ang; in luahtir tam tak an awm si a. Mipui tan erawh hnâra hlît phawi ang hlauh a ni thung ang.

Revenue Department hian building tax leh surcharges aṭang hian kum tin sum tam tak a lo la tawh ṭhin a. Tunah VC-te kutah a awm dawn a nih pawhin sawrkar hian hengte hi felfai deuh hleka a tih loh chuan sum tam tak luang ral tur hi sawrkar chak tak hian a en liam mai mai a nih chuan sum a hloh tur hi a uiawm ve viau dawn a ni. Chuvang chuan, kan sawrkar chak tak hian felfai taka building tax leh surcharges lak chhunzawm zel dan tur pawh hi ruahmanna fel tak siam law law se a ṭha lo maw?

- Bibtei Pa, Champhai