Pu Duha hian Pu Zorama a ang sâwt ka ti!

Kalphung thar sawrkar inti chuan kum khat leh a chanve vel hna an thawk tawh ta a, hmalakna ṭha tak tak, sawrkar hmasate tih ngam loh thil ṭha an tih nual tawh rualin, beisei an phâk lohna erawh sawi tur a awm ve nual tho. Ni e, thil chi tinrengah hian ṭha famkim nih chu a har ve bawk a ni; a har chauh ni lovin, thil theih loh a ni zawk mah âwm e.

Kalphung thar sawrkara Chief Minister pawh mipuiin beiseina sang tak kan nei a, ZPM sawrkarah rau rau pawh mipuiin beiseina kan neih sanna ber a ni kan ti thei ang. Kan CM hi thusawi thiam tak a ni a, mahse, thusawiah hian a fimkhur a ṭul hle mai. A ṭawng tam mah mah em aw, thil sawi ṭul lo a sawi tam ta mah mah em aw tih tur a ni ṭanin ka hmu!

Kan CM hian Thenzawlah mi nuai 10 aṭanga nuai 15 vel chen theihna khawpui din an tum thu a sawi ta zauh zauh a. Hei hi a taka thleng thei lo tur, mumang ram (utopia)-ah kei chuan ka ngai. Thenzawl leh a chhehvel hi hmun rem tak a ni a, mi nuai têl chenna dâwl zo tur a nih ka ringhlel lo. Mahse, hmun rem tak a nih avang ngawtin khawpui lian tak din ngawt theih a ni chuang lo.

Thenzawl hi tuna Lunglei tiat ni tur pawhin kum za vel tal a ngaih ka ring, mi nuai 10 chuang chenna khawpui ni tur phei chuan 'Awi ka rei!' a ni mai. Chhiarpui hnuhnung berah Thenzawlah mi 7,529 an cheng a, kum 2024-ah mi 10,300 vel cheng tura ngaih a ni. Lungleiah chuan 2011 chhiarpuiah mi 1,61,428 an cheng a, 2024-ah chuan mi 2,09,000 vel cheng tura ngaih a ni.

Kum 2011 chhiarpuiah Mizoramah mi 10,91,014 kan awm a, kum 2023 khan mi 12,50,000 awm anga chhût a ni a, Mizoram mi zawng zawng hi Thenzawlah kan cheng thei dawn tihna a nih chu! Guwahati-ah khuan kuminah mi 12,24,170 an cheng anga chhût a ni a; kan CM sawi ang chuan, tuna Guwahati ang vel khu Thenzawlah din kan tum tihna a ni. Thil ni theiah kan ngai em le?

MNF sawrkar hmasak laia Chief Minister khan Police constable aṭanga DGP thlenga kai theih angin a sawi nia sawi a ni ṭhin a, mi tam tak chuan nuihzatthlak an ti a. Kawng chhâwng tih te, lei verh tih vel a sawi ṭhinte pawh mipuiin an nuih deuh. A nuihzatthlak pawh a ni mai thei e. Mahse, kei chuan Thenzawla mi nuai 10 aṭanga nuai 15 chenna tur khawpui din tum hi nuihzatthlak ka ti zawk tlat!

Mi tam takin MNF sawrkara CM thusawi ṭhenkhat nuihzatthlak an tih chhan chu thil thleng thei lo nia an ngaih vang a ni. Chutiang bawk chuan kei pawhin tuna kan CM thusawi, mi nuai 10 aṭanga nuai 15 chenna tur Peace City din nuihzatthlak ka tih chhan chu thil thleng tak tak lo tura ka ngaih vang a ni. Chuvang chuan, kei chu, tuna kan CM hi MNF sawrkar laia kan CM kha a ang chho ta riaua hriatna ka nei tlat pek a nih chu!

- Zodinsanga