Sorkar hna lak fair rawh se
Tun hnaia Mizoram Police hnuaia police constable lak kha a fair hlein ka hria, sorkar thuneitute an fakawm ka ti tak zet.
Police a tam tham deuha lak hi a awm zeuh zeuh tawh a, tun ṭum anga fair hi a awm tawh a ngem aw ka ti. Hetianga fair taka hna lak hi chhunzawm zel nise ka tih takzet. A bik hna nghet ngat hi chu fair takin lak zel ni se ka tih takzet, a nih loh chuan kan ṭhalaite an beidawng mai ang tih a hlauhawm.
Tun ṭuma police constable laka tling zo ta lote pawh an vui lo viauin ka hria, a chhan ni thei chu a fair vang a ni. Fair taka tlin loh chu a nat dan a nep deuh ngei ang. Sorkar hna lak a fair chuan ṭhalaite inelna thianghlim hmangin an inel anga, a ṭha leh a tling apiang lak an nih chuan ram tan pawh an thawk hlawk lehzual dawn a ni.
Chutihrualin, sorkar hnathawk lak a nih dawn hian sorkarin ngun takin ngaihtuahna seng se ka ti tak zet. Sorkar hnathawk hoin indaih lo an inti a, an office-a kal hian lo ṭhu mai mai, games khel, chawlh la lem loa office lo chhuahsan, mahni room loa lo awm daih leh a dangte hmuh leh hriattur a awm leh ṭhin.
Sorkar hnathawkte'n kan budget aṭanga an chan hnemzia kan hria a, chuvangin mamawh tawp loah chuan sorkar hnathawk hi lakbelh ni lo se. An hnathawh dan kalhmang hi tidanglam ila, tuna an dinhmun ngai rengah hian department tam zawk hi chu tun ai hian an indaih thei ngeiin a rinawm. A nih loh chuan kan budget-a mipui chan a tlem chho zel dawn a ni.
Tin, sorkar hnathawk thi tate aiawha an chhungte lak ṭhin (composionate ground) hi tihtawp hmak nise ka ti takzet. A bik takin police-ah an uar zualin ka hria. Sorkar hnathawk awm lohna chhungkua tam tak an awm laia, an chhungte thi aiawha lak hi a ṭul lo hlein ka hria. Sorkar hna hi in hlan chhawn chiah ka ngai lo.
Thihna chu a runthlak takzet a, chutihrual chuan sorkar hnathawk lo pawh mitthi an awmve reng. Sorkar hnathawk chhungte chuan sum tam tak lak tur an nei a, old pension scheme-in a huam chinte phei chuan thla tin hlawh an chhungte'n an la thei. Sorkar hnathawk lo chhungte an thih chuan an liam a nimai.
Chuvangin, sorkar hnathawk chu fair takin, a tling ngei, a ti ṭhat dan indawtin lak zel ni tawh se ka duh takzet a ni.
- Lallianthanga