Tih hi ka hmuh chhuah chu a ni

II Timothea 4:4 (MGB) ‘An bengte chu thutak lamah an chhu ngawng ang a, thawnthu lam panin an peng tawh ang.”

Kan chhungkua aṭang hian bul i ṭan ṭha ang u hmiang. Pathian malsâwmna kan dawn hian kan Kristianna leh khawtlang, chhungkuaah hian thu neihna a chang lian ta mah mah e. Mi tinin kan neih kan mobile phone mawlh mai hian min va tibuai tak em. Dawrah han kal ila, dawr nghaktuin customer-te ngaihsakna (care) reng an nei lo va, an phone en chungin, chumi zat an ti hmuk a, phone min bihsan a. Inah ni se, nu berin ei rawng bawl pahin story a ngaithla a, fate’n phone an khawih a, nu leh fa inkarah thu sawi dun hleih theih a ni ta lo. Pa berin pasalṭha story ngaithlain, fate’n game an khel bawk. Hetiang hi chhungkaw tin deuh thaw kan ni.

Chhungkua inpawh tak ni ṭhin kha kan nihna kan hloh a. Titi khawchang sawina hun reng kan nei thei lo hian ṭhalaite nunah khawhar rukna a thlen a. An phone aṭangin sex video an enin story an chhiar a, tih chhin an châk a. Tunah hian maw, in fanute hi call girl an ni em? Kan chhungkua hi hurherhna lama hian kan him tawh lo asin. Eng vang nge?

Mi nun kan vei a, mi chhungkua buaina kan ngaihven a, kan chhungkua erawh kan ngaihven si lo. Kan fate’n eng harsatna nge an neih? Heti kan nih zawh tak avangin mahni ngaihdan bung kan dah lal a, kan ei zawnna ṭheuhah kan buai a. A dik emaw, dik lo emaw, sum kan hmuh theihna tur a nih dawn phawt chuan pawisak kan nei tawh lo a ni hi. Thianghlim taka hausa sawi fak tûr hi kan vâng pharh tawh asin. Kan Kristianna kan chawi vâwng a, káwrah kan hmang a. Kan inkhawm tam hian min hruai dik zo tawh lo chu a ni hi maw. Pian tirh aṭanga Kriatiante biak ina inkhawm ve miah lo, mi dik hi an va tam si em. Hlêp rûkna laka fihlim, bân pasarih nei hmaa kûn zingah hian mi dik tak chhiar sen loh an awm. Keini hi eng kan ti bik nge?

Ring lo mi, kan missionnary-te kan tirhna hmun aṭangin bûk dik takin gas, buhfai, chini an rawn thawn chho a, Kristiante dawr aṭangin bûk dik loin kan lei leh si a nih hi. Sorkharin mawh a phur lo va, nang leh kei, Krista nun neitu intite hian a ni, mawh phur zawk ni. Kan aw hi Jacoba aw, Asaua silhfen kan inbel a, biak inah kan lawi a, biak in kan chhuahsan rualin mi rêl kan hman nghal zel maite hi kan insiam rem thiam a hun tawh a ni.

India rama kohhran hruaitu pakhat chuan Mizo kohhran a din chhung chu zai hi a reh tawh lo vang a, Mizo Kristiante an zai chhûng chuan kohhran hi a nung reng dawn a ni, a lo ti a. Khuang hnih hla kan sa a, lâmtualah kan chhuak a, hlim takin kan zaiin kan lâm a. Mahse, thuhriltu a rawn ding chhuak a, kan insiam rem set set a, mutthlûk kan tum nghal a. Mizote hi hlaah chauh hian kan piangthar em ni aw? Thu chu hla a ni a, hla chu thu a ni, kan ti bawk si a. Fakna hla ṭha tak takte hi biak in atan chauh a ni lo va, ni tin kan ei zawnna hmun leh ṭhenrual kan kawmnaah hian a lang chhuak tur a ni dawn lawm ni? In êng chu mi mit hmuhin êng rawh se, tih ziak a ni kha maw.

Ti hian ka dâwn kîr ṭhin, kêa ka kal ṭhin lai chuan motor khalhtu (driver)-te hi ka dem ṭhin a, (tuihâwk leh chirh min dai per ṭhin avangin). Motor ka han nei ve a, kêa kalte ka hrâwk leh thung si. Bazar leh dawrah te ka kal a, dawrkaite hi hlêp tam tum leh duhâm tak ni hian ka hmu a; dawr ka han kai ve a, tu mah ka hniam phal leh si lo. Sa zawrhna lama ka kal zel a, sa sâttute’n bûk dik lo an lek ka hmuhin, Kristian tih atan chuan a va ṭha lo em aw, kati vawng vawng a; ka ran vulh ngei ka sêr ve a, bûk dik lek turin ka huaisen zo tâwk si lo. Kan ram politician-te kal dan ka hmuhin mi pamhamte tuallênna niin ka ngai a, politics ka han luh chilh ve a, therhlo beisei rêng rêngin ka hmanhlel leh si.

Huiham, Krista nun ṭâwmpui thei lo hring nun hian eng mah rêng hi a lung awipui zo lo ve; tih hi ka hmuh chhuah chu a ni.

- Zothansanga, Chhiahtlang, Kawnveng, 9612333536