Mizoramah rêl a service ve dawn ta!
Mizoram hian July 2025-ah rel kawng thlun zawmna hmasa ber a nei ve dawn ta a, Bairabi-Sairang rel kawng hi hman theih thuai tura ngaih a ni. He 51.38 km line hian lei lian 55, lei tenau 87 leh leiverh (tunnel) 32-te a huam.
Northeast Frontier Railway (NFR) hian tunah hian Assam-a Silchar leh Mizorama Bairabi inkar passenger rel service a kalpui mek a. Silchar-Bairabi daily passenger train hi May 27, 2016 khan meter gauge railway system awm sa chu broad gauge 2-ah a hlan kai hnuah hawn a ni. Bairabi-Sairang rail project hian Mizoram khawpui Aizawlah hian gauge connectivity zau tak a thlen dawn a ni. May 1-11, 2025 khan trial run hlawhtling taka kalpui a ni a, hei hian Mizoramin India ram railway network-a a inzawm khawmna tur thil pawimawh tak a keng a ni. Kum 1975-a din Aizawla Railway Out Agency kaltlangin rêl ticket book theih a ni a, reserve theih a ni bawk.
Khawvela rêl awm ṭan tirh aṭanga kum 200 liam hnu, India rama rêl awm ṭan tirh aṭanga kum 172 liam hnuah Mizoramin rel service kan nei ṭan ve dawn chu a ni a. Silchar-Bairabi daily passenger train May 27, 2016-a kan neih ṭan tirh lai leh Bairabi-Sairang thleng rel kawng duan tirh vel laia rel service duh loh thawm thangvâ leh sepsêl thâwmte kha dawn kir chângin kan lo la changkan lohzia a lang fiah uar uar mai!
UT kan nih ṭan tirh 1972 khan rêl service lo nei tawh ni ila emaw, state kan nih ṭan tirh 1987 khan rêl service lo nei tawh ni ila chuan tunah chuan kan ram khawpui ber New Delhi kan thleng zung zung thei tawh tur le? Mahse, vuivaiin awmzia a nei tawh si lo.
Engpawhnise, rel service kan han nei ve tawh tur hi hmasawnna rahbi thar pawimawh tak leh danglam tak a ni a, a lawmawm tak zet a ni. Rêl hi chuan man leh bungraw phurh man a tlawm a, mirethei tan a chenfakawm lehzual. Bazar chawhmeh thlai ilo leh dawr bungraw to uchuak tak taka kan lei mek pawh hi nakin lawkah chuan tlawm tê têin kan lei thei tawh ang a, kut hnathawktute tan an thlai tharte pawh awlsam taka hralh leh thawn chhuah zung zung theihna tura kawng awlsam zawk thlentu a la ni chho zel dawn a ni.
Kan CM pawhin New Delhi thleng rêl service nei thuai tura Railways thuneitute hnena a thlente kha a finthlak hle mai! Mahse, duh aiin kan fin a tlai hrat ṭhin a, inenfiah kan ngai tlang a ni. Rel service tluang taka kan neih reng theih nan rel kawng hnaiha khaw mipui leh V/C, YMA, NGO ten rêla thawktute lo ṭanpuiin lo duat thiam hle se. Rel kawmg khawih chhetu tur misual leh kuthleite chu dimna nei miah lovin an phu tawk hremna pe hmiah hmiah bawk se a lawmawm ngawt ang. Kan thil ṭha neih kan vawn hima kan ven ṭhat phawt chuan India ram khawpui tin hi kan la thlun zawm zel thei dawn a ni.
Sumdawng, kut hnathawk, inhlawhfa, zirlai, sipai leh sawrkar hnathawk leh miretheite tan rel service hi malsawmna thlentu ṭangkai tak leh chhenfakawm tak a lo ni e.
- C Lalrampana