COUNCIL OF CHURCHES IN MIZORAM
October 26, 2024, 12:30 PM Inrinni chuan Mission Veng Biak Inah Council of Churches in Mizoram (CCM) rorel inkhawm a awm a, Synod Moderator Rev. R. Vanlalnghaka Chairman a ni a, BCM General Secretary Rev. R. Lalbiakliana chu Secretary a ni a, Recording Secretary chu Pu Lalruatkima, BCM Administrative Officer a ni.
CCM dintu palai ruat zat chu:
Joint Committee - 52 members
Mizoram Presbyterian Church - 170 members
Mizoram Baptist Church - 100 members
Evangelical Church of Maraland - 70 members
Evangelical Church of India - 50 members
Lairam Isua Krista Baptist Kohhran - 50 members
Isua Krista Kohhran - 20 members
Independent Church of India - 20 members
Wesleyan Methodist Church of Mizoram - 20 members
TOTAL - 552 (mi 521 an kal)
CCM Constitution leh Office Bearer leh CCM Thuthlung an lo duan lawk chu an sawi ho hnuah lungrual takin an pawm a. A tuk October 27, 2024 Pathianni chawhma inkhawmah chuan palaite leh kohhran inpumkhatna ngaisangtu mipui tam tak inkhawmte chuan CCM Thuthlung chu kan chhiar rual dual dual a ni.
CCM Thuthluing chu hei hi a ni: “Vawiin October 27, 2024 hian Aizawla Mission Veng Presbyterian Kohhran Biak Inah Mizoram Kohhran pawl hrang hrang lo kal khawmte hian inpumkhatna Krista tana chak zawka kan thawhho theih nan ‘Council of Churches in Mizoram’ chu lungrual takin kan din a, kan hawng nghal a ni. Kan Danpui siam hmang hian kohhran inpumkhatna vawng nung turte, thawkho turte leh Pathian ram leh a kohhran tana ding zel turin thu kan thlung e.”
CCM Office Bearer-te:
President : Rev. Dr. R. Lalbiakliana, BCM
Vice President : 1) Rev. B. Zazawna Lai, LILBK
2) Rev. Lalrodinpuia LS Nghaling,
IKK Bualpui (Ng)
General Secretary : Rev. Dr. Lalhmangaiha, MPC
Joint Secretary : Rev. T. Salaw, ECM
Treasurer : Upa R. Lalmalsawma, PCM
Finance Secretary : Rev. Jessai L. Neitham, EFCI
Committee Member:
MPC - 17
BCM - 10
ECM - 7
LIKBK - 5
EFCI - 5
IKK Bualpui(Ng) - 2
ICI - 2
Wesleyan Methodist - 2
October 28, 2024 Thawhṭanni 7:30 AM-ah CCM Office hawn a ni a, Synod Office ground floor veilam room hmasa ber chu CCM office atan hman a ni. General Secretary Rev. Dr. Lalhmangaiha leh Office Assistant nula fel tak R.C. Vanlalhruaii leh driver leh peon pakhat ten ni tin office hi hawngin an nghak nghal a ni.
CCM hian hmun hrang hrangah seminar neiin CCM thil tum leh a pawimawhna te an sawi ṭhin. CCM-ah hian a la tel lo kohhrante an tel theih hun nghakin an thlir reng a, Mizorama headquarters nei lote’n an hotute an rawn mek a, kohhran hrang hrangte kan tel vek theih a nghahhlelhawm ngawt mai.
CCM member-a telte tan MKHC-a tel hi a ṭul lo ve, in withdraw vek mai ni se an ti a. A ṭha khawp mai. CCM kan neih tawh avangin MPF pawh hi CCM-in la se, MPF Constitution-te pawh en ṭhain, lungrual taka MPF-a kohhran zawng zawng an tel theih nan ruahman ni se a duhawm hle. Hetia an rel hnu hian Synod Moderator chu MKHC leh MPF meeting-ah a chairman hmuh tur a la awm tho a, rilru-ah zawhna a awm fo ṭhin.
Mizorama kohhran ni pawimawhte kan inngaih pawimawhsak ṭheuh theih nan CCM hian rawtna siamin kohhran tinah ngenna ziak vek se a ṭhat hle ka ring.
Chung ni pawimawhte chu:
1. January 11 hi Mizoram kohhran zawng zawngin lungrual takin Gospel Centenary pawh kan lawm ṭheuh ni kha a ni a. Mei mit lova Kristianna kan hnam zinga bun a nih champha lungrual takin kan hmang a nih kha. Sorkar pawhin Missionary Day tiin holiday-ah a puang a, nghet takin a pawm a, kum tin calendar-ah pawh a sen vât reng mai a ni.
2. August 31, 1897 hi Welsh missionary hmasa ber Rev. DE Jones (Zosaphluia) Aizawl a luh ni, Pu Buanga leh Sap Upa ten Sairanga hmuaka Aizawl an luhpui ni a ni a. Mei mit lova tuna Presbyterian Kohhran ni ta din ni a ni. Ramthar Ni tia kan hman ṭhin hi a ṭha khawp mai.
3. March 13, 1903 hi Pu Buanga leh Sap Upa te missionary nghet ni tura Tlabung aṭanga Lunglei an luh ni a ni a. Hei hi BCM Foundation Day tia ngaih pawimawh zel ni se la.
4. Rev. R.A. Lorrain, ECM missionary ten Serkawr khua an luh ni leh mei mit lova Mara rama Kristianna bun ngheh a nih ni September 26, 1907 champha hi ngaih pawimawh zel ni bawk se.
CCM-a tel ve lote pawh tel tura sawm a, ni pawimawhte inzah tawnsak ṭheuh ni se la.
5. Roman Catholic hian December 18, 1946-ah sorkar aṭangin Catholic puithiam awm ngheh phalna an hmu a. Hemi hma February 1, 1925 khan Liancheuva te, Thangphunga te, Chalchhuana te, Lenga leh Lalbana ten Roman Catholic Kohhran an lo din tawh a ni. Eng ni ber nge an foundation day ti chiang se.
6. Salvation Army pawh din phalna an neih hmain Kawlkhuma chuan Bombay-ah 1916 khan officer training a nei a, Bombay-ah hian commission officer a nih hnuah a thawk rih a. Salvation officer a nih hnua Mizorama rawngbawl tura Aizawla a luh ni hi April 26, 1917 a ni a, hei hi Zorama Sipai Pawl Ni tia vuah a ni.
7. Mizorama 7th Day Adventist Kohhran dintu Pu Lallianzuala Sailo hian ATS, Jowai-a sikul a kal lai November 28, 1941-ah 7th Day Adventist baptisma a chang a, Mizo zinga a hmasa ber a ni. ATS-a a zir zawh hnuah Spicer Memorial College, Pune-a Mizo kal hmasa ber niin, 1944-ah a graduate a, ATS-ah zirtirtu hna a thawk nghal a. A zirlai Mizo 6 lai chu a hmin a, 7th Day baptisma an chang a. Mizo zirlai an pung zel a, zirlai 10 lai Mizoram khaw hrang hranga lehkhabu zuarin December 1945 – January 1946-ah an tir a, ṭawngkain Sabbath serh turin an sawm zel a. Pu Lallianzuala Sailo chu kum 1947-ah tirhkoh atan Mizoramah an tir chhuak a. Heng khua–Zokhawsang, Khawrihnim, Aizawl, Lungleng leh Khawchhete-ah te chuan a zirtirna pawmtu an lo pung zel a. Kum 1948-ah Zokhawsang khuaah 7th Day biak in hmasa ber an sa a, Khawchheteah te, Lunglengah te biak in an sa ve thei ta zel a ni.
7th Day missionary Mizorama lo lut hmasa ber chu Pastor Willis G. Lowry leh a nupui Helen Lowry te an ni a, December 13, 1949-ah Aizawl an lut. December ni 24 1949-ah Assistant Superintendent Captain Lalrina Sailo chuan Christmas Dinner a siam a, Aizawla mi lian ho leh Mission Sap ho a sawm vek a. Chumi ṭum chuan Superintendent S.N. Barkataki, MA, ICS chuan Helen Lowry chu officer fate leh Mission Sap fate tan sikul siam turin a sawm a. Amah ngeiin tuna 7th Day tlang hi a pe a, an indin nghet ta a ni. Foundation Day sawi tur an nei lem lo a, kum 1948 hi an din kum ti ila a sual awm lo ve.
8. Mizorama UPC din chhuaktu hi Pu Zakamlova a ni a. Harhna lo thlen khan thlarau lama an milpui deuh âwm zawmpui tur an zawng a, America-a awm Apostolic Churches hotupa General Bishop Blankenship chu lehkha an thawn a. Blankenship chuan India ram Bhagalpur (UP)-a awm Telie Dover chu Aizawla kal turin a rawn tir a. Aizawlah Telie Dover-a chuan Pu Zakamlova chu Januray 26, 1949-ah Isua hmingin baptisma a chantir a. Kohhran lian zawk UPC zawm tura a râwn avangin Lungleng khua Pu Thangsavunga inah kal khawmin, March 12, 1949-ah UPC zawm an rel tlu a. Chung ho ngaihsak tur chuan Dover-a râwn angin America UPC chuan missionary atan Rev. Ellis Luther Scism an rawn tir a, Aizawla a luh ni February 18, 1950 chu Mizoram UPC Kohhran din ni-ah an pawm ta a ni.
- Prof. JV Hluna