MPSC hna laknaa Mizo engineer graduate-te (BE/B.TECH) harsatna

Mizoram sawrkar hnuaia thawk tur (PHE, PWD, P&E, Transport adt.) MPSC hnuaia lak ṭhinah Mizo engineer graduate-te’n a hnuaia mi ang hian harsatna an tawk chho mawlh mawlh mai a ni.

1. Kum kal ta lamah P&E hnuaia junior engineer (JE) lakna turah graduate (HSSLC + BTech/BE) exam phalsak an ni lo. (Diploma nei chiah an phalsak).

Thiamna ngai: HSLC with 3 years Diploma in Electric/Electronic/Mechanical Engineering

Hnawl chhan: ‘At least’ emaw, ‘and above’ emaw a awm loh vang.

Thil mak: Diploma hi HSSLC level a ni a, diploma zo tawhin BE/B.Tech an zir thei (Recruitment Rules hi 2003 kuma mi a ni).

2014-2015 kumah Recruitment Rules inang chiah hmangin BE/B.Tech hi MPSC kaltlangin lak an lo ni tawh.

2. Kum kal ta vêk khan PWD hnuaiah JE (Civil) hna ruak a awm a, hetah pawh degree nei hnâwl vek an ni.

3. Kumin 2025 MPSC Advertisement no. 14-a MVI (Motor Vehicle Inspector)-ah pawh graduate-te hnâwla diploma holder chauh lak tumna anga awm hi a mak hle (Recruitment Rules 2006).

Thil mak: 2014-ah khan MVI-ah hian graduate an lo tling tawh a, Recruitment Rules a inang chiah. A chunga kan tarlan bak pawh khi a dang sawi tur a awm nual.

A nghawng: Kum 2003 P&E Recruitment Rules-a thiamna ngai hi minimum qualification a ni tih 2014-2015 hna lak khan a tichiang a; 2006 MVI Recruitment Rules pawh hi 2014 MVI hna lak khan minimum a ni tih a tichiang bawk. Chuti ni lova graduate engineer an hnawl zel chuan zirlai an tibeidawng nasa lutuk. MPSC hian a hrethiam duh lo lui em ni?

BE/B.Tech hi a theihna apiangah chuan danchah (block) vek an ni a, Mizoram sawrkar hian a hmusit hle niin a lang. Hetiang renga a kal chuan Mizo zirlaite zingah mahni intihlum (suicide) mai an awm ang tih pawh a hlauhawm a ni.

BE/B.Tech an hnawl zel dawn chuan Mizoram Engineering College, Pukpui te pawh saw eng atan mah ṭangkaina a nei dawn lo a, NIT, Mizoram kan neih pawh hi eng atan mah kan ti lo tihna a ni.

Rawtna: Mizoram sawrkar hian department hrang hrang Recruitment Rules hlui leh tunlai tawh lo tam tak hi a ennawntu (study team emaw a dang emaw) a rang thei ang berin siam se, thlak danglam ngai chu thlak vat vat se la a duhawm hle.

- Hruaia Vuite