Celebration leh Mizote

Mizo ṭawnga dah lovin, 'Celebration' tih ka han hmang a, min lo hrethiam mai teh u. Mizote hi eng eng emaw cham/champhaphak lawm leh hman (hmang) uar pawl tak kan ni awm e. A khât tawkin kohhran, khua, pawl ten kum 25-na, 40-na, 50-na, 60-na, 75-na, 100-na lawm thu chhiar tur a awm deuh reng mai a ni ber e. Heng kum leh hunbi te lawmna neih hi a ṭha, lehkhabu souvenir hrang hrangte kan siam hi a ṭhat lehzualna chu a ni. Hun kal tawha thil pawimawh chhinchhiahna (document) ṭha tak a ni.

Mizote hi huau huau lawm, ruaiṭheh nuam timi kan nih avangin heng hunbi silver, golden, diamond, centenary kohhran, khua leh pawl ten kan lawmnaah hian a kipui ber chu ruaiṭheh hi ni berin a lang. Pawisa kan hman tamna ber a ni a, kan hlimpui ber pawh niin a lang a, kan la ti zel ang. Chutih lain, kan ram dinhmun (economics) leh hun te, ni tin khawsakna lama dinhmun inang lo tak tak kan lo nih tak dan te, ni tin inhlawha eizawngte dinhmunte thlirin ngaihtuahna thar kan neih hi a hun ta hlein a lang. A bikin hetiang hunah te leh kohhran hunpui kan hmannaah te thlengin.

Nikum kha ni tain ka hria, Nagaland khaw pakhatah Kristian an nih kum 100-na an lawm thu Vanglaini chanchinbuah ka chhiar a. Chuta ka mit latu chu 'Hriat rengna atan thing ṭiak (a rah ei chi) 7,000 phun an tum’ tih kha a ni. Naga ho hi keini aiin an tam a, mahse, kan ngaisang bik hran lo niin a lang. Chutih lain, an centenary lawm dan kawng khat hi chu Mizoram kohhrante tan entawn tur a awmin ka hria; keini ruaiṭheh mup mup ngawt ai chuan a 'standard' deuh hlekin ka hria.

Cospel Centenary kan lawm khan kohhran pakhat chuan thing, mau, ramsa leh nungchate laka rilru put dan tur lam thuthlung (Centenary Covenant) a siam niin ka hria a, a ṭha viau. Chutih laiin, tun thleng hian kohhran mal leh pawl anga champha lawmna programme hrang hrang thawm kan hriat ṭhinahte hian ram leh hnam leh mi rethei leh chanhai zawkte tana chanchin ṭha a tel rih ngai lem lo chu a ni.

Kumin kum bul lam deuh khan Aizawla kohhran pakhat pastor bial silver lubilee lawmna program-ah ka tel ve a, ruai kan ṭheh mup mup a, chutih laiin jubilee lawmna peng pakhat atan hospital poor fund leh charity fund atan pawisa ṭhahnem fe an pe a ni. An ti ṭhain Bible-a jubilee hun hman dan tur kan hmuh nen pawh a inmil hle. Tun hnai deuh bawk khan MZU silver jubilee lawm thu kan chhiar a, a lawmna chi khat atan thing eng emaw zat an phun ni awmin ka hria, kan rama zirna hmunpui leh sang ber a ni bawk a, an tih awm tak niin ka hria.

Kristian kan ni a, kan thurin Bible lamin engtin nge min zirtir tih lam aṭangin lo inthlir ve leh thung ila. Kan hre tlangpui a, a tawi zawngin, kan Bible-ah jubilee hrang hrang kan hmu a. Jubilee hman dan tur a sawi zinga langsar deuhte chu bawih chhuah, ram lei a neitu ngaiin neih let, mi rethei chanhai te khawngaih lam te a ni. Jublilee lawm kan uar viau laiin Bible-in a sawi lam erawh chu kan ngaihtuah lem lo niin a lang. Juda hote tan bikah kan ngai deuh a nih pawhin, Bible eng aṭanga nachang hre awm tak chu kan ni. Kohhran leh pawl ṭhenkhat ti ṭha tak takte an lo awm a, ka lo hre lo mai mai zawk.

Titi chhunzawm ta zel ila. Hei fûr khua a lo ni a, khawpui leh thingtlangah kamding ve lo chhungkua, ṭhenkhat ni tin inhlawha ei zawng, khawpuiah phei chuan mi in luah tam tak kan awm tih kan hre ṭheuh va. Mi hausa leh khawsa thei deuhte chuan kan lawipui kohhran member leh veng khata kan chenpui chhungkaw harsa zawk ten harsatna an lo tawk em tihte ngaihtuah a ṭha hle ang.

Tunlai hian kohhran kan chak hle a, mission field tlawh, work camp leh intlawh tawn te kan uar a, inpawlhona (fellowship) changkang tak tak kan nei ṭhin, a ṭha hle zel. Hetih lai hian, Lal Isua’n hun tawp rorel huna a dinglama mite leh veilama mite hnena a sawi, "Heng mi tê berte chunga in tih chu ka chunga ti in ni,” a tih leh, “Heng mi tê berte chunga in tih lo chu ka chunga ti lo in ni,” a tih kha kan hriat thar leh a ṭul hle awm e.

Hetih lai hian, kohhran damdawi in awmna bill pe thei lo tam tak peksak thawmte pawh kan hre bawk a, a ropui hle. Kohhran mite hian Lal Isua’n min tirhna chanchin ṭha hril kan ngaih pawimawh rual hian, a ngaih pawimawh leh zirtir tho, "Nang pawh chu ang bawk chuan va ti ve rawh," a tih hi hre thar ṭhin ang u.

- Rev. Lalbiaksanga Chinzah