I fai ang u

Fai hi a pawimawh a, hmasawnnain a ken tel pawh a ni. Kan hriselna atan a pawimawh bakah, kan zahawmna keng teltu a ni bawk.

Mizoramah pawh faina lam inzirtirna pawh kan uar chho hle. Mahse, kan inzirtir tam ang aiin hmasawnna erawh chuan beisei a la pha lo viau. Mi tinin mahni mawhphurhna ṭheuhah kan la lak loh vang pawh a ni ve thei ang.

Faina tak tak nei tur chuan mahni taksa, in leh a chhehvel vawn fai piah lamah, vantlang leh khawtlang thlenga kan kalpui tel a ngai. Bawlhhlawh then fai ringawt hi faina tluantling a ni lem lo a, a hnawk avanga paih ringawt a tawk lo. A paihna hmun dik takah bawlhhlawh paih a nih leh nih loh te, kan thlî leh hnawmhnawkin mi dang harsatna a thlen em tihte pawh kan chhût tel a ngai. Kan in leh a chhehvel tifai ringawt a, a piah lam faina kan ngaih pawimawh leh si lo chuan kan faina teh dan pawh kan inennawn a ngai awm e. Hmel fai vur siin belhchian kan lo dâwl lo hle ang tih a hlauhawm alawm.

Ram changkang apiangah faina an ngai pawimawh a, zirtirna pawh an uar a, an zawm ṭha bawk. Fai hi hriselna leh dam reina atan pawh a pawimawh a, khawi hmun pawh a fai chuan hmuh a nuamin rilru a tithawveng a. A nawm bakah, rilru lam thlengin a tihrisel a ni. Kan khawtlang faina tur chu mi dang kuta dah mai chi a ni lo a, mi tinin kan mawhphurhna ṭheuha kan ngaiha chhungkua aṭanga kan inzirtir ngun a, naupangte rilrua kan tuh nghehsak a ngai a ni.

Fai tur chuan kan taimak a ngai a, faina pawimawhzia kan inzirtir hi taima tura kan inzirtirna a ni tel nghal a ni. Kan chhehvela hnawmhnawk leh bâl kan hmuhte hian kan mi tikham hma se la, a tifaitu nih hreh lo ila. A thawktu leh tifaitu nih bika kan inhriat a, kan hreh tlat chuan kan fai thei dawn lo. Kan hmunhma, ni tina kan khawsakna leh kan hmuh ṭhinte hi an fai chuan a nuam ti bertu tur chu keimahni tho kan ni leh dawn a ni. Kan zavaiin faina tluantling hi ngai pawimawh ṭheuh ila, taksa leh rilru lamah kan lo hrisel phah sawt dawn bawk si.

- Lungen Mami