Ding leh vei bo tawnin

Zosapthara hlaah ‘ding leh vei botawnin’ tih thu kan hmu a. Hei hian a bikin khawthlang lama political ideologies pahnih left-wing leh right-wing tih hi min hriat chhuahtir fo bakah tunlai khawvel politics ke chheh buai vel dan min ngaihtuahtir a, kan bih thuak thuak dawn a ni.

Left-right politics: Politics chungchang thuziak kan chhiara lo lang tel ve sek ṭhin chu left-wing leh right-wing tih hi a ni. Left wing leh right wing politics inan lohna bulpui ber chu mimal dikna chanvo leh sorkar thuneihna chungchang an ngaihdanah a ni a tih theih awm e. Left-wing politics hian khawtlang inrelbawl danah leh eibar zawnna lamah sorkar mawhphurhna leh inrawlhna tih tam hi khawtlang tan a ṭha an ti a. Chutih laiin right-wing politics chuan khawtlang nun peng tinrengah mimal dikna chanvo leh mipui zalenna dah pawimawh ber a, sorkar mawhphurhna leh inrawlhna a tam thei ang bera tihtlem hi khawtlang tan a ṭha an ti thung.

Left-wing hian tihdan thar an dap nasain inthlakthleng an inhuam a. Hmalam hun thlirin mi rethei leh chenbeh deuhte chhawmdawl hna an ngai pawimawh a. Thil ṭha thei ang ber duhthusam ṭhin mi (idealist) an ni a, intluktlanna an tuipui hle. UK bikah chuan Labour Party (tuna eptu party ni mek) leh Green Party-te hi left-wing parties an ni deuh bik. Hmeichhia, hnam tlem zawk (ethnic minority) leh neih inang inkawp (gay) ho inthleidanna leh rahbehna laka humhimna lam an uar hle. Sumdawnna chungchangah sorkarin khuahkhirhna siama a enkawl hi mi tin tan ṭhattlanna niin an ngai a, chhiah (tax) pawh milian hnen ata tam tak lak a, miretheite chhawmdawl nana hman ṭhain an hria. Sorkar sum seng pawha thilsiam leh khuarel enkawl hna (environmental care) lama hmalak an uar hle.

Right-wing hian tihdan phung pang-ngai (tradition) vawn him an thupui a. Intluktlanna (equality) aiin leilung dan pangngai (equity) anga a tling leh tlak apiang dinchanna (survival of the fittest) an dah lal zawk. Sumdawnna zalenah rinna an nghat a, sumdawnna chungchanga sorkar inrawlh leh khuahkhirhna hi ṭul an ti lo. Midang tute emaw hriselna leh zirna senso chu midang daih tumtir leh pektir tur niin an hre lo.

UK ram chhung bik enin Right wing party deuhte chu tuna sorkarna chelh mek Conservative (Tory) Party leh EU aṭanga UK lak hran duhtu pawl UKIP party te an ni. Right wing-ho hian sum i lak luh tam poh leh i khawl tam ang a, i tan zirna tha leh hriselna lama inenkawlna ṭha i inngaihtuah mai tur a ni an ti deuh ber. Sorkarin sumdawnnaa inrawlh leh khuahkhirh an duh lova, sumdawngten sum an deh chhuah tam poh leh ram tan hlawkna a tam ting niah an ngai. Kum 2008 khan Tory MP hmun thuma ṭhen hmun hnihin sik leh sa (climate change) buaipui hi ṭul an ti lo.

Hei hi a tlangpui thua left leh right politics ngaihdan danglamna a ni. He ngaihdan pahnih danglamna hi kum 1960 chho velah kha chuan a la lian hle a. Amaherawhchu, thil tam takah hetianga ngaihdan ṭhenhran tak tak theih lohna a tam viau tho. Entirnan, climate change hi tunah chuan left leh right wing-a miten angkhat rengin an ngaihsak a, danglamna an nei lem lo. Economic policy-ah pawh ngaihdan an inṭawm nasa ta khawp mai. Chuvangin, he left vs right politics then dan hi tunlai hun nen inmil tawh lo nia ngai an awm nual tawh a. Amawherawhchu, a tlangpui thua politics ngaihdan han sawi fiah nan he ding leh vei inṭhen dan hi hman a la ni reng tho a, politics zirna leh literature huang aṭang chuan paih bo mai theih a ni tawh lo vang.

Politics inṭhen dan thar

June 23 khan UK mipuite chuan EU aṭanga chhuak turin an vote thlu ta kha a ni a. Kha Brexit khan tun hnu kum 50 vel thleng nghawng thei tur politics inṭhen dan thar a awm mek a ni tih a tilang chiang hle. Khami ṭuma vote thlak dan enin EU chhuahsan a, UK chhunga ram dang mi lak luh duh lotute kha lehkhathiam lo, kum upa lam, mingo, hna hniam thawktute, leh rethei deuhte an ni. EU-a la awm reng duhtute erawh chu college zirlai te, kum naupang deuh te, hnam chawm deuhte leh hausa deuhte an ni. Hei hian left leh right ngaihdan lam a hawi lo hle a, ram dang mi huphurhna leh mithiam leh thiltithei mi tlemte dodalna rah chhuah a ni deuh ber zawk.

He inṭhen dan thar awmtirtu bulpui ber chu globalization leh technology hi a ni. Globalization leh technology hian hmasawnna nasa tak a rawn thlen laiin a lehlamah chuan kehchhiatna nasa tak a thlen ve bawk. Globalization avangin tunlai khawvel chu ‘pem khawvel’ (world of immigrants) tih theih hialin a awm a. A lo mikhualtute zinga rethei leh harsa ve deuh te, lehkha thiam lo leh mahni ram leh hnam humhalh bing duh pawlten mikhual cham hlen tura pemlutte an lo lawm hlei thei lo va. Hnam inthliarna pawh hmun tam takah a hluar thar phah hle a ni.

Ei bar zawnna leh sumdawnna lamah ni se technology changkanna hian mi tlem te, mi thiam bik leh thiltithei deuhte kutah hna zawng zawng a chhungkhawm a, mi nawlpuiin an hna leh chanvo an hloh phah mek a ni. Chumi avanga lungawi lo mi tam tak an awm mek bawk. Chuvangin, politics leh business-a a fawng vuantu leh a bu lum luah pha chin mi tlemte thuneihna leh thiltih-theihna dodalna a lo lian lo thei ta lo a ni.

Chutiang chuan, mi ṭhenkhat globali-zation leh technology par tlana an hlawka an hlim em em laiin a ṭhen hlawkpui ve lo, chhiatpui zawk an awm avangin politics ngaihdanah pawh an inṭhen ta phawk mai a. Open politics leh closed politics tiin group thar pahnih a lo chhuak ta a ni. Ngaihdan inhawng (open) leh inkharkhip (closed) duh pawl hi party pakhat chhungah pawh an awm kawp hlawm avangin political party lian tak takte pawh an khik phah rem rum mai a. USA president ni mai tur, Donald Trump-a party Republican Party chhunga ngaihdan inṭhen phawk khawpa harsatna lian tak awm mek hi entirna ṭha tak a ni awm e.

Populism thli a tleh

Tunlai khawthlang politics khelmuala left wing leh right wing-a mite hrut ruala hnuk khawm mektu leh thawm nei na ber ni mek chu populism hi a ni. Populism tih chu politics leh business chungchanga a fawng vuantu mithiam leh thiltithei bik mi tlemte (elites) ho rinhlelhna leh dodalna a ni ti ila a sual awm lo ve.

Populism chu a thleng tlawr tlang vuan chin mi tlem zawk (elites) dodal a, mipui nawlpui chanvo dah pawimawh leh mipui kuta thuneihna dah let tura hma latute politics ngaihdan/ thurin (political doctrine) hi a ni kan ti thei bawk ang. Populist-te chuan ngaihthaha awm mek ‘mi naran leh satliah’-te tan aw an chhuah niin an inngai a, ram leh hnam hmangaihtu dik takah a inchhal ve mek a ni.

Donald Trump hi he populism huanga mi, tuna kan hmelhriat lar tak chu a ni awm e. The Wall Street Journal (April 2016)-ah “Hamṭhatna leh thuneihna hui fai vektu (elites), kut ṭang thliah tham lek mi tlemte enkawlna hnuaia khawvel tlu chhe mek tun din leh siamṭhatna atana kawng awm chhun chu huaisen taka mipui duhna (popular will) tun din hi a ni” tiin a ziak nghe nghe a ni. Tuna khawthlang ram politics inlumlet vela populism hmel lan fiahna ber chu Donald Trump hi a ni kan ti thei ang.

A tlangpuiin populism hi eptu pawl (opposition movement) angin a awm ber a, tunlai hian khawvel hmun tina mipuite rilru latu leh ngaihven hlawh ber pawl a ni mek. Foreign Affair chanchinbu (November/ December 2016 issue)-in populism ṭhang duang mek chungchangah politics lama mithiam bikte ngaihdan a la khawm a, “Tuna khawthlang democracy ram changkanga populist ṭhanharhna awm mek hi tun hnu kum sawm chhungin a nasat zual i ring em?” tiin. An chhan dan result chu: Ring em em 6, Ring 18, Neutral 2 leh Ring lo 0 a ni.

Populism vuantuteah hi chuan left-right politics-in awmzia a nei meuh tawh lo va, open-closed politics inṭhen dan hian a kaihruai thui zawk niin a lang. Mipui tam zawkin ram leh khawtlang inrelbawl danin anmahni ngaihthah a, mi bik mi tlem te (elites) kuta hamṭhatna zawng zawng awm anga an hriat chhung chuan an chanvo tur an sual reng ang a, thuneihna chelh mektute an dodalin ram dang mi huphurhna pawh a lian chho zel ang. Chu chuan inhawng taka politics kalpui aiin mahni ram leh hnam inhung bik duhna an tuipui ang a, indaidanna bang sak belh zel pawh an pawisa dawn lo tihna a ni. June 23-a Brexit pawh kha hemi nghawng chhuah, populism hlawhtlinna hi a ni reng a ni. Chu chu mithiam leh thiltithei, thuneihna leh hamṭhatna par tlan pha chin chuan an duh lo hle a, Brexit leh Donald Trump pawh hi mithiamte enkawl khawvel chanchinbu leh news channel-te chuan an do rawn nasa hle a nih hi.

US president thlannaah Donald Trump thlan tlin a ni ta si a, tunlai khawvela populism hnehna langsar tak vawi hnihna (a vawikhatna chu Brexit) a ni ta a ni. Donald Trump hi tling ta lo pawh ni se populism hi chu a vung chho tial tial tho dawn niin a lang. He thu hi sawiin political scientist Justin Gest-a chuan, “Trump-a aiin Trumpism hi a dam rei zawk ang” (Trumpism would outlast Trump) a ti nghe nghe a ni.

Globalization, technology leh free market-in a chawm leh chhawm nun, tunlai politics ngaihdan leh kalphung ṭha ber leh rintlak bera kan neih mek liberal democracy hian he populism thlipui tleh mek hi eng tin tak hau reh thei ang maw le? Nge, khawvel politics hian kawng dik leh
ṭha ber tia chhal tur nei lovin ding leh vei bo tawnin ke a pen zel zawk dawn em ni?

- LalṬhuamliana

References:

1. The New Divide in the Western World by Fareed Zakaria

2. http://idontgetpolitics.co.uk/...

3. ForeignAffairs.comtomorrow