Ran vulhtute hriat atan thu pathum

Tun hnaiah Mizoramah ran vulh kan intihhmuh thar leh a, kan vulh chhan erawh inang lo tak a ni. Mi ṭhahnem takin mahni intunnunna atan ran an vulh a, eizawnna atan an hmang.

Ṭhenkhat erawh chuan mahni intihhlimna atan ran an vulh a, ui chi hrang hrang an chah lut a, ar sual huai an chah lut bawk.

1. Ran in i sakin i ran in awmna chu i chenna in aiin i ṭhenawmte in hnaih zawkin sa ngai suh, a mawi lo. Mizote hian dan naranin huan mawngah vawk in sak maite kan ching a, ar inte pawh kan in hnaih lohlai khawi emaw kilkhawr deuhte kan thlang. Hengte hi kan ngaihtuah chian chuan ṭhenawmte ramri hnai a ni duh a, i ran vulhna in i sak dan mai mai avang khan i Pathian thu sawite an awih loh phah palh ang e; ran vulhna hmunhma thlan fimkhur a ngai.

2. Ran i vulh a, talh atan a ni emaw, hralh atan a ni emaw, fa anga ran en chi i ni emaw, ran chu ran angin vulh ang che. Ui chu a awm duhna tur hmun, ui awmna tur tawkah dah la a ṭha a, ar sual huai a nih vangin fapa duatin duat kher suh, ar a nih kha hre reng rawh. Ran chu mihring anga duat theih an nih pawhin mihring anga enkawl chi an ni lo.

3. I ui vulh kha, a fel a, tumah a seh ngai lo a nih pawhin mikhual inleng tan chuan a hlauhawm viau tho. Heng hi hre lovin, “Kan ui chu a fel lutuk, tumah a seh ngai lo,” ti lo la, a seh ngai emaw seh ngai lo emaw ui hlau chi tan chuan a hlauhawm reng tho. A zun leh ek hi a vulhtu chu a chen chilhtu nih vangin a rim hi ngaiah kan nei thei a, midang tan chuan ran zun leh ek chu rimchhe tak a ni. Ui changkang leh manto tak, rimchhe tak neih theih a ni, i inveng ang u khai.

- Robert Hnamte