Sorkar sikula zirtir indaihlo reng hi!
Sorkar sikul, a bikin thingtlang lamah zirtirtu indaihlohna a nasa em em a, zirtirtu siksawi ringawt pawh thil harsa tak a ni. A thlaktu awm loa zirtirtu sawn chhuah phei chu khawtlangin a do a, lungawi lohna lantirin nawrhte, indan te a thleng thin a nih hi.
Sorkarin in zirnain hma a sawn theih nan sum tak tak a seng reng a, zirtirtu hlawh pawh private sikulte ngaihtuah chuan ṭha tak a ni. Amaherawh chu heti khawpa tam sum seng chung hian kan sorkar sikulte ṭha hi a vang khawp mai. A hming maia veng chhunga sikul awm, zirlai 100 em pawh nei tling lo hi Aizawlah phei chuan an awm nual mai. Hengah te hian zirtirtu eng emaw zat in dah a ngai ve reng tho si. Zirtirtute lahin thingtlanga awm aiin khawpuia lama awm an lo duh zawk vek bawk si. Khawpuia insawn luh tir tumin hmelhriat nei ṭha deuhte chuan Minister leh sorkar hotute an nawr reng ve bawk a. Heng karah hian Education Minister leh department hotute tan pawh ro rel thiam a har thin khawp ang le.
Zirna ṭha hi a pawimawhzia chu sawi ngai loin tupawhin kan hre tlang vek a, ram changkang apiangin damdawiin leh zirna changtlung an nei zel a, heihi tehna fung pawimawh tak pawh a ni. Hei vang hian zirna hi ngaihthah chi a lo a, sorkar pawhin a ngaihpawimawh a ni reng tur a ni.
Chutih rualin zirtirtu indaih lohna a nasa em em, sorkar sikul zawng zawnga zirtirtu indaih vek tur chuan sorkar hian zirtirtu eng emaw zat a lak belh a ngai dawn a, sum tam tak a ngai. Keini ang ram rethei tan phei chuan thil harsa tak a ni ang. Chutiang karah chuan engtin nge hma kan sawn tak ang?
Aizawla veng tin deuh thawa sorkar sikul awm, zirlai tlem te te awmte hi pawh khawm dan awm se, veng pahnih pathumin sikul pakhat inṭawm thei ta se, zirlai pawh an tam zawk ang a, zirtirtu pawh an indaih zawk ngei ang. Veng enkawltu LC-te leh veng mipui pawhin kan veng ah sikul awm ngei ngei rawh se tih chiah ngaihtuah loin, ram anga hmasawnna tur thlirin rilru zau tak put theih nise a duhawm ngawt ang. Sikul awm lohna vengah sikul hmun ah veng mipui tana ṭangkaitur siam turin sorkar pawhin hma te la se, mipui vuivai tur pawh nasa takin a tidai thei ang. Aizawl angah te phei chuan inhnai te tea khawsa kan ni a, veng 2/3 in sikul inṭawm ta se, zirlai naupang tan pawh kea kal phakna vek tur a ni.
Hetiang ang hian sorkarin huaisen takin hma han la thei se chuan, nasa takin zirtirtu indaihlohna hi a phuhruk theih ngei a rinawm. Sorkar pawhin sum tam tak a hum thei ngei anga, chung sum te chu thingtlang sikul tih changtlun nante, zirtirtu quarter saknan te hman ni thei se a duhawm hle ang. Zirtirtu indaih lohna nasa lutuk pawh hian a zia phah ngei ang. Sorkar sikul zirtirtuah hian diltu tam tak zingah a thiam ber lak ṭhin a ni a, inrelbawlna fel tak awm se private sikul te aia an ṭhat loh bikna tur a awmin a rinawm loh.
- Rinpuii Fanai