COUNCIL OF CHURCHES IN MIZORAM Part-II

CCM chuan kohhran inpumkhatna vawng nung tur te, Krista tana chak zawk a thawk ho turtein an intiam a. Kohhran inpumkhatna atan chuan January 11, Missionary ni serh ho dial dial te, August 31 Presbyterian din nia hman te, March 13 BCM din nia hman te, September 26 ECM Foundation Day te inzah tawnsak a pawimawh thu Part I-ah khan kan sawi tawh a. Heng bak pawh hi Mizoram chhungah inpumkhatna atana tih awm pawimawh tak tak a la awm thluah mai.

1) Synod inkhawmpuiah BCM palai pahnih tal kal se, Inrinni zan hun pek leh BCM zaipawl zai ngei tura tih ni bawk se. BCM General Assembly-ah Synod palai pahnih tal kal se, Inrinni zanah Synod palai thusawina hun pek ni se, Synod Choir zaitir ni bawk se.

2) Zoram chhungah kohhran kan din thar zel a, tu tan maha hnawk leh ngaihmawhawm zawnga hmalak loh ni se la, beram inruksak emaw, thianghlimna dan kan neihte ngai pawimawh tlang ila, puih ngaihna laiah inpuih tawn zel ṭhin ni se.

3) Zing ṭawngṭai inkhawmte hi kan nei ṭheuh va, inṭawngṭaisak tawn hi hreh lo ila. Entir nan: ATC tana kan ṭawngṭai ni-ah chuan AICS telh ila, zirlai leh faculty lam pawh inchhawr pawlh vek ila. Thawhhona leh zirhona aṭang hian inṭhian ṭhatna a awm ṭhin. Chutiangin, Missionary Training College ṭha tak kan neihahte inkalpawlh vek ila. Masihi Sangati Kendra, Bawngkawnte pawh hi hmang ho vek ila. Synod Hospital leh John Williams Hospital tana kan ṭawngṭai ni chuan Serkawn Christian Hospital tan pawh ṭawngṭai ila. Chutiangin BCM pawhin ti se. Kan nursing college-ah te hian kohhran dang dang, faculty leh zirlaiah tam tak inpawlh se la, inunauna chu a siam ngei ngei ang.

Zoram pawn

Zoram Pawn Mizo Kohhran (ZPMK) hi Presbyterian leh Baptist (BCM) kan inṭhen bul inṭanna a ni tih kan hria a. Shillong-ah chuan kan ti tawh na sa sa, ngaiah neih mai ni thei se, Guwahati-ah pawh Presbyterian chuan kohhran kan dinna a rei ta viau mai.

(a) Tunah hian India ram khawpui lian–Bangalore, Kolkata, New Delhi, Dehradun, Mumbai, Hyderabad, Pune leh Goa-ah te pastor dahin Mizo Presbyterian Church kan din leh ta khup mai. Church court pangngai, dan zawh kim, inneih, baptisma chan, inphuar leh lak luh thlengin kan ti thei a. A tir chuan Delhi Mizo Kohhran te, Bangalore Mizo Kohhran te leh adt chuan an ngaimawh hle. Zawi zawiin Mizo PCI chuan a ei ral a, Presbyterian mi lak hranna a ang thei tlat; a ṭhatna lai tam tak a awm rualin Mizo Kristian inpumkhatna a tichhe thei tlat a ni.

CCM bawk hian India ram khawpuia Mizo kohhran dinnaah hian bân an phar a ngai ka ti. Presbyterian pastor awmna khuaah chuan Mizo Kristian zawng zawng leng turin, BCM p[astor awmna khawpuiah chuan Mizo Kristian zawng zawng lawi theihna turin anmahni kohhran headquarters ve ve ten thuneihna pe se la. Pastor tirtu kohhranah khan an thawhlawm kal vek se la, an pastor khan kohhran pawl dang tih dan a tih vek theihna training tawitê pek ni bawk se la. BCM-in an pastor an dahna khawpuia Presbyterian member-te chuan ‘Kan pastor’ tiin lungawi takin chu kohhranah chuan lawi mai se. A khua a lian a, Mizo an tam a, kohhran pahnih din a ngai a nih pawhin a neitu ngai khan din leh mai se. Khawpui pakhatah inawm thuah lo ila. Lo awm laklawh tawhna aṭang pawhin CCM-in an rel chuan thuhnuairawlh takin in withdraw mai ni se. Kohhran mipui pawhin CCM rel chu pawm turin inkau vek thei ila. Hetiang hi kan rel ran loh chuan phai lam aṭang bawkin inghirnghona a chhuak ang tih a hlauhawm a, inven theih a ni ang. Kan inpawm tawn a ngai a nih ber chu.

(b) Zoram pawna kan mission field pawh hi rel fel a ngai hle. Field secretary kan tihte hi chu khawpuia awm a ngaih avangin kohhran hrang field secretary pawh ni se, khawpui khata awm a ṭul thei e. Anni pawh an awmna khawpui pastor kohhranah khan an lawi ve mai ang a, kohhran member an ni ve phawt mai tur a ni ang chu. Field area erawh chu an inthuah loh nan insem thei se. Chuti lo chu insengso vak si hian Lalpa ram kan zauh thei lo mai thei a ni.

Zoram chhung bawk lut leh ang

Remna leh muanna zawn kawnga hna thawk turin ZKHC/MKHC kan din a, an ṭangkai tak meuh a ni. Peace Accord sign a nih hnu hian church union ang hawiin an inher a, sorkar thu pawimawh rawntu leh committee pawimawh member-ah te an tel chho ta zel a, sorkar pawhin a ngai pawimawh a, a lawmawm khawp mai. Heti a nih chuan engati nge an danpui (constitution)-te her rem a zahawm taka an kal zel mai loh ang. Kohhran zawng zawng an tel a ni mai si a. Pawl lian tak, chak tak awm mek her rema ring nghal mai lovin CCM kan han din leh a; MKHC-a member an tel kim si lo, kohhran tel an tlem zawk a, Synod Moderator chu an meeting-ah a la chairman tho bawk si. CCM din chu eng nge a ṭulna ni le? He zawhna hi ka rilruah a awm reng ṭhin. Tu nge min chhang ang aw!

A nih leh CCM kan tih hnu hian engati nge MKHC-a kan member-te hi an tel ve nghal mai loh? A danglam viau em ni? MKHC-a an tel khan an hotu (Zoram pawn lama mi)-te phalna an la em ni le? MKHC-a tel an phal a nih chuan CCM-a tel an phal leh si lo em ni? Eng nge a chhan ni ang le? Mizo inpumkhatna – insuihkhawmna kan tih mek lai hian kohhranah hian inṭhen lo hram teh ang u.

Zoram pawn aṭanga refugee lo lutte pawhin an kohhran leh an NGO te a hrana din lovin, an chenna veng kohhranah lawi mai se, an awmna veng YMA member-ah inpe se, Zoṭawng zir bawk se. An lo ṭawng pai deuh a nih pawhin an sawi kan hriat theih phawt chuan a ṭha a ni mai, an pai lo chhawm thuai ang. Political party tu mahin (undue advantage) indemna dap lovin inpui tawn ila, infinchhuah zel zawk ang u. MPF pawh MKHC in a lak chuan a la tel lo kohhrante pawhin tel an hnial lo va, CCM hian la ta se tel an hnial lo zel ang em le. MPF hi i keipui sahauh rûn lo teh ang u. Kan tel kim theihna tur, kan inthlan a thianghlim zel theihna tur chuan a constitution siamṭhat pawh i phal teh ang u.

Mizoram hi kan ram a ni a,

Mizo hi kan hnam hming a ni a,

Mizo ṭawng hi kan ṭawng a ni a,

Kristian hi kan sakhua a ni.

-Prof. JV Hluna