Zirtirtute thurel leh zirlai naupangte chanvo sawi zauna
The Aizawl Post July 4, 2025 phek hma lamah khan Mizoram Teachers' Federation (MTF) thu relte zinga 9 tan lan a ni a, chungte chu:
1. Sawrkar enkawl school-te Sawrkarin thuam ṭhain ngaihtuah lehzual rawh se.
2. Headmaster leh teacher Selection Grade-a kum 10 awm tling tawhte tan Upgradation/Special Grade siam ni rawh se.
3. Academic Session hi January-December-in kal leh ni rawh se.
4. Sawrkar school ram tun aia nasa leh zualin humhalh ni rawh se.
5. Sawrkar enkawl school-a commin uniform hman mêk hi school-in an duh anga kalpui leh ni rawh se.
6. Zirtirtu post ruak tam lutuk hi rang takin Sawrkarin hnawh khat zel rawh se.
7. MTF hian Mizoram pum huapin ruihhlo do turin hna la rawh se
8. School Education Deptt-a officer entry grade atana circle education officer lak hi tih tawp ni tawh rawh se.
9. Sawrkar enkawl school-a thawktuten ṭhahnem ngai lehzualin zirtir ṭheuh ni rawh se.
Khing ro relte khi a ṭha hlawm khawp maia, a theih chen chen chu Sawrkar hian ngaihtuahsak se ka ti hle mai; chutih laiin an thu rel zinga an tih tur leh mawh phurhna hlawm lian ber, an FILE (main duties & responsibulities) 'naupang zirtirna lam' an thu rel zinga a hmasa bera dah lova a tawp bera an chantir erawh hi chuan ngaihtuahna a ti thui deuh: "Thinlunga khat liam chu kain a sawi chhuak ṭhin a ni si a ṭhin," (Mathaia 13.34; Luka 6.45)" tia Lal Isua thu sawi ngaihtuah phei chuan thinlung taka a bing (intensively)-a zirlai naupangte hma sawnna (zirtirna) ngaihtuahna lam aia thil dang dah hmasa zawk anga puh palh theih an ni an ni maithei; The Aizawl Post hian an thu rel indawt dan ni lovin a rem thla zawk nge tih erawh chu keini ang chuan kan hre ve phak lo va. Tin, ni danga conference-ah naupangte dikna chanvo bîk, 'hlawh leh service condition nen inphu-a naupangte zirtir hi naupangte 'dikna chanvo a ni' tih lam thupui kha conference hmasa lamahte an lo dah tawh ṭhin avanga tun ṭuma uar hran ngai lova ruat pawh a ni maithei bawk (Chutiang a lo nih chuan a ṭha a). Vanglaini Chanchinbu 5.7.25 erawh chuan kan ziah lan tak zirl lai naupangte zirtirna chungchanga ṭhahnem ngaihna lam hawi thu rel hi a hmasa berah a dah thung a. Hei hi a lawmawm hle. Mahse, ṭhahnem ngai lehzuala naupang zirtir tura an infuihna hi number khatnaah nge an dah number tawp bernaah tih hi heng chanchinbu pahnih aṭang hi chuan a chiang mai lo va.
Pu Lalthangliana Varte hun lai khan Mizoram Sawrkar Deptt 30 aṭanga officer rual inzawm khawmna 'The Mizoram Departmental Officers' Association kal khawm chuan thupuiah 'Loyalty to one's duties and responsibilities' tih an hmang a. A Mizo ṭawng chuan ' Mahni hnaa rinawm' tihna emaw a ni mai ang chu. MDOA member-te service condition ṭhat lohzia ngaihtuah chuan, service siam ṭhatna lam hawi pawh ni lo, mahni hna thawh ṭheuhva rinawm, ṭha zawk leh chak zawka mahni tih tur ṭheuh hlen chhuah a nih theih dan tur leh tling zawka hna an thawh ṭheuh theih nana inpumpekna lam hawi khûnkhân tak maia Assembly-a an sawi ho thei kha fakawm tak an ni a, a ngaihhlutawm hle a, ka chhuang hle a ni. Service dangte entawn tlak (model) an lo ni tih min ngaihtuah chhuahtir a, khatianga thil dang rel lova Assembly thupui bera an nei kha ṭhangthar lo awm zelte tan theihnghilh theih loh tur 'thu ropui', hnam hmangaihna lan chhuahna a ni e.
Zirtirtute hi Mizoram Departmental Officers' Association mite nen hian chhungkaw khat, hna thawh dang si kan ni; Saphoina 'different species of the same genus' an tih ang hi kan ni ber awm e; officer-a an kai san hunah MDOA-ah an rawn tel ve nghal ṭhin a. Mizoram nghahfak, nakina ram hruaitu tur zirlai naupangte enkawla chher mek kan zirtirtute hi tluang zel rawh se.
- Dr J.T.Vanlalngheta, Advocate
Writer's LEXIS & LAW