Party leh Aizawl Traffic

Khawnge, mahni vei zawng zawng i han puak ve pawp pawp mai ang aw. Thu ziak mi ni mah suh ila veizawng chu patling chuan kan ziak ngam ve tur a ni alawm tiin Political Party leh Aizawl Traffic jam inzawm dan ka ngaimawh deuh deuh hi ka han thai kawi ve nguai teh ang le. Tu pawi kan sawi em lovang chu maw. 

In lo chik ve chuan MLA inthlan dawn leh MP inthlan dawn khan Aizawla hall zau tak tak zingah Vanapa Hall hi Political Party-te khan punkhawmna atan an hmang deuh vek a, chutah pawh hall kawta motor veivak thei lovin an siam deuh ngei ngei. Hemi kawngah hi chuan BJP an chhuanawm hi ka ti a, BJP President mit Shah kha campaign tura a lo zin khan Dengṭhuama Hall, Mualpui-ah daih programme an hmang tih kha ka la chhin­chhiah ve reng a ni. 

Vanapa Hall-ah tam hmel taka in lan tir hi tlinna a ni lova, party tinin traffic ti jam thei tur mi leh sa an nei vek tih a lang tawh a, MNF chiah an tling a nih hi. Ṭum dangah campaign dawna mipui an au khawm leh a nih pawhin traffic tibuai lo turin ti tawh se, Vanapa Hall an hman pawhin a chhunga leng lo zawng chu a kawtah inhnawh se, motor veivahna awm turin zuah tawh se. Kawngpuia ṭhutna dah hi 'Traffic Jam Free' tih te nen a inper san lutuk reng reng a, ṭul loa mipui leh traffic tihbuaina mai mai a ni. Kan hotute hian hei hi lo ngaihtuah ve mai mai rawh se. 

Hman deuhva Aizawla lirthei par­king duhdah ber chu Congress Bhawan kawt vel hi a ni a, an duh hawi zawng zawngin an hung mai mai a ni. A chang leh Bhawan bul kawng chhuk hi an ti jam thul, a buaithlak dan kha kan la hria ang ang. MNF ruling hun a thleng ta a, an office Hnam Run a ualau bawk sia, Aizawla lirthei parking duhdah na ber chu Bhawan aṭangin Hnam Run-ah a in sawn ta a ni. Tunah pu berin traffic jam a vei em em a, kawng chhawng te min la siam sak dawn laiin a member-te hian traffic ti jam thei turin two wheeler mawng poh deuh deuhvin an park a, motor pang­ngai pawh uluk lo fahran in an dah ṭhin a, in veivah hunah en ve mah ula, line in rin pawn lamah an park fer fur mai a ni. Hmun danga rem lo ang kha helai hmun a niha political party ho an nih chuan Traffic Police lam hian an hau ngam lo a ni ang chu ka ti maia an duh duhnaah an hung a ni ta deuh ber mai. 

Hei hi thuneitu lam hian en zui se, a party ang pawhin han in hrilh zawk se. Awlsam tea mualpho pumpelhna a ni mai a, Bhawan kawt parking kan ngaimawh ang chiah kha Hnam Runah hi chuan ti ve lo se a ṭha ang. 

- VL Rinpuia, Mission Vengthlang