Khawchhak aṭanga lung lo lum mek, zual zel tur!
Mizo zawlneite’n ‘Khawchhak lam atanga lung lo lum tur an tih te, China ral lo lian tur, Thim thuah hnih’ an tihte hi eng berte hi nge ni ang tiin kan ngaihtuahna kan seng ngai em le? Drugs (ruihhlo) te hi le?
Hun eng emaw aṭang khan khawchhak lam aṭang hian Zoramah Mizo te, a bikin kan ṭhalaite tho leh thei tawh ngai hauh lo tura delh bet tur hian drug (ruihhlo) hraw pui pui a rawn lum lut ruih ruih ta a ni lo maw? Hmelmate beihna tana ralthuam ṭha berte zinga pakhat chu ruihhlo hi a ni tih a nih kha. Min hmangaihtua kan ngaih, kan hriat loh laia kan hmelma lo ni rengte hi an awm a ni lo maw – heti taka drugs hmanga tihchhiat tuma beihna kan tawk ta mai hi? Kan ṭhalaite heti taka suatsaka kan awm ta mai hi ṭhangthar chhawr tlak lova min chhuah a, Mizote hi min chhut zal dêr tum an awm a ni ngei ang le.
Ram dang mite’n Mizoram hi min rawn chhuha min awp bet tur hian silai tunlai ber berte leh ralthuam hlauhawm pui pui an hman kher a ngai lo. Kan ṭhalaite hi tho leh thei tawh ngai lo tura an chakna zawng zawng chhu chhe vek thei drugs (ruihhlo) hi kan hmelma ni theia kan rin phal hauh lohte hian an rawn hmang mek a ni thei mai ang em?
Ruihhlo rawn tawlh luttute hi min duhsaktute leh min hmangaihtute an nih a rinawm loh. Keini a ram mite aia thil ti thei leh hausa zawkte an ni a; kan ram rorelna in sangahte thuin an rorelna hnuaiah kan la kûn dial lo vang tih a sawi theih loh. Fing lo zawka kan ngaih, kan aia fing zawk tlat si, kan ram chhunga cheng, hnam dang, min ertu tam tak Mizoram mi nihna dik tak neia kan chenpui mekte pawhin remchang an hmuh chuan min lem zawh an hnial hauh lo vang. Keini aiin rilru an nei zawk emaw tih turin kawng engkima min tlan khalh tumin ṭan nasa takin an la mek a. Mizo ṭhalaite ang em hi chuan ruihhlo pawh hian a tibuai ve lo. Nakin lawka awlsam taka kan ram luahtu turte an la rawn ni mai lo vang tih a sawi theih loh ta. Mizoram pawn, phai lam vaiin min chîm ral dawn lo, danin ram neih a phal lo. Kan zinga cheng, in hmun lo ram nei thei, kan Zo hnahthlakpui kan tih te, kan ram pawn aṭanga lo lutte leh tuna kan chenpui mek hnam dangte ngei hian min la chîm ral zawk dawn niin a lang.
Kan ram chhan tur hian sawrkar leh khawtlang mite hian min tichhetu drugs leh drugs rawn tawlh luttute hi khauh taka kan khuahkhirh lehzual a ngai tak meuh ta a ni. Pawn lam mi, Mizoram mi nihna (ID) suma lei tute leh lo hralhtute pawh hi ram hmelma an ni tih i hai lo ang u. Drugs rawn tawlh lut tute phei hi chu ‘Mizote nunna suattu’ an ni a, kan dîm lo tur a ni dawn lawm ni? Mipui, a bikin ṭhalaite kan ṭhanharh a hun ta, kan tlai luat hma hian i harh ang u.
- JM Vanlalhriata, MSVT