College zirtirtu rationalisation hi

Mizoramah hian zirtirtu sem rual (rationalization) chungchang hi vawi tam tak sawi chhuah a ni tawh ṭhin a, a tak tak erawh chuan a thleng thei meuh lo. Mi pakhat, zirtirtu lo ni tawh ṭhin pakhat chuan, "Rationalisation an tih hian zirtirtu an sawn chhuah aia tam zawk hi an lo lut leh ziah a, tih loh a ṭha zawk," a ti a; a dik thui viau âwm e. Tuna kan Minister pawh hian rationalisation tih tumin nasa takin a bei a, huaisen takin kan ti ngam nge ngam lo min lo en dawn nia, te pawh a ti ni âwm tak a nia. Rationalisation hi zirna sang college lamah phei chuan thil ṭul tak a niin a lang a, MZP lam pawhin na takin an nawr ni awm tak a ni a, beisei pawh a sang viau mai a nih kha.

Amaherawchu, thil hi sawi ang thlap thlapa tih a har viau a ni ang e. Tunah pawh hian rationalization chu kalpui tak tak theih a ni ta meuh lo va, Aizawl khawpui aṭang insawn chhuah chu sawi loh, an lut chur chur emaw tih tur a ni. A lan dan chuan June ni 15, 2025 thleng vel khan ZPM sorkar hnu hian college zirtirtu hi 31 chuang khawih chêt an ni tawh a, hemi-ah hian Aizawl aṭanga Aizawl khaw pawn (thingtlang) lama chhuak hi pali chauh an ni a (heng pawh hi order sût leh an awm mai thei). Aizawl pawnah hian mi pali an insuan kual (mutual transfer-te nen) a, Aizawl khaw chhungah pakhat a insawn bawk a. A bak 22 hi Aizawl pawn (thingtlang) aṭanga Aizawla lo lut an ni (data hi a dik kim vek lo mai thei e). Rationalization tih hi zirtirtu sem rual a ni a, mahse, tuna kan Minister hi chuan anti-rationalization an kalpui mek niin a lang. A chunga zirtirtu lo ni ṭhin tawh sawi ang deuh hian, Aizawl aṭanga chhuak aiin hmun dang aṭanga Aizawla lut an tam zawk fe chu a nih tâk hi.

Tun sorkar chu, a ṭhente chuan nuam an tâwl a ni ber e. An in transfer kual dan en hian hmelhriat leh duhsak zawng induhsakna uchuak a tam hmel viau a ni. Kum khat âwrh thingtlanga awmte pawh an lut leh mai a, zirtirtu indaih em emnaah (casual nen 6 awm sanaah)pawh a rualin pahnihte an dah lut ṭhawt a. A nghet an sawn luh avangin casual bân ngai an awm bawk. Thingtlang lamah chuan casual dinhmun nghet lo tê tê an vawm khawm a, Aizawl lama nghet awm sa sawn chhuah a awm ta bawk si lo va, thingtlang lam college chu a nghet tlem leh a nghet lo hoin an enkawl mek chu a nih hmel. Heti hi chuan quality education chu kan hlat deuh dawn a nih hmel e.

Thawk khat lai khan MCTA lam ho khawpui awm chhuah hlau khan Minister hi an hmin deuh ang ten an sawi a. Chumi kal zelah chuan casual dinhmun sâwi nghîn a ni a, Minister hoin vai bân vek an tum a, CM-in chhanin, mualpho lutuk lovin an chhuak hram an ti. Tun hnaia casual teacher an sâwi kual chiam dante phei chu Principal Council lam pawh an lawm vak lo ang ten an sawi hial a. CM hian zirtirtu sawn chiam chiam hi a ṭha a ti lo a, mahse, heti zat zet thingtlang zirtirtu dah luh a, thingtlang college-te casual pek vak vak hi chu CM duh dan chu a nih chiah a rinawm loh.

Zirtirtu sawn chungchangah hian a tir khan zirlai pawl MZP hi an pâwr viau a, an President pawhin na takin an nawr thu a sawi a. Mahse, a rei hnu hian MZP lam pawh rationalization chungchangah an ngawi ta deuh tlat a ni âwm a. A chhan pawh an President unaupa, zirtirtu hi an khuaah an sawn lut a, MZP chuan rationalization chu an sawi zui tawh lo tih thâwm te a lo awm bawk a. Tak tak ni maw? Ram hnuk tak tak ai hian mahni vua leh vâng hamṭhatna vel hi kan vei a nih ngai chuan, ram ropui chu kan thlenpui a rinawm loh.

Zirna hi kan siamṭha duh tak tak a nih chuan thingtlang lamah pawh zirtirtu ṭha, a ngheta thawkte hi an dah ngam a ṭul hle mai. Chuti a ni loh chuanin ka ram zirna hi a thlahniam telh telh dawn. College zirtirtute chauh ni lovin, sikul leh thil dangah pawh vai sawn hlawk hlawk hlawk lova awmze nei zawka an siam rual thiam a ṭul a ni. Zirtirtu insawn kual hi chhungte induhsakna, party induhsakna chi a ni lo va, ram hnuk khawih thil a nih avang hian kan sorkar lam pawh an fimkhur hle a ngai awm e.

- Lalthanmawia