Tlawmngaia thlân lai tura insâwm

Tunlai hian veng chhung chhiattawh, a bikin thihna chungchangah thlân lai turin, "Tlangval tlawmngaite'n thlân laih tur a ni e," tih a awm fo a; hei hi YMA tih dan vek, tu veng mah dem theih a ni lo ang.

Hmânlai kan nu leh pa, pi leh pu hun lai chuan thlân laih lâwk a awm ngai lo a, ruang zawn hmuh zawh loh emaw, ruangin an in a thleng lo a nih a, thlân lo laih lâwk a nih chuan arte emaw tal phûmin thlân laih lawk kha an chhilh/vûr leh ṭhin.

Tunlai angah chuan veng leh khawtlang hian thlân laih sa kan nei ta fur a, hei hi pi/pu hun angah kha chuan a thiang miah lo anga ngaih a ni. Mahse, tunlai angah chuan a loh theih tawh loh a ni te ber e. Thlân laih sa ngah veng/khua chuan harsatna an ngah lo a ni ta ber mai.

Mizoramah mihring kan pung a, hna thawka chhuak kan tam ta telh telh a, thlân lai turin kan hman ta meuh lo a ni. A hmana hman pawh an tam, mahse, an hman tlak em em bawk si lo. A hmanate lah addict an ni fur mai bawk si. Phût ngam ngaihna an awm ngang lo.

Thlân laih sa nei tur chuan hnatlang inkoha thlân laih a ṭha ta ber ang. Thlân laih sa neih hi mitthi neih pawn khawtlang buaina tam tak a chhâwk em em a, mike hmanga mitthi puan ruala tlawmngaia thlân lai tura inkoh lauh lauh a awm tawh dawn lo bawk a, a zia phian a ni.

Thlân laih chawp ngai an la awm hi an demawm chuang lo. Thingtlangah leh veng ṭhenkhatah chuan an la lai chawp thei zel pawh hi an fakawm. Ṭhalaite thlân lai tura an han chhuak sang sang te, thlân laih laia han titi leh han infiam bawrh bawrhte hi inpawhna ṭha lutuk a ni ve tlat. Khâng hun lai kha khua/veng tam tak chuan kan hmu pha ta lo. A lunglenthlak lek lek ta zawk hial mai.

Mitthi awm apianga thlân laih chawp tihautaktu pakhat chu thingpui inpek hi a ni. Zan tlaivarpui ngai emaw, tlaivarpui kher lo pawh, ṭhalai an hah em em ṭhin a. Chumi karah chuan nulate'n thlân lai thingpui pek a ngai a, in lamah nulate bawkin an sem a lo ngai leh bawk si. Thlân laih chawp aiah laih sa neih mai hi veng/khaw tam tak tan chuan a fuh ta viau mai.

- Melissa Pa