CONGRESS SORKAR LAIIN MIZORAM SUM DINHMUN ṬHAT BER HUNLAI, SUM TUAL LÊNG TAM BER
Congress sorkar hunlaia khatiang taka ram economy (sum dinhmun) a ṭhatna chhan leh sum a enkawl thiamna chhan kha sawi nep nan; mi ṭhenkhatin awihawm leh verhvek takin tuna sum indaih lohna chhanah ‘zu zawrh a nih tak loh hnuin sawrkar hnenah chhiah chhun luh a tlem phah’ tiin thiam takin an sawi ṭhin a, amaherawhchu hei hi thu belhchian dawl lo a ni.
Mizorama zu zawrh tawp kum 2018 khan sawrkar hnena chhiah lut zat (own tax revenue) hi cheng vaibelchhe 726.70 niin a kum leh 2019, Mizorama zu zawrh khap a nih hnu hian sawrkar hnena chhiah lut zat chu cheng vaibelchhe 730.98 a ni a, hemi hnuah pawh a kum telin chhiah lut a pung chho tial tial a, chu vangin a chunga sawi tak chhuanlam khi chu thu tlingah a lak theih loh a ni. Kum 2024-25 ah phei chuan State chhunga chhiah khawn (State Own Tax Revenue hi Cheng Vaibelchhia 1335.901 (RE) hial a ni tawh. Mizoramah zu zawrh phal a nih lai khan India ram chhung state zawng zawngah zu chhiah a la tlem ber a ni. Hei hi a chhan chu Mizote hi hnam dang aia insum thei lo leh puitling lo bik lo kan nih avangin zu in duhten zu ṭha, zalen taka an hmuh theih chuan zu in an thiam beiseina sang tak a neih avang a ni.
BJP khan Central-ah 2014 aṭang khan sorkarna siamin Congress sorkar 2nd term nen khan a innang chiah. Amaherawhchu BJP hian Congress sorkar kha an sorkar hnua Mizoram sorkar ding tawh zawng zawngah i.e., MNF leh ZPM, a la thawhpui ṭhat ber a ni tlat. Ram chhung pawisa tual leng pawh Mizoramah a tam ber hunlai a ni tlat bawk. Congress sorkar CAG Report kan rawn tarlan aṭang hian hetiang khawp hian sum dinhmun ṭha hian Central-ah BJP an sorkar laiin Mizoram hi a siam hman a, ram sum dinhmun chhia leh ṭha hriat theihna atan tehfung bera an hman aṭang hian India ram state zawng zawmg zingah sum dinhmun ṭha ber pawl Mizoram hi a ni hman.
Entirnan, mahni sorkar hunlaia sorkarna chelhtu programme atan budget-ah sum dah theih zat han sawi chhuak ila, NEDP atan Congress khan state pawisa aṭangin kum 2018-19 budget-ah khan cheng vaibelchhia 750 a dah theih laiin, ZPM sorkar hian a hnu kum 10 dawn a liam tawh hnuah pawh an flagship programme Bana Kaih Policy atan kum 2025-26 budget-ah Cheng Vaibelchhia 350 chauh an dah ve thei ṭawk a ni. A hnua sorkarna rawn chelhtute pahnih MNF leh ZPM te hian ram tana rorelna hna hi a ngaihna thlawt an hriat loh avangin tun ang dinhmun chhiaah hian Mizoram kan awm phah ta a ni.
-Lalhruaitluanga Bawitlung