AMC-a 'A' sawi dan

Hmân deuh aṭang tawh khan Aizawl Municipal Corporation lamtawi AMC-a 'A' hi mi ṭhenkhatin Mizo ṭawnga 'A' angin lam tur tiin an sawi zauh zauh a; hetianga ngaihdan nei leh sawi ṭhin erawh mi tlemtê an ni âwm e. AMC-a 'A' hi English-a 'A' anga sawi a nih hian 100%-in a dik thlap a; Mizo ṭawnga 'A' anga lo sawi duh an awm erawh chuan ‘A dik lo’ tihsak chuang lo ila; an thu a ni.

Middle school kan luh tirh lam hian kan zirtirtu pakhat hian pawl 5 zirlaite chu kan hming ṭheuh Sap ṭawnga hria kan awm leh awm min zâwt a, 'Ka hre lo' kan ti deuh vek a. Kan pawla zirlai pakhat chuan, "Ka hria," a ti a; mak kan ti viau hlawm. Kan zirtirtu chuan, "Eng nge?" a ti a, zirlai chuan, "Laldinpuia" a ti a. Zirtirtu chuan, "A dik," a ti.

Zirlai tam ber kha chuan kan hming Sap ṭawnga kan hriat loh chhan chu, Sap ṭawnga lehlin tur emaw kan tih vang a ni. Chuta ṭang chuan kan hming hi English leh ṭawng dang zawng zawng pawhin a lo danglam rêng rêng lo tih kan hre ve ta a.

Aizawl hi Mizo ṭawng a ni a, a ziah danah pawh Mizo ṭawngin (hawrawpin) ziah a ni. Mahse, English, Spanish, Hindi, Bengali, French, Mandarin leh ṭawng dang pawhin 'Aizawl' tho a ni.

Aizawl Municipal Corporation tih hi Mizo ṭawng a ni lo a, English a ni. 'Aizawl' tih lai tak pawh hi Mizo ṭawng a nih rualin, English a ni a, ṭawng dang a ni tel bawk. English a nih avang hian a lamtawi AMC tihah pawh hian tuna mi tam berin kan sawi dan, English hawrawp (alphabet)-a 'A' anga sawi hi a dik thlap a ni.

Aizawl tih hi Mizo ṭawng a nih avanga AMC lamtawia 'A' hi Mizo ṭawnga alphabet hmasa ber 'A' anga sawi tum tlat a ngai lo; tih-Mizo viau chi a ni lo a, Mizo ṭawng leh ṭawng dik humhalhna lam nen inzawmna a nei lêm lo.

AMC tiha 'A' hi Mizo hawrawp angin sawi tur ni se, 'C' lai hi sawi dan tur kan nei lo, Mizo hawrawpah 'C' kan nei lo tlat.

Sawi tawh angin, Aizawl Municipal Corporation tih hi Sap ṭawng a ni a, a lamtawi AMC pawh Sap ṭawng tho a ni. Chuvangin, AMC tiha 'A' hi Mizo hawrawp anga sawi tum lui tlat loin, English alphabet-a 'A' anga sawi mai tur a ni; a dik thlap bawk.

Aizawl Theological College (ATC), Aizawl Football Club (AFC), Aizawl District Congress Committee (ADCC), Aizawl District Football Association (ADFA), etc. Heng hmingte pawh hi English vek a ni a, lamtawi pawh English tho a ni. A lamtawia alphabet hmasa ber 'A' hi English ‘A’ a ni a, mi zawng zawng (mi tam ber) sawi dan a ni bawk e.

- K Zothanpara