BUMIN AWM SUH U
Kan ram hmasawnna hi sawrkarna fawng vuantute leh sawrkar hnathawkteah a innghat thui hle a ni. Sawrkar laipui aṭanga ram hmasawnna tur sum lo kal hi sawrkarin dik taka hman tum mah se, sawrkar hnathawkte’n an zir loh chuan a buaithlak viau ang. Chutiang bawkin sawrkar hnathawkte’n dik takin sum hman dan tur ruahman mah se la, sawrkar berin a pawh pên zel chuan a dik thei dawn chuang lo a ni.
Mihringte sualin min bumna tam ber chu sum ngainatna, sum leh pai hi kan nunna ber nia min ngaihtir hi a ni awm e. Hemi avang hian mi tam tak chu bumin kan awm a, rinna kan phatsan ta ṭhin a ni. A bikin sawrkarna fawng vuantute leh sawrkar hnathawkte he mi-ah hian an fimkhur a ngai hle mai. Dinhmun ṭhaa ding emaw an intih lai hian, thlêmna do zo loin an taksa leh thlarau a boral phah thei a ni.
Kan tlangval laiin ṭhian fel tak mai, nungchang ṭha bawk si, lehkha thiam em em mai, hmeithai fapa hi ka nei a. A nuin a chhuangin a thlamuanpui hle. Sawrkar hna a hmuh hlima a nu lawmzia kha ka theihnghilh thei lo. Nimahsela, ka ṭhianpa chu sawrkar hna a thawh hnu rei lo tê aṭangin zu in a ching ṭan tlat mai a, rei a dam ta lo a ni. A nu rilru natzia chu, dam pawh a dam rei ta bik lo a ni.
Mizote hi ka ṭhianpa anga dinhmun ṭha, sawrkar hnathawh zo lo hi kan tamin ka hria. Thih hma phah em lote pawhin sawrkar hna an thawh hmaa nungchang ṭha tak ni ṭhin, sawrkar hna an thawh hnua an nungchang hlauh ta daih hi an tam em em a ni. Hei hi a ni ka sawi duh chu. Sawrkar hnate hi duhawm hle mah se la, mi tam tak tan chuan boralna kawnga min hruaitu a ni thei tih hi. Pathian thuin, "Bumin awm suh u, ṭhian sualte chuan nungchang ṭha an tikhawlo ṭhin,” (1 Kor 15:33) tiin min hrilh a. Mihringte hi dinhmun ṭhaa kan din hian hian kan ngah tlangpui a, Setana bumin kan awm thuai mai ṭhin a ni.
Sawrkar officer pakhat, kohhran upa hi a thawhpuite’n thawhpui hahthlak an ti em em mai a; a chhan nia lang chu, an office department thila hman tur sum a ren a, a hmanna tur ni lova hman a hreh em em mai a. A thawhpuite chuan sawrkar sum hi ren vak ṭulin an hre lo a ni mai thei a ni. Kan ngaihdan a ni ve em? Sawrkar sumte hi kan mi mal sum a nih loh avangin ren lo mai tur kan ni em, tih hi zawhna pawimawh tak a ni awm e. A hmanna tur dik takah pawh hmang mah ila, bill dik lo hmangin sum hi eiruk theih a ni; kan chhungkaw thila kan hman ang thil leina bill dik taka siam lo hian. Chuvangin, heng ang thilah hian Lal Isua ringtu sawrkar hnathawkte hi kan fimkhur a ngai hle a ni.
Dâwn chiang teh u, sawrkar hnathawkte u, bumin awm suh u, Pathian chu hmuhsit zia a ni lo ve, miin a theh apiang chumi vek chu a seng bawk dawn si a (Gal. 6:7). Sum ziak bo thei dinhmunah i ding a ni mai thei, chu i sum ziah bo chu in chhungkuain in changkanpui hle a ni thei. Nimahsela, i theh apiang hi i la seng ngei dawn tih hi hria ang che. "A nih leh, mi fel lote chuan Pathian ram an luah lo vang tih in hre lo vem ni le? Bumin awm suh u, inngaih hmangte emaw... rûk hmangte emaw, mi duhamte emaw... hlêprute emawin Pathian ram an luah lo vang," (Kor 6:9-10) tihte hi hre reng la. Kan Pathian duh dan ang zelin, eng hna pawh thawk ila, kan Pathian tan rinawm takin i awm zel ang u.
Sawrkar hnathawk rau rauah pawh hna hniam lam thawkte aiin hna sang lam thawkte tan sum chungchangah thlêmna a tam zawk ngei ang. Office mamawh order chungchangahte mahni chhungkua leh mi mal emaw in-order kêp mai pawh hi a awl hle mai thei. Office mamawh kher lo pawh, ei leh in chungchangahte mahni mimal chawi leh bat tur ni lo, office hminga bat turahte dik hlel deuha tih mai theih a ni. Office mamawh mimal dawra leite pawh bill dik lo siam theih tak a ni bawk.
Chuvangin, nangni kan sawrkar vawng vuantu leh sawrkar hnathawk duhawm takte u, kan ram leh hnam tana sawrkar laipuiin sum min rawn pekte hi a hmanna dik taka hman a nih theih nan in pawimawh hle tih hria ula, kuttlingloa sum hmuh theihnaah in ding e. Thlêmnaah lut suh la, luh chu sual a ni si a.
- Hausanga Hauzel