Mizoram Polytechnic leh ram buai
Kum 40 zet kal taa Mizoram hmasawn zelin a mamawh zinga pakhat, Mizoram Polytechnic, Lunglei (MPL) chuan tun hnaiah chanchinbu leh thuthar thehdarhnate hmangin a thangṭhat leh hmasawnna lam ni lovin, ram buai leh zirna kalpui hleih theih loh lamah hriat a hlawh viau a, a pawi tak meuh a ni. MPL-ah kum 20 chuang lo thawk tawh nih manah thu tlemte han tarlang ve teh ang. A chungchang thu hi High Court leh Supreme Court lamahte ngaihtuah tura kal zel a ni a, he thuziak hian chu lam chu a nghawng buai lo tura ngaih a ni.
MPL din kawng hi a kîkawi ve hle. ITI Aizawl, Lunglei Govt College leh CRP Building Lunglei Bazar Vengah te hmun luah hawhin kum 16 lai insawn kual hnuah a hmun nghet tura sorkarin ram a pek sq.metre 1,70, 412-a zau, Theiriat-Hrangchalkawn inkarah September 1996 aṭang chuan a inbengbel chho ta a. He hmuna kum 1983-1985 vela Administrative building leh staff quarters tur sak tawhte pawh a hlui tawh avangin a remchangte thawm ṭhat bakah, boys & girls hostel-te sak thar a ni. Hostel sak hna hi civil engineering-a master degree nei Pu C Thanseia (Principal) hovin Civil Engineering Department-in an thawk.
Tun 2025 thleng hian MPL-ah All India Council for Technical Education (AICTE)- in a pawmpui engineering diploma pali zirna a awm a; chung zir ṭan kumte chu–Civil Engineering (1981), Electrical Engineering (1986), Mechanical Engineering (1991) leh Computer Science & Engineering (2001) a ni. Zir turte chu Mizoram State Council for Technical Education buatsaih Mizoram Diploma Entrance Examination (MDEE) kaltlanga lak an ni ṭhin. Mizoramah engineering diploma zirna hmun pahnih–Women’s Polytechnic, Aizawl leh NIELIT, Aizawl Centre awm mah se la, MPL hi engineering hlang zirna awm chhun leh upa ber a nih avangin Mizoram tan a pawimawh bera sawi theih a ni a, zir chhuak sang chuang fe an awm tawh a ni.
MPL ram buai hi a pawi mai a ni lo va, Mizoram sorkar hmai tibâltu a ni thei bawk. Thuremtute thupek angin MPL pisapui leh hmun pawimawh dang eng emaw zat chu June 28, 2025 aṭangin kalh a ni a; academic session 2025-26 bul ṭan pawh a chîrî phah viau a ni. MPP hmun atana ram DLP 84 of 1990 hmanga bigha 127.34 (square metre 1,70,412)-a zau Mizoram sorkarin a pek laili taka mimal ram a lo awm tlat mai hi thil mak tak a ni. Chutiang zelin, he buaina chungchanga sorkar lam thuneitute ni 600 chuang zet an ngawi tlat mai kha thil mak a ni bawk. He thil lo awm dan hi chhui tham fê a tlingin a lang.
A ram pawh a hlu viau a ni ngei ang, luah man nia chhût chhuah Mizoram sorkar in a pek tur chu cheng nuai 90 lai a ni! Hei hi pek ni mah se, a ram buai chinfel a nih si loh chuan kumkhuaa buai zelna tur a la ni ngeiin a rinawm.
MPL chuan a din kum 50-na (golden jubilee) lawm tura inbuatsaih a hun ṭan laiin, ram luah man buaina a tawk hlauh mai a, a pawi hle. Hetiang kara zirlai lut thar 100 zet lo dawnsawn chu a hrehawm viau ang. Buaina chingfel a, bahlah lova zirna kalpui thuai a nih theih nan beiseina sang tak nen thuneitute hmalakna i lo thlir phawt mai ang u.
- H Lalchhuanvela, FIE Ramhlun South, Aizawl