Vai I Vel Ang U

Tun hma rual ute hun lai khan Mizorama vai an hmuh chhunte kha chu vai sumdawng chhe ve tak, an hmel leh chet zia han hmuh pawhin zuamawm ve tak takte kha an ni a. Mizote khan chung vaite chu pawi sawi lo pawh ni se han velh ve hrim hrim kha an chak ṭhin a. Mi ṭhenkhat khawlai lennaah kawr hma phelh hiai huaia leng chinte kha chuan ‘Vai ka vel dawn’ tih ṭawngkam chu an ṭhiante hnenah intihtheih nan tak an lo hmang ṭhin a ni. A ṭhente chuan ‘Vai chhia’ an ti a, Cachar aṭangin Mizoramah sumdawnga lo chho an nih avangin ‘Kawr vai’ an ti bawk.

‘Vai i vel ang u’ an tih hun laia kan dinhmun kha a ngaihawm ta hle mai. A chhan chu lo vel pawh ni ila, phuba lak theihna an nei lo. Keimahni ei leh inah kan thawh chhuah ringin kan la intodelh a, vai ram thil kan la ring tlem hle.

Tunah erawh chuan vai ramah kan Mizo-puite tam tak an awm tawh a, an chungah phuba an la thei a, ni khat pawh phai ram thilte tel lovin kan khawsa thei tawh lo va. Kan ei turte min lo dansak thei a, chuvangin, ‘Vai i vel ang u’ tih ngam pawh an ni ta lo. Chu bakah, danin mimal dikna a humhim ṭha tawh bawk s.

Tunah chuan Delhi vaite’n Mizoram hi an rawn awp tawh a; kan ram hruaitute Delhi-ah kan ram tana sum zuk sawi chhuak tam thei apiangte chu kan ram tan an hlu hle a ni. Thiamna lamah ni se, kan rama department lian pui pui enkawltu chu vai an lo tam ta em em mai. District tina roreltu lute pawh vai an ni ta deuh zel mai.

Kan ṭhalai mithiamte hi an lo harh chhuah a hun ta e. Vaite chu tharuma beih ai chuan thiamna hmangin kan do let a hun ta. Kan ram chhungah hotu lu-ah a nuam thei ang bera awm tumin MCS-ah te an inziah tlin lai hian, vai ho do let nan All India Service-ah inziah tlin tum hlawm se la, chu chu kan ram tana pasalṭha rilru putute an lo ni ang. Chung mite chu ram tana vai do lettu, zirna lama mi hrat khawkheng, Zo fate tana pasalṭhate chu an ni ang.

Vaiho hi kan ramah eizawng tur chauhvin an lo kal a. Vai do letna ṭha tak mai chu an thawh tur kan lo thawh khalh zung zung a ṭul. Anni aiin kan taimak a, kan thawh thiam zawk a ṭul a ni. Sum thawh chhuah tur an hmuh loh chuan kan ramah an awm reng duh lo vang; a tam zawk hi chu an haw vek mai dawn a ni.

Dan loa an lo awm emaw, dan bawhchhiaa an nung a nih erawh chuan danin na takin a vel ṭap mai zawk dawn a ni.

- H. Neihchungnunga, Durtlang North