KAWNGPUI NINGKHAWNG

Mizote hi inbarakhaih ṭhin hnam kan ni a. Mi inring lo lai, hnung lam aṭangin keipui sa veh takin kan han veh ṭhem ṭhem a, 'Barakhaih' kan han ti phut mai a, mi phu hlum dawna siam kan ching a. Mi an phut nasat poh leh hlawhtling kan inti a kan hlimna ber pakhat pawh a ni ṭhin.

Tin, kham tlang leh hmun sang, tlak hlauhawm takah mi ṭhu lai emaw, ding lai emaw te, min hmu ang tih hlau takin kan veh then then a, thawk leh khatah, 'Tla ṭhelh ka dawm hman,' te kan han ti a. Mi dangte, hlauthawng thei ang ber, thaw hlawp hlawp khawpa thin ṭhawnga siam te hi kan game hlimawm pakhat a ni tlat bawk a.

Heng kan game-teah hian, 'Tla ṭhelh ka dawm hman,' tih ngat phei hi chu, lung chak lote tan phei chuan kumkhaw hri vei neih phahna khawp ni hiala mawi a ni a. Mahse, tu nge khami ṭuma kan barakhaih vang leh Tla ṭhelh ka dawm hman' kan tih vanga kumkhaw hri vei neih phah ta tih erawh, a titu leh a tuartute pawhin kan ngaihtuah tawh lova, kan chhui tawh hek lo. Hetiang thin ti ṭhawng thei tak game hi a vantlanga kan infiamna a nih avangin tumahin huat thua lak chiah kan ngai lo a ni ber mai.

Hetiang hi kan infiam dan a nih miau avang hian kan lirthei khalh danah pawh hian, kawngpuia lung muang taka mi kal lai leh ṭhu laite va tih phut zawk leh hlauthawnga va siam mai te hi kan pawisak vak loh phahin, chutiang chu mi pawi sawina niah pawh kan ngaih loh phah deuh ṭhin niin a lang nghe nghe a. A nihna takah chuan lirthei khalh thu lovah pawh, hlauthawnga mi dangte siam hi dan phal loh a ni hrim hrim a.

Lirthei taksa hi thir leh thil dang, mihring taksa aia sak, rit leh chak zawk daiha siam a nih avangin mihring nena in khak palh thulhah pawh mihring chu a chan chhe zawk kan ni zel lo thei lova. Chuvang chuan lirthei khalhtute pawhin mihring chuan lirthei chu kan hlau hle turah kan dah ṭheuh a. Ni e, lirthei chu mihringin kan hneh loh em avangin lirthei che vel lakah mihring chu kan inveng fimkhur hle tur pawh a ni ngei e. Hetiang a nih lai hian kawngpui dan, 'The Rules of The Road Regulations 1989 chuan mihring a humhalh em em a. Lirthei lakah chuan kawngpuia Sipai leh Sikul naupang kawng zawh te, kawngpuia hna thawktu (workman) te a humhalh tlat bawk a. Hei mai bakah ran khalhtute ran khalh lai, thunun hleih theih loh khawpa lirtheia tih philisak thlengin a rem ti lo a ni.

Tin, lirthei khalhtute mawhphurhna chu, kea kalte himna chauh ni lo, kan lirthei khalha chuangte ngei ngei pawh lungmuang leh thin thia an awm hi a ni a. Tladah taka lirthei khalh hi lirthei dang leh kawng hmangtu dang reng rengte tan te, kan lirtheia chuangte tan ngei ngei pawh a him loh avangin kawngpui danin a phal lo a ni. Chutianga hlauhawm taka lirthei khalhtute chu MV Act section 184-na hmanga hrem tur an ni a, a hremna pawh a nâ hle a ni.

Traffic Rules kan tih hian a tum ber chu, kawngpui hmangtu zawng zawng, lirthei, mihring leh ran thlenga him leh lungmuang taka kan hman tlan theih a nih avangin lirthei khalhtute tan chauh ni lo, kea kalte leh kawngpui dunga hna thawk zawng zawngte tan pawh zawm tlan vek tur a ni tih hriat reng tur a ni.

Kawngpui ningkhawng dik tak chu, lirthei khalhtuten kawngpui hmangtu dang, kea kal te, hna thawk te, ran te thlengin an zah tur a ni a. Chutiang bawkin kawng hmangtu dangte pawhin lirthei khalhtute pawh an zah ang a, inzah tawn taka kawngpui hman tlan dial dial hi a ni.

I lirthei khalhin tumah ti hlauthawng suh la, tumah ti phu hek suh.

- PC Hmangaihzauva