‘PRAISE ON’ KA THLIR VE A

Synod Information & Publicity (Synfo) bultuma Kristian Ṭhalai Pawl (KṬP) Branch hrang hranga zai thiamte inelna ‘PRAISE ON’ kha a ṭhena zar ka en ve hman a. Zu leh ruih theih thilin nasa taka min run mek laia thil ṭha lo laka insum theiten tihtakzeta Pathian an fak leh, an phenah anmahni ang bawka Pathian tana inserh thianghlim ṭhalai an la tam tih han hriat aia chanchin lawmawm zawk hi a awm thei dawn em ni, ka ti hial.

Kan zaimiten Music Video buatsaih an chin aṭang khan, zuk leh hmuama fihlim, ṭhalai ka fai tak tak an tam tawk tihte a hriat theih a, a va lawmawm em! Mizo fate zingah heng ang hmu ve reng si a lawm nachang hre lo awm ta ang se, rilru daktor hnena hruai chi an nih ka ring. Keini hunah kha chuan zaithiam tam ber khan nupui pasal an neihin an zai thiamna a chuai mai ṭhin. Zuk leh hmuam an tih nasat vang ni maw! Zai zui leh zai lama mi hriat hlawh ni zui ta chu kutzungṭanga chhiar tham lek an ni.

Keini mi hlui, fak hla sak nuam ti ve em em ringawt, zai mawi ngaithla kham ngai lote chuan zaithiam kan hriat dan chu mawi taka zai thei an ni mai a. Kan tehfung chu a hla phuahtu phuahna rilru phawkchhuak khawpin a zai thei em? A solfa note a hmang dik em? A sang lai leh hniam laiah aw lai chuang lovin a mawi ngaia mawi rengin a zai thei em? A mit meng leh a che vel a hla thu nen a inmil em? tihte a ni deuh mai a. Tun ṭum leh a hmaa zaia inelna hrang hrangah kha chuan an tehfung a dang ta daih hian ka hria a. An zai zawha endiktuten an sawi zui ka ngaihthlak ve chu ka chan loh khan lam a tam hle. A hla thluk pangngai bo ṭhak khawpa ingeuh thei ang bera zai apiangin fak an hlawh hnem ni berin ka hria.

Keini chuan hla reng reng hi a phuahtu phuah leh a thluk awmsa ang chauha sak turah kan ngai a. Pathian fak hla ngat phei chu a phuahtu’n thlarau aṭanga a dawn ang ni lova sak chu tih ngam enah kan ngai ngai lo. Kan Kristian Hla Bua mi ngat phei chu Pathian biak nana hla serh a nih avangin han tih kikiau kawi vel turah kan dah lo hirm hrim. Thluk thar siam chawp erawh chu thu dang ni se.

Fak hla zinga mizo pa/nu irawm aṭanga chhuak tam ber phei chu a phuahtuten a thluk nena an dawn nghal a ni a. A tam ber chuan mual min liamsan tawh lehnghal. Thlan aṭanga thovin vawiina an sak dan hi rawn ngaithla ve ta se an lung a awi meuh na maw chu?

A thu hrimin mithiamte sawi ṭhin, ṭhang hlui leh ṭhang-thar kar awl (generation gap) an tih hi chu a lo awm nameuh mai. Ṭhangtharte chuan zai remna rimawi leh chhepchher ringtak, mihring aw lang viai viai an duh a. Keini chuan mihring aw kha a thu lam chiang taka hriat theih, a remna ri chu a zai chawi tawk kan duh thung. Ṭhangthar duh tawka ring chu kan bengah chuan ‘rimawi’ ni lovin ‘bengchheng’ a ni tlat. Hei hi kan sawi tak ‘generation gap’ hrilhfiahna tha tak a niin ka hria.

Hetianga kan hla serhte pawh Synfo meuh kaihhruaina hnuaia kan chawhchawrawih takah chuan, ‘hla humhalh’ kan tih fo pawh hian hrilhfiahna thar a ngai ta a nih hi, tihte pawh ngaihtuah loh theih a ni lo. Ka ngaihtuah ulh chang phei chuan, keini ang rilru sawhsawn hlei thei loho hi chu ṭhangtharte tan hian ‘rohlu’ ni lovin ‘hnawksak’ kan ni ta mai em aw? tihte hi ka ngaihtuah rum rum ṭhin. Mahse, chutiang tur chuan ka indah phal si lo.

Engpawh nise, ṭhangtharte nen Pathian kan la fak ho thei a. ‘Praise On’ tih thupui ang hian mahni tlin ang tawk te tein Pathian hi fak zel phawt ila. Pathian ber kan fak theih chhung chuan kan tisual tampui lovang chu maw?

- Lalbiaktluanga,

College Veng