Ram pum huap politics leh Mizoram
Congress vanglai kha chuan Mizo mipui-in sorkar laipui nia kan hriat tak kha chu Indira Gandhi, Rajiv Gandhi, Manmo-han Singh te kha an ni maiin a lang a, tunah erawh BJP an sorkar tawh avangin sorkar laipui hi Narendra Modi ber hi a nih hmel a, hengte hi Mizoram mipui hian eng angin nge kan lo dawnsawn tih hi chhut tham a awm a ni.
Congress lo luh dan kha chu mipui nawlpuiin politics kan buaipui hma, Mizo Union nena in merger deuh kha an ni a, anni lo luh dan kha chu kan inrin loh laia lo lut ang an ni a, Congress khan Union kha thlak hlawk lo mah se kan ta riaua hretu kha tun hma khan an awm nghal a, tunah phei chuan Congress hi chu mi tam tak chuan tualchhung party angin an en a.
BJP kan hmelhriat dan hi a tirah a fuh loh avangin an thil ṭha tihte pawh hi kan lawm ngam lova, an chet dan en hian kan hlauhthawn BJP kha chu an niin a lang lo a, kan insawi ṭhatna ang kha chu a ni chiah lo. BJP chu Hindu sakhua nena inzawm an nih vangin India rama sakhaw dangte tihbova Hindu lalram din an tum a, chuvangin kristian an chep ang a, Hindu an inhrosa ang a; Hindu ni ve lo tan chuan India ram hi hrehawm hluah hluah tura ngaihna kha a tam hle.
Tunah hian BJP hnuaiah kan awm a, tun hmaa kan awm dan nen thil a inthlak lutuk lova hriatna a awm a, anni hi Hindu lalram din tur tia kan insawi ṭhaih ang kha an ni ta lovin a lang a, BJP nih duh leh BJP hi a ṭha a ni titu hi Mizo zingah pawh ṭhahnem tak awm tawhin Kristian te tan pawh he party hi luhna tlakah an ngai ta.
Sorkar laipui zawmtu nih ṭhatzia chu Congress in an lo hre tawh a, chu chu an party tun thlenga vung taka an kal theih chhan leh MLA 34 zet mai an la neih chhan hi a ni. MNF in hei hi an hai bik lova, BJP nih chu duh chiah lo mahse anni nena in mawngzawma kal hi an duh a, chuvangin MNF leh BJP pawh an thawk dun ta a ni.
North East Demo-cratic Alliance (NEDA) chu BJP-in India hmar chhakah a din a, a hnuaiah hian MNF pawh an awm ta a, Mizoram politics hi India sorkar laipui politics nen a inzawm ta chiah a, Congress leh MNF hi khu lama Sonia leh Advani te nen a inthlunzawm ta pât a, sawi hran hleihtheih a ni dawn ta lo.
- Ramhluna