An ṭobul chhui rawh u

Mipuiin kan hmelhriat mi tam tak hi mi ziktluak tak, mi fel leh belh-chiandawl tak an ni a, mipui hmelhriat
ṭhenkhat erawh hi chu belhchiandawl lo tak an ni. Mizo mipuite hian thil kan chik peih lo a, tuna an lan dan aṭangin thil kan teh mai ṭhin a, hman deuhah tunge a nih a, eng angin nge miin an sawi ṭhin? tih hre chungin kan hmalam i thlir ang u.

Tu emaw chu a lo langsar ta viau a, eng engah emaw a inhmang a, midang tan thilpek a pe thur thur a, media-ah a larin fak pawh a hlawh a, mahse a hre chiangte chu an lo nui a, a hausak dan an hriat chian avangin an nuih ru tet tet a, mi hausa ni tura a kalkawng an enin an hmusit zawk hial a ni.

Mi pakhat chu engineer a ni a, sorkar hna a thawk zui a, sorkara a hlawh zat chu a veng pumin an hria a. He pa hian mak tak maiin pawisa a ngah a, in hmun ṭha leh motor a lei thei a, an khaw tan pawisa a thawh a, kohhranah pawh thawhlawm pangngai ni lovin thawhlawm hlawm hming puan chiin a thawh a, an khuaa amah hre chiang lo chuan an ngaisang hle a, mahse amah hretute chuan a hlawh zat an hriat avangin an ngaisang miah lo.

Tu emaw pakhat hi a awm leh a, tlemlai deuh aṭang khan a hausa chak leh lutuk a, miin an rinhlelh thu an sawi sep sep a, mahse amah chu hmaichhanah an hrilh ngai si lo. Chu mi chu mak deuh chu an vengin an ngaisang tlat a, veng dang aṭangin hmusitin sawisel mah se an veng tana a hnathawh, sum a ngah vanga a thawh chu an ngaihsan avangin khawtlangah pawh thuneitu a ni phak hial a, mahse a hre chiangte chuan a belhchian dawl loh thu an sawi ve tlat.

Ram pum huapa hausa kan tih te, tuna mi thilphal leh mi dang tana inpe kan tih tam takte hi chu sum thianghlim vanga hausa, thawkrima hausa an ni a, tun dinhmun an thleng thei hi an chhuanawm. An ṭobul hi han chhui chiang ila an chhuanawm ṭhin a ni.

Hetiang deuh bawk hian mi hausa leh langsar ṭhenkhat, tun hnai maia kan hriat deuh hluai, midang tana thilpek pe pawp pawp mai, an thilṭha tih apiang puangzar zel chi hi an awm nual a, heng mite hi han chhui chiang ila, kum 10 kal taa mi naran, a
ṭhente chu mi hmelhriat loh, a ṭhente chu an hnathawhna leh an venga mi hmingchhe takte an lo ni a, mi hi an ṭobul chhui chiang hmasa ṭhin rawh.

Tuna an lansarh vangin ngaisang ringawt suh - Mizote hian mihring kan ngaihsan leh dah san turte hi a chhuiin i chhui hmasa ṭhin ang u - kan tunlai khavwelah hian, chu chu hnam damna a ni.

- Lalrinsanga