Tawlhlohpuan lo chhuah dan

Vanglaini chanchinbu, Novem-ber ni 12, 2016 (Inrin-ni) chhuakah khan Vaphai lal Pu Lalrokhama Hualngo k-91 mi, kum 2014 a boral ta hriatrengna lungphun tum a nih chu ka lo hmu a, a lungphun tur anih thu ka hmuh rual hian, kum 2011 October ni 23 a Aizawla a lo zin a, Bethlehem Vengthlanga a thlen ina kan ṭhiante nena kan zu hmuh ṭuma kan kawmnaa a thu min hrilh, ‘Tawlhhlohpuan lo chhuah dan” tih hi ziaka ka dah ṭhat hi ka hre chhuak thut a. A lungphun tur pual hian han pho chhuak ve ila ṭhain ka hria a. Pu Rokhama hriat dan leh mi dangten kan hriat dan a inang em tihte pawh hriat nan a ṭha awm e.

Amaherawhchu, a kum chungchangah hian kum 2011 a kan kawm ṭum hian kum 84 a inti a, ka chhinchhiah dan ang hi chuan kumin 2016-ah hian kum 89 ni turah ka ngai a. Vanglaini-a lungphun tur chungchanga sawmnaah hian kum 91 tih a ni si a. Amah ngei kan kawmna leh kan ziah nghal, kan dahṭhat a ni si a, min ti buai deuh hlek a, kan hre sual palh anih chuan a chhung ten min hrethiam se ka duh a, ka han tarlang tel hmasa ve hrim hrim anih hi. Hemi ṭuma ka kalpuite hi Lalthlamuana Ralte PUC zirtirtu, Lalhruaitluanga Chawngte leh Vanlalremruata Tonson te an ni.

Hemi ṭuma Vaphai lal Pu Lalrokhama’n Tawlhhlohpuan lo chhuah dan thawnthu ngaihnawm tak min hrilh dan chu hetiang hi a ni.

“Hualngo pasalṭha Darh-nawka, ral pawh a that ṭeuh tawh, Sakei pawh a kah hnem avangin a khum pawh Sakei phawa hual chhuak vek khawpa pasalṭha hi a awm a. Ral beia rammu ṭhin a nih avangin
ṭum khat chu a nupui hnenah, "Khai le, ral bei reng ka ni a, thih hun ka la nei dawn a. Ka ruang tuamna turin puan sei tawk, fem nei min tah sak rawh, fem sei tawk tak i neih tir dawn nia," a ti a. A dam lai ngei emaw, a thih hnu pawha a ruang tuamna thama lianin a tah tir ta a. A puan chu a var a ni a, ṭing hmangin a dumin a tial tir a. A nupui hnenah chuan,"He puan hi ka bat anih chuan ral hmaah leh sa hrâng hmaah ka tlân dawn lova, he puan hi ka ruang tuamna tur a ni," tiin a nupui chu a hrilh a.

Puan an tah zawh hnu hian Dartetui leh Uihri khua, Sailo leh Fanai Lalte chuan an khua chu an rawn run ṭan ta mai a. Khuaa ral an lo lut tih an hriat chuan an Lal ina Darhnawka lêng lai chu an va hrilh a, a lo haw a, Tawlhlohpuan a va la a, an lal luhka aṭang chuan, "Kei Darhnawk Sakeia, hetah ka awm e. A ngam chuan min rawn bei rawh u, a thi ngam ngam lokal ru," tiin a silai chu a kap ta thuai ṭhuai mai a. Ralho chuan, “E khai, Darhnawka a awm tlat mai, beih ngam chi an ni dawn love, i hawsan mai ang u,” an ti a, an ṭinsan leh ta a.

Darhnawka chuan, “Chuti taka min rawn chote chu kan um let tur a ni’ a tih tlat avangin pasalṭha ṭhenkhat nen an um let ta a. Farkawn ram, Lurh lamah an umzui a, râlho chuan ṭiau an lo kan hman a. Ṭiau ral an thleng tih an hriat hnu chuan an lo chau deuh nen lungpui chungah an chawl a, a vaimim ken chu a ei ta a. A ṭhiante chuan an mi um ten an rawn kah an hlauhpui avangin lungpui chunga ṭhu lo turin an ti a. Ani chuan a lo hlau awzawng lo mai a, “A hlau chu phaiphuk karah khan awm rawh u,' a ti mai a. Rin ang ngeiin Ṭiau ral aṭang chuan Lungpui chunga a ṭhu chu an rawn hmu ta a, a chet vel zawng chuan a ban hnuaia a puan fem uai chu a che suau suau a, ralho chuan, 'Sawpa saw mihring a ni lo ve, hmul a nei a ni,' an ti a, an tlanchhe leh ta a. An tlanchhe thawm chu hriain an umzui ta a. A
ṭhiante chuan hlau hle mah se, a duh chu haw mai turin a ti a. Anmahni runtute tlanchhia chuan, “Hei kan silai hian min ti khawmuang mai mai a ni” tiin khâmah an paih ta a, chu kham chu, ‘Fanai silai khawh thlakna' tih hming a chawi phah ta a ni.

Dârhnawka chuan a umzui zel a, an zinga chau deuh, hnuhnung fal chu a man ta a. Sa leh râl a thah hnem tawh avangin seh hlum ngei a duh a. Sakeiin ran a seh ang maiin a hrawkah chuan a seh ta ngat ngat mai a, rei tak a seh hnu chuan ral pakhat chu a seh hlum ta a ni. Heti taka a huaisen zual chhan hi Tawlhlohpuan a bah vang a ni a, hei hi he Tawlhlohpuan lo chhuah dan a ni,’ tiin min hrilh a ni.

- Lalnunṭawma Fanai