KRISMAS SUAK

Krismas kan sawi ruala kan mitthlaa rawn lang hmasa ber chu Isua ni lovin kawn chei a nih ka ring!

Krismas rim a nam leh ṭan ta. Kawn chei hi a krismas lai takah kan ngai emawni tih turin kan phe leh suau suau dawn a nih hi. Vur tla kha krismas riauin kan han hre ve leh ngawt pek ang a, sapho snow-man siam kan hmuh mitthla chungin lapaw-man/ cotton-man kan siam ve leh ngawt ang. Miten snow is falling an tih laiin thermocol is falling kan lo ti ve hap hap dawn a ni.

Snow chu sawi loh, vaipa ice-cream zawrh kan hmuh hi vur kan hmuh awm chhun a nih laiin, dashing through the snow, in a one horse open sleigh... tiin inla changkang deuhin kan thawmhnaw thar, snapdeal-a kan chah nen kan krismas leh ang. Diwali laia light chi hrang hrang an sale bang ho kha kan zuk chah chhuak ve leh ang a, kan thinlung eng si lovin khawlai tihen tumin kan hmanhlel ang a. Kan hydel project-ho lah ‘project’ an la ni ngar ngar mai bawk si a, thla en loh zana current a awm loh lehnghal phei chuan kan kawn chei hnuaiah thim thuah hnih a rawn thleng lo vang tih pawh a sawi theih loh.

Zawlnei ka ni lo va, zawlnei fapa pawh ka ni hek lo, mahse ka hrilhlawkna ho hi chu a thleng dik palh maithei a ni. Birthday boy ngaihsak miah lovin birthday kan lawm leh ang a, Isua dah ṭhain krismas suak kan hmang leh hup hup dawn a nih hi. A te ber aṭanga a lian ber thlengin kan hlimna leh kan hlawkna tur kan ngai thupui leh ber ang.

Thil man a to sawt ang a, zurui an kat nuk nuk ang a, masi mana sex hmang
ṭan ta an pung leh hluai ang. Krismas kan hmang chu kan inti vek si ang a, Isua erawh kan hrechhuak leh zeuh zeuh ang. Kumin krismas zet chu, kum dang ang bawk a ni leh dawn a nih hi!

Isua piancham kan lawm alawm ti si in keimahni chiah kan inngaihtuah leh ang a. Ṭhenkhat an rui ang a, ṭhenkhat an rai ang. A ṭhen Biak In chhungah kan lam ang a, a ṭhen kawn chei hnuaiah. ‘Eng nge in tih a?’ min ti sela, “Isua, lei leh van Lal ber, kan tana a pianna ni kan lo thleng leh dawn ta a, kan lawm a nih hi,” kan ti ṭheuh lawi si ang. Veng mawnga hmeithai pakhatin krismas lo thleng tur a huphurh em emna chhan chu keimahni hi kan ni tih erawh kan hre leh lo ang a. ‘Khualbuk vengtu’ suihlung mawl leh mawl loh tih velah kan inhnial leh ang a, Pu Rokunga’n simile leh metaphor a hman thiamzia te kha hrelo hrilhin kan inhrilh leh emaw a ni ang.

“Krismas kan thleng dawn alawm mawle. Damdawiina damlo na tak tak te, nuchham ina khawhar taka naupang awmte tan hun ka nei lo. Tar chawmna ina thih hun nghak ringawta ṭhu tlawk tlawkte chu an awm awmin lo awm ve mai mai sela, jail-a tang mekte chu an duh leh lo masi ve sela, an peih loh leh an thu alawm. Krismas alawm mawle, kawr thar lei ka ngai a, cake order ka lam dawn a, kawn chei en turin zanah ka tlan kual dawn,” tiin sawi chhuak lem lo mah ila, chutiang rilru chu kan pu a ni tih kan thiltihin a rawn nemnghet ang.

Chu chu kan rilru puthmang a nih tlat avangin krismas hmasa ber leh vawiina kan krismas hi an inpersan ta em em a ni. Krismas suak kan hmang ṭhin tih loh rual a ni lo.

Krismas hmasa ber chu ran chaw pekna thlengah a rawn inṭan a nih kha. Ran chaw pekna thleng chu mi rethei berh em em mai mutna a ni lo va, lei leh van lal ber mutna a ni. A inngaihtlawm theihzia rawn in show off a duh vanga ran chaw pekna thleng rawn thlang a ni lo va. Mi tlawm berte pawhin kan ban phak turin hmun tlawm berah bul a rawn ṭan mai zawk a ni. Mi tlawm ber, mi chanhai leh riangvaite chu a rawngbawl chhung zawngin a ngaih pawimawh ber an ni zui ta zel a, a tawpna pawh mi hnuaihnung, misual nung tlaklote thihna hmun-kraws a ni tih i hriat kha.

Tunah erawh mi hausate inawmhlimna avangin krismas chu miretheite ban phak lohah kan sawn hla hret hret zel chu a nih hi. Incheina te, ei leh ina kan intuituahna te, intihhlimnate kan buaipui tak viau avang hian krismas tak kan hlat hret hret ni berin a lang.

Krismas kan hriat hmasak bera van mipuiten krismas thuchah an rawn puan chu ‘Rem thu leng rawh se’ tih kha a ni. Bible-in remna a tih chu chu buaina awm lo a ni satliah lo va, ‘ṭhat tlanna, induhsak tawnna nun’ a ni (I awih loh leh Pu Chuau-a zawt rawh). Krismas kan lawmnaah kan inhau lo va, kan insual lo va, amaherawhchu remna a thleng em tih erawh ngaihtuah tham a ni. Mi te ber leh lian berte inkarah induhsak tawnna a thleng si lo chu a nih hi!

Keini chuan celebration kan dah pawimawh ber a, kan celebrate chhan erawh engah kan ngai lo thung. Football khelh laia pet goal si lova goal awm lo celebrate kan ang i ti ve lo maw? Celebration hi a pawimawh lo tihna ni lovin, a aia pawimawh zawk a awm tihna a ni. Kawn chei hi krismas lawmna ropui tak a ni ngei a, amaherawhchu a aia ngaih pawimawh zawk tur a awm tihna a ni.

Krismas lo thleng tur hi mirethei zawkte hian an huphurh lohva an nghahhlelh zawk theih nan Isua ngaih pawimawh berte hi i ngaih pawimawh pui ve ang u tihna a ni. Krismas tih leh damlo kan, tan in tlawh, nuchham ina thilpek tihte hi kan rilrua rawn lang hmasa ni tawh se la. Pet goal ve phawt ila, tichuan kan celebrate dawn alawm.

Ro rel tura a lo kal leh hunah chuan, a ding lamah leh a vei lamah min la din tir ang a, “Ka piancham lawm nana in kawn in chei nan khan cheng engzah nge in sen?” tiin min zawt lo vang. “I pheikhawk thar kha Jimmy Choo nge pang shoe?” a ti dawn lo. “Ka ril a ṭamin nangnin ei tur mi pe em?” a la ti dawn. “Ka tui a halin in tur mi pe em? Mikhual ka nihin mi thleng em? Saruak ka nihin puan mi sintir em? Ka dam lohvin mi kan em? Tan ina ka awmin ka hnenah in lo kal em?” a la ti dawn (Matt. 25:30ff). “Tih tak meuhvin ka hrilh a che u, he’ng ka unau te berte zinga mi pakhat chunga in tih chu ka chunga ti in ni,” tihah khan a duhtawk mai dawn lo va, “....in ti lo chu ka chunga ti lo in ni,” a la ti dawn.

Isua piancham lawm nana kan tih kan kawn chei hnuaiah hian Isua tel lovin kawn mawi zan kan hmang a nih chuan kan tu leh fate hian krismas a lo thlen apiangin Isua aiah kawnchei an hrechhuak hmasa ber zel ang. Lal Isua ngaih pawimawh ber kan ngai pawimawh ve lo a nih chuan, “Anchhe dawngte u, kumkhaw mei, diabola leh a tirhkohte tan an buatsaihah chuan mi kal bosan rawh u,” a tihte zingah khan tlar hmasa berah kan intlar ṭhap ang tih a hlauhawm alawm mawle.

- Zonunmawia (Puipuii Pa)