Bank hnathawktute an fakawm
Tunhnaiah sorkar laipuiin ram tana a ṭhat zawkna tur nia ngaiin Rs.1000 note leh Rs. 500 note a ti thi thut mai a, a ram buaipui kan buai a. Sum nei lem lo aṭanga hausa tawntaw thlengin kan buai a, hetiang mipui lam kan buai viau lai hian a buai ber chu bank hnathawktute an ni.
Pawisa thi tur thleng an awm a, an account-a deposit tum an intlar a, a ṭhenin hmanchawp tur duhin ATM leh branch hrang hrang bank-ah mipui an inzial tup tup a. Bank-a thawktute lam lahin he thil hi hre lawk bik hek suh. Reserve Bank of India (RBI) instruction ang anga awm mai an nih avangin an tan lo in ruahman lawk theih thil engmah a awm bik loh avangin an buai dan hi a namai lo hle a ni.
RBI aṭangin Rs. 2000 note thar a lo thleng a, a sem sawm dan te, pek chhuah zat tur te, nikhata ATM aṭanga draw theih zat tur ngaihtuahin an buai phili ve em em a; Mizoramah pawh SBI hotu lian pawhin an kal dan tur hre lawk loin RBI thupek ang zelin an kal a, mipui tana an duty hi an bei ngawrh lehzual a, buai namen loin an buai a tih theih awm e.
Bank-a thawktute hi sumdawng tiin kan sawi fo a, mahse mipui rawngbawl tak meuh meuh an nihna lai a awm. An rinawm a ngai a, a dawrtute biak ṭhat a ngai bawk si. Tun ang hun khirh tawn lai phei chuan mutmu pawh an tuah hman meuh lo. SBI chang ni lo, Mizoram Rural Bank te, Apex Bank leh Bank danga thawktute pawh an ek cheh ṭhut ngawt bik lo. RBI aṭanga thu thar awm ang angin an kal a ngai a, an beng an chhi reng a, an mahni dawrtute tan theihtawp an chhuah vek a ni.
Engpawh nise tun ang em ema Bank-a thawktute thawhrim leh buai hi an la hmachhawn lo hial mai thei. Chuti chung chuan an customer-te mamawh phuhru vek thei lo mahse theihtawp an chhuah a, a lawmawm ngawt mai. Chu mi piahah chuan Inrinni leh Pa-thianni-ah te hial mi-pui dawr theihin SBI chu an inhawng a, mipui tam tak phurrit an chhawk nasa hle a, a lawmawm ngawt mai.
Mipui lamin harsatna kan tawh laia theih tawp chhuah an off day pawh sawi loa hna an thawh avang hian an hah phah hle ang a, mipui lam erawh kan zangkhai sawt dawn a ni. Hetianga mipui tana thawk ṭha bank zawng zawnga thawktute hi an fakawm tak zet a, fak pawh an phu hle reng a ni.
- Lal Rinmawia