Ruihhlo ngai buaipuitu

Ṭhalai zing tho hma an tam a, lehkha zir leh taksa sawizawia chhuak pawh an tam. Thil ṭha lo leh mawi lo tam tak karah hian a ṭha leh entawn tlak tam tak an la awm. Heng mi ṭhate thawm hi a rin loh avangin kan ram ṭhalaite hi an chhe ta vek tihna a ni lo, mi ṭha hi a tam zawk an la nih ngei a rinawm.

Veiawm ta chu, kei ngei pawh hi zinga taksa sawisawi ṭhin, Aizawl chhim leh hmar zawnga fang ve fo, taksain a tlin tawka thlan titla ve ṭhin ka ni. Zinga tei chhuak ṭhin ka ni a, zan lam brouak pawh tlem azawng chu ka hria, mita ka thil hmuhte’n ka ngaihtuahna a tithui ṭhin hle.

Tun hnaia khan chanchin tharah, hun eng emaw ti aṭang khan Vaivakawn veng chhungah ruihhlo ngaite an pung khawm ṭhin tih an ziak a, an tam zual lai chuan mi 200 an chuang ṭhin. Kal khawm ṭhin zinga 60% vel chu Ṭawngṭai Bethel Camping Centre aṭanga chhuak an ni.

Vaivakawn khawtlang hruaitute chuan an vengah Aizawl leh khaw dang aṭangin ruihhlo ngaite an kal khawm ṭhin a, an pun khawm tam lai chuan mi 200 chuang an ni ṭhin an ti a. Khawlai hmun ualau tak taka inchiute an awm fo avangin nunau tan a him lo a, rûkruk leh inrawk a pun phah nasa, an ti a; biak in, anganwadi centre, YMA Property House bakah mimal in eng emaw zat rawk tawh tih an sawi.

Vaivakawn veng chhunga ruihhlo ngai pung khawmte chu pawl hrang hrangin ei tur an pe ṭhin tih an sawi bawk a, hei hian ruihhlo ngai pung khawm a tihtam phah a, ei tur pe turte chu anmahni hriattir hmasa ṭhin turin thuchhuah an siam bawk.

Sorkar leh kohhran lamin ruihhlo a buaipui nasa tial tial a, nghawng a la nei chho ngei ang. Tunlai Aizawl khawlai awm dan ngaihtuah chuan kan hmalakna hrang hrangte hi a la tawk zo lo niin a lang a, hmalakna chak leh lian tham zawk pawh kan mamawh.

Ngaihtuah tel ngai ta chu, social media lama ruihhlo veite hmangaih ni awm taka lang, an dikna chanvo leh a hrang hrang sawi zuah zuah ṭhinte kha khawiah nge an awm zawh tak tih hi a ni. Thua sawi a awlsam a, mi rilru hneh tur taka social media-a mi dang khawngaih leh hmangaih ni awm taka lan pawh thil theih tak a ni, a taka chet chhuah erawh a awlsam lo.

Kohhran demna thu pawh a ri fo. Kohhran hian a thil tih ṭhate hi a puanzar dup dup loh avangin a che lo a ni lo a, a chet chhuahna hi camera hmanga a lak zel loh avangin a che nep tihna pawh a ni hek lo; puanzar chin tawk a neih vang mai a ni tih hriat a ṭha ang.

Ruihhlo enkawlnaah home leh pawl ṭhenkhat chet danah kan duhthu a sam lo a ni mai thei, hei erawh ngaihtuah chiang ila–chhungte pawhin an enkawl hleihtheih loh dah khawm an ni ṭhin a, lehkhabua inziak ang veka chet a awlsam lo ang tih a chiang.

Chuvangin, mi dikna chanvo kan sawi vawng duh a nih pawhin, mi dang pawhin dikna chanvo an nei ve tho tih hria ila; kan thil tihin eng nge a nghawng dawn tih ngaihtuah tel hmasa ṭhin ila a duhawm hle.

A pawimawh ber chu, mi dang kuta dah mai loin, indem leh insawisel mai loin, kan zavaia ṭangrualin ruihhlo hi kan do a ngai.

- Lalrema, Aizawl