SAWRKAR HNATHAWK PHUNCHIAR

Kan veng tlangval pakhat ka hmuh zen zen loh hi, kan inhmuh ṭumin, "I ṭha em? I la office ṭhin em ni? tiin ka zawt a. "Aw, office ṭhin e, tunlai phei chu ka kal hmain ka haw tlai ṭhin khawp mai, hun kan vawng dik thlap thlap tawh mai a nih hi," tiin min chhang a. "A va ṭha ve," ka tih chuan, chu tlangval chuan, "Nimahsela, ka thawhpui ṭhenkhatte chu an phun an phun mai a, an ninawm ṭhin kawp mai," a ti. "Eng vanga phun phun nge an nih a," ka tih chuan, "Office kal hun vawn dik lutuk hi an ning a ni ang," a ti a. "A va mak em, kan ram tana hna pawimawh lutuk thawktu an ni a, kan ram leh hnam hmel lanna an ni si a, engtia hun vawn dik chu ning mai nge maw an nih le,” ka ti rilru mai mai a. Hun vawn dik hi zahawmna a ni si a.

Sawrkar hnathawkte hian hun rei tawh tak aṭang khan hun vawn dik tumna hi an nei lo emaw tih mai tur a ni tawh a, tuna hun han vawn dik leh chu an tan phurrit a ni zo ta ni tur a ni. Hetih lai hian, mi ṭha tak tak mai, hun vawn dik nuam ti em em pawh an tam tho. Nimahsela, mi ṭhenkhat phunchiar avanga sawrkar hnathawk zawng zawngte phun phun an ni lo tih chu kan hre ṭheuh awm e. Kan Bible-in, "Ka tlakchhamna thu sawi zawng ka ni lo va, kei zawng eng ang pawhin awm mah ila, lungawi zel ka ching tawh si a,” (Phil 4:11) a tih ang hian Mizo Kristiante hi awm thei ṭheuh ila a va ṭha em.

Sawrkar hnathawk nu pakhat pawh hi office kal hma a ngaih tak avangin tuk tin hian a ei rawngbawl pah hian a phun a phun mai ṭhin a ni awm e; a fapa naupang te hian, "A nu, office kal tawh lo mai rawh, school-a ka ṭhianpa Mawia nu pawh office kal loin bazarah thil a zuar ṭhin a, kan school banah a thil zawrhnaah kan kal ṭhin a, thil tui deuh deuh min ei tir ṭhin a, a nuam lutuk asin, Mawia nu bulah i ṭhu ve ang a, a nuam ngawt ang," a ti a. A nu chuan, "Office kal lo ila , eng nge in ei ang," a tih chuan, "Mawia te pawh a nu office a kal lo a, ei tur an nei tho asin" a ti a. A nu chuan, "Bazara thil zawrhte chu ka peih hleinem, zing thawh hma a ngai ropui si a," a ti bak hlar mai a. A fapa chuan, "Mawia nu ai daihin office chu i kal tlai asin," a ti reuh a.

Mihringte hian chan tawka lungawi zawng har kan ti a nih hi. Mizoramah hi chuan sawrkar hnathawkte hi mi vanneia kan ngaihte an ni a, "Lawm ulangin, nasa takin hlim rawh u," (Mt 5:12) tih mai hi an awl ṭhin a ni.

Ni e, a dik khawp mai, mi tam takin sawrkar hna thawh ve kan chak em em a, nimahsela, sawrkar hnathawk ṭhenkhatte lahin lungawina reng reng an hmu bik si lo a nih hi. An zavai chuan an ni lo, mahni hnaa lungawi em em leh taima tak tak an awm lai hian, lungawi lova phun phun an awm ve bawk ni tur a ni.

Nu pakhat thingpui dawr siam pawhin, "Office kalte thingpui pek chu hahthlak tak a ni, an duh dan a rual loh chu thuhran ni se, phunchiar tak tak an tam em mai a. An chenna veng leh khuaa khawtlang leh kohhrana inhmang em emte pawh office-ah chuan ringtute tiha mawi lo tur hi tih hreh miah lote pawh hriat tur an awm a ni," a ti.

Chuvangin, sawrkar hnathawk duhawm tak takte u, kan ram leh hnam hmasawnna hi in kutah a innghat asin; Pathian ṭih chungin, rinawm tak leh taima takin thawk teh u. "In rilru putzia chu tangka ngainatna tel lo ni rawh se, in thil neih chhun chhunahte chuan lungawi rawh u," (Hebrai 13:5) Lalpa malsawmna kan ramin kan dawn theih nan.

- Hausanga Hauzel