Kawng chhiah sorkar ngawi reng suh se
Mizoram châk lakna ber Sairang leh Lailapur inkar kawng chhe lutuk hi ngaihmawh tham a tling tawh. Pawl hrang hrangin sorkar an dem a, hnatlan rawtna te, road block leh thil dangin hmalak an tintuah mek zel. He hunah hian sorkar pawh ngawi reng loin theih ang tawk tawkin hma la ve teh se.
Mizoram leilung hi state dangte ai chuan a chhia tih hriat a ni a, a hnip a, alkatra chhah tawk pawhin han luan chhuak mah se, a foundation lam a hnip miau chuan a tlo tak tak thei lo. Chuti chung chung chuan sorkar hian chak zawka a hmalak a ngai a ni. Mipui thinrim tawng buak a nih hma hian theihpalingkawha ṭan lak a ngai ta e.
Sairang leh Lailapur inkar hi National Highway Infrustructure Development Corporation Ltd (NHIDCL) enkawl deuh vek a ni a, anni hian tender-te chhuahin constuction company hrang hrangin an chhang a, chak taka hma la tura beisei an ni. Kan lifeline ber heti em ema chhia hi state khat ve rêng ruangah chuan a zahthlak ta. Sorkar hian NHIDCL lam pawh theihtawpin nawr se, tunah alkara luan hun a ni awzawng lo a, lung hmangin kawng khuar nasa lutuk chu hnawhin chîl rual rih tal se a ziaawm ngei ang.
Hman ni lawk khan Kolasib aṭang kan haw chu Sairang lam kawng chhia an siam avangin block a ni a, kilometer tam taka thui kawng sirah bungraw chi hrang hrang phur truck an ding khat tlat a, a manganthlang hle mai. Kawnpui dai tlang kawng lah Kawnpui chhuk hmun hnihah kawng chhak aṭang lei leh lung a tla ṭhin a, chu chuan kawng a tinâl em em a, motor tê (light vehicle) veivâk an tam thei ropui si. Chumi piahah phai vaiho dawr bungraw phur a chho zawnga tlan an tâng nasa ṭhin bawk.
He tlang kawng tal hi a enkawltute'n ruahsur lai chuan vil deuh se zin mite tan a lawmawm khawp ang. Light vehicle takngial pawh a tâng fo hi a ṭha lo khawp mai. Tin, tlang kawng hi 407 truck leh a chung lam kal phal loh a nih lain, motor lian kal a awm ve leh ṭhin bawk a, hei hian lirthei veivâk a tibuai fo bawk.
Enga pawh chu ni se, kan state kawng hmun hrang hrangte hi fûr hma hian a enkawltu PWD leh a changtu Minister hian bengsika ngaihtuahin, theihtawp chhuah ṭhin tawh se a lawmawm ngawt ang. Ti em ema kanwg chhia min petute hi kan dem nasat luat hma hian hma han la teh se.
NHIDCL pawh hian an contractor-te thunun leh zual se a ṭha khawp ang. Pawl hrang hrangin kawng chhiatah an puh a, Mizoram aṭanga hnawhchhuah hial duh pawl pawh an kat ta nuk mai. Mahse, chuti maia an chunga kut thlak theih a ni lo tih pawh hriat a ṭha. Theihtawp chhuah tura fuih sauh sauh a ṭha ber awm e.
- Melissa Pa