Thu dik lova sawrkar beih ka dem

November ni 24, kum 2025 khan Facebook group lian takah a hnuaia thu hi post a ni a, comment a tam hle. A post-tu hi nu langsar tak pakhat a ni. A... sawi chiang law law ang, Ruatfela Nu a ni. Hetiangin:

SAWKARIN MIPUI A BUM LEH TA

"Nimin 23.07.2025 khan F&CS dept, GOM chuan thuchhuah siamin, Mizoramah petrol leh diesel a harsat loh thu a puang a. A harsat loh chuan mipuiah free sale rawh se. Sawrkar hnathawk lal chin leh MLA/minister tan a coupon hmanga duhtawka lak theih hi em ni harsa lo a tih. Tukin Kawnpui-Sairang kawng chhia an siam leh siam loh en turin motor pali-in kan inzui leh a. Petrol Pump zawng zawngah No Petrol & Deasel tih an tar vek. Sawrkar leh a hnathawk, mahni mipuite bum thin hi huatna chang i hria ang u."

Pi Ruatfela Nu ṭhahnemngaihna leh hmalaknate hi a ṭha tlangpui a, ram leh mipui ṭhatna tur a ni fo. Mahse, a ṭhahnemngaih lutuk vang nge, Mizoram sawrkarin thuchhuah (press statement) hmanga mipui buma a puh mai hi chu a dik lo a, a pawi hle a ni. A ti zialo ka ti tak zet.

23.7.2025-a Mizoram sawrkar thuchhuah, Supply Department thuchhuah IPR Department-in an puanzarah khan 'Mizoramah petrol leh diesel a harsat loh thu' ziah lan a ni lo va; chutih laia Pi Ruatfela Nu-in 'Mizoramah petrol leh diesel a harsat loh thu a puang a' a ti piap mai leh Facebook group lian taka a post hmiah mai hi chu a dik lo a ni.

Suppy Department statement-ah khan 'Mizoramah petrol leh diesel a harsat loh thu' ziah lan a ni lo va, Aizawl khawpui bika khatih laia petrol leh diesel awm zat an tarlang a ni. Petrol leh diesel 'A tam' tih emaw, 'A tlem' tih emaw, a awm lo hrim hrim a, 'A harsa' emaw, 'A harsa lo' emaw tih a ni lo bawk.

Khatianga kan Mizo nu langsar takin dik lo taka sawrkar a puh mai khan amah ka hmuh dan a tihniam rawih rawih. Thil dik lo ngaitheilo, thil dik leh ṭha duh, ram leh hnam hmasawnna duh, human rights lam buaipui em em leh environment humhalh duh em em nia kan hriat ṭhinin thu dik lo hmanga sawrkar a puh khan amah ka hmuh dan a tihniam hle a ni. Thu dik leh dik lo pawh ngaihtuah chiang lo leh thu dik hrulah dik lo deuh hleka sawrkar tihmualpho leh sawrkar beih pawh a hreh lo em ni ch aw ka ti rum rum zu nia!

Engpawhnise, Mizo zingah hian social media hmanga lansarh tum ngar ngar, nasa taka ṭan la hi 'hlui' eng emaw zat daih an awm ve hrim hrim niin a hriat a. Hetiang mite hian fing an inti duh phian a, an indah sang deuh ṭhin bawkin a lang.

Pi Ruatfela Nu a ni emaw, mi dangte pawh ni se, social media kan hman danah hian kan fimkhur a ngai hle mai. Kan rilrua awm zawng zawng hi post zel kher lo ila, kan post nghal zung zung zel mai chuan mualpho a hnai ṭhin tih i hria ang u. Tin, thil zawng zawngah hian inrawlh tum zel kher loh a ṭha bawk.

Sawrkar hian thil tih dik loh emaw, thil ṭha lo tih emaw, a tih tur a tih loh leh a tih loh tur a ti a nih chuan huaisen takin kan sawisel tur a ni a. Media hrang hrangahte pawh kan au chhuak tur a ni. Mahse, thu dik lo hmang chuan kan bei tur a ni lo.

- Lalduhmawia