Lianpui khuaa lungphun hluite (NATIONAL IMPORTANCE ATAN PUAN ANI)

Lianpui khuaa Lungphun Ropui hi ASI (Archeological survey of India) hian zan khat thil thuaa National Importance place atan a puang mai a ni lo. INTACH, Mizoram Chapter hian ASI, Guwahati-a Assam pum an enkawl lai aṭang khan heritage site-ah puang turin kan lo ngen tawh ṭhin a. Guwahati aṭang khan Vangchhia, Lungphun lian, Lianpui, Farkawn, Dungtlangte tlawhin an rawn en tawh ṭhin. Keimahni zingah Pu Lianhmingthanga (L), Pu Vanlalhuma Singson leh Nl. Lalchhanhimi, archeologist te pawhin hotu vaite kha an lo hruai zak zak tawh ṭhin a. Vangchhe daia Thlangtlak Gate an tih mai chu ni 17.2.2014-ah Protected Monuments of National Importance atan puan a lo nih tak khan, Lianpui leh a dangte hi engtikah nge an puan ve ang tih kan ngaihtuah ṭhin. Chutichuan, Aizawla ASI office chu kan nawr ve reng ṭhin a; nimahsela, anni pawh thuneihna vawrtawp neitu an ni lo va, Delhi Headquarters lam thu a nih miau avangin an duh dan danin an ti thei bik lo.

INTACH, Mizoram Chapter-in official tak-a Lianpuia lungphun hlui kan han tlawh chu ni 12.12.2012 (Nilaini) khan Pu P. Rohmingthanga (L), Convener, Pu C. Chawngkunga, Co-Convener, Pu Rinsanga Secretary, Pu C. Lalaudinga leh Pi Laldingliani te, mi panga hian kan han tlawh ta a.

A awmna

Lianpui hi Vangchhe piah hmar lam km. 8 velah a awm a, Champhai aṭangin km. 65 vel a ni. Ṭiau lui Mizoram lamah a awm a, a zâwn chhimchhak Myanmar-ah chuan Farzawl khua, Hualngo lal Lalvunga khua kha a awm. Kum 1730 vela Palian lal Lianpuia leh Hualngo lal Lalvunga te Farzawla an inbeih lai vel khan Lalvunga kha thah a ni ta a. Chung lai vel chuan Lianpuia chu Ṭiau thlang lamah khua a rawn sât a, chu a khaw sah chu ama hming chawiin Lianpui khua tun thleng hian tih a lo ni ta a ni. A hnu zelah chuan Hualngo lalna ram a ni leh ta tho a; mahse, lal bân hnu aṭangin lal bik awm loin vawiin ni hi a lo thleng ta a ni.

ASI hmun Important Heritage site ni tur hian thil harsa tak paltlang a ngai ṭhin. Aizawl hmuna Archeological Survey of India office an rawn hawn chinah phei chuan kan member Nl. Chhantei, archeologist hnenah National Importance Site-ah an puan dawn leh dawn loh kan zawt sek mai ṭhin. Ṭhangkhat lian, kum 15 lai a liam hnu leh bei a dawn rum rum hnuah National Importance hmuna humhalh turin ni 14.7.2025-ah puan a lo ni ta hi a lawmawm tak zet a ni.

Lianpui daia lungphun (megaliths) te hi a vaiin 86 niin ka chhiar a, a ṭhen chu tun hmaa humhalh a nih loh avangin a lo riral nual tawh a. A khaw mite hian tun hmain a hlutna tak an lo hre bik si lo a, a uiawm tak zet a ni. Tin, an daia lungphun awm khawm bakah hian a hran deuhah sulhnu hlui hmuh tur a awm bawk. Keini, INTACH, Mizoram Chapter hian lungphun lian hi nge an rawn puan ang a, Lianpui hi kan tih laiin, tun hnai kum 5 kal ta aṭang khan an first choice chu Lianpui tih kan hre ta a ni. Kan hotute hian Delhi lamah pawh an sawi reng ṭhin.

Mi ṭhenkhat chuan INTACH, Mizoram Chapter kalhmang leh an hmalakna hre ve lo ang main National Importance Heritage Site puan a lo nih hian kan thu kalhmangah hian kan sawi tel ṭhin lo. Dik tak chuan Vangchhe daia Kawtchhuah Ropui puan a nih pawh khan a tak taka thawk hahte chu an hming lam rîk a ni lem lo. Heng ancient monument, National Importance-a puan ni tur hian state sawrkar chu lu ber a ni meuh mai a, a nodal department chu Art & Culture a ni. A che vel leh meizang hlaptu ber chu INTACH, Mizoram Chapter hi Mizoramah hi chuan an ni ti ila a a sual awm lo ve. Chu chu Mizoram state-a kan dinhmun leh inkhai chhawn dan a la ni ber mai.

A tawp ber atan chuan, sawrkar, Art& Culture Department leh INTACH, Mizoram Chapter chungah lawmthu awm rawh se.

- C. Lalaudinga, Ramhlun Venglai, Ph . 9862769948