AIZAWL KHAWPUI LAI TAKAH NGAWPUI
Aizawl khawpui lai taka ngawpui siam i duh em? Aizawl khawpui boruak tihthianghlim nan a ṭha ngawt ang. Kan duh chuan kan la siam thei alawm. Assam Rifle an chhuak ta bawk a, an ram luah zawng zawngah hian thing phun khat vek ila kum 15-ah chuan ngaw a ni mai dawn alawm.
Chuta kan thing phun atana ka duhte chu herhse, ngiau, char, bul, tlaizawng, lenhmui, khuangthli, chawmzil, rihnim, theihai, lamkhuangte ni se la. Heng thingte hian boruak thianghlim min pe dawn a. Boruak an vawng dai bawk ang.
Khawvel lum zelah hian khawpui boruak nuam tak kan nei reng ang a, kan hrisel bawk ang. India ram pawn aṭanga lo kalten a ropui an ti ang a, India ram hmun dang aṭanga lo kalte lahin ropui an ti hle bawk ang. Ropui an tih ai maha nasain chu ngawpui chuan hlutna a nei nasa ang.
Nungcha chi hrang hrangin eden an nei thar leh hialah an inngai ang a. Vai rama sava leh nungcha ngampa taka awm ṭhin kan sawite aia nasain kan khawpui lai takah hmuh tur a awm ang a. A nuam ngawt ang.
He hmun, Mizopa chhiar dana ṭin sawmhnih hmun vela zau hian Mizote chu khawvelah hnam fing leh remhriaah min ṭhantir ang a. Khawvel lum zel vanga buai mek Khawvel hian a ram chhuante zingah min ziak lut ang a. Khawvel pawl ropui leh zahawm United Nation meuh pawhin chu ngaw hnuaia inhmuhkhawm chu thlahlelin, Mizoram sawrkar chu a rawn be fo tawh zawk bawk ang.
Khawpui chhung leh chungah sava chi hrang hrang leh nungcha chi hrang hrangte an inlár ang a. Hringnun tihlimtu leh tinuamtu a lo ni ang. Chu chuan hla phuah thiamte thinlung a titui ral thar ang a, thu leh hla ṭha a lo piang ṭuam ṭuam bawk ang a. Thu leh hla khawvelah kan lo hring thar leh bawk ang. Chu'ng chu zirlaiah kan han hmang ang a, zirlaiten an zirlai hring chhuaktu ngawpui chu ni tin tlan pel chungin an han zir ang a, nun hlutzia an man chhuak thuai thuai tawh mai dawn a ni.
Aizawl chhuah lam leh tlak lama a khuh; veng tam taka tui hna kang chat mekten nun thar neiin hna an rawn chhuah leh ṭiam ṭiam ang a, Tlawng tui pump theih loh thulha hman tur tuikhur kan nei leh bawk ang. A daihlima nula leh tlangval ṭhu dunte inhmangaihnate chu a hnunhnang bik bawk ang a, inṭhen pawh a tlem deuh ang chu maw le!
Kan pipute thangchhuahna hmun kha, hmel thar pua thangchhuahna hmunah kan siam thar leh a lo ni ang.
- K.Lalremruata