Unau duh takte u, rualin i tho ang u

Unau duh takte u, kan ram siam ṭha turin lungrual takin i tho teh ang u, tiin Kristian Hla Bu no. 587 hian min sawm a ni, ’Unau duh takte u, rualin i tho vang u, kan Pathian ral kapho i ṭanpui ang u,’ tiin. Tute nge kan Pathian ral kapho a tih chu ni ang le? Kohhranhote ni turah ngai ila, khawvela Pathian lal ram din hi kohhran hna pui ber a ni si a. Khawvel sawrkarte chuan an mahni lalna ram din tumin nasa takin an bei ṭhin a nih hi. Kan sawrkar hrawn tawhte pawhin kohhran chu ngawi mai mai se, anmahniin duh tawkin kan ram leh hnam hi enkawl se tih hi an duh dan niin a hriat a. Amaherawhchu, tuna kan sawrkar hrawn mekte hi chuan kan ramah Pathian lal ram din tumin an bei niin a lang bawk a. Chuvangin, Mizo Kristiante hi Pathian lal ram din tuma beitute ṭanpui turin i tho ang u, tiin he hla hian min fuih a ni.

"Kan ram tichhe theitu, dan sual min timangtu, tireh tur leh ngam turin i bei ang u," a ti a. Kan ram tichhe theitu, sual min timangtu chu eng ber hi nge ni ta ang? Tangka sum ngainatna sual hi niin kei chuan ka ngai a ni. He sualna hian kan hnam hi min tichhe nasa em em a. Kristian ram inti ve siin eiruk hluarna ram min nihtir a, sawrkar hnathawkte aikal lak duhnate a neihtir a, ruihhloa sumdawn duhna thinlungte min puttir hlawm a, dan loa kuhva ro tawlh ruk duhnate leh hmeichhiat mipat hman sualna khurah kan hnam hi mi hnuk lut nasa em em bawk a. Kan rama sualna lo pung nasa em em kan tih hi tangka sum ngainatna sual vanga lo awm vek a ni si a.

Chuvangin, kan ram tichetu leh kan hnam min timangtu sual chu Bible-in, ‘Tangka sum ngainat hi sual tinreng bul a si a, chu chu ṭhenkhatte’n an awt a, rinna chu an kal bosan a, anmahni leh anmahni lungngaihna tam takin a chhun tlang ta chuk a’ (1 Tim. 6:10) a tih ngei mai hi tuna Mizoram min tichhetu chu niin ka hria a ni. He sual do tur hian lungrual takin i tho teh ang u, a ti a ni.

Tuna kan sawi sualna hian kan ram hi min tuamna a rei tawh hle a, sawrkar kal tate khan an vulh lian a tih theih awm e. Sum leh pai tawktarhin vote zawn nan an hmang a, kut tling loa sum hmuh theihna kawng an hawng a, a thlawnin sum an sem a. Mipuite chu he sualna kawngah hian min hruai lut a ni ber a, a rah chu kan ram tihchhiat leh kan hnam min timangtu mai a ni thei a ni.

Kan ram leh hnam dinchhuah lehna tur hi kan ngaihtuah ngun a ngai ta hle mai. Kan hun kal tawhah khan mipuiin a thlawna sum hmuh beiseiin, a pe theitu nia kan hriatte chu kan intlawnsiak luai luai a. Sawrkarna fawng vuantu party hruitute chu kan pathian biak lo chauh a nih kha. Khaw tin leh veng tinah sawrkarna changtu party-te chu unit hruaitu nih inchuhin an inbei luai luai a. Unit hruaitute lah chu anmahni khua leh vengah chuan lal ber ni-ah inngaiin, an hawi pir hle hlawm a, an duhsak zawngte chu hamṭhatna dawntir theituah inngaiin an vawk lal lèn a; Inrinni tukahte chuan vawk sa zawrhnaahte an thaw lian thei hle a nih kha. Kan veng leh khua tihhmasawnna tur sum leh pai lo kalte pawh an thunun vek mai a, an mi leh sate duhsak nan an hmang ta mai ṭhin a ni. Zo khaw lamah phei chuan sawrkar hnathawkte pawhin unit hruaitute tihlawm loh hlauin an tlawn a ngai fo. Hna zawng laite tan leh thil sual tih avanga lung in tan leh tan loh chungchang thleng pawhin sum leh paiin awmzia a nei hle ṭhin a ni.

Kohhran hruaitute leh kohhrana inhmangte chuan kan ram leh hnam ṭhatna tur nia an hriatte pawh eng mah sawi ngam loin an kimki zo vek a. An sawi lo chung pawhin party ruih chilh ho chuan, chumi party lam chu a âwnin ka hria tiin an rinthu thuin an la hmehbel zuah zuah tho a. Anmahni politician intihoin dâwt leh phuahchawp hmangin an duh duh sawiin mipui an bum kual a, ram leh hnam hmangaih ber angin an insawi zuah zuah mai si a. Mipuite lahin sum leh pai a thlawna dawn loh hlauin kohhran hruaitute aiin polician-te chu kan zahin kan hlau zawk emaw tih tur a ni si a. Hei hian Mizote khawtlang nun leh Pathian rinna kawngah nasa takin a tichhia a ni.

Chuvangin, tunah chuan Mizoram kohhran hruaitute u, kan ram tichhetu leh kan hnam min timang theitu sual hi tireh tur leh ngam turin nasa takin i bei let ve ang u hmiang. Tun hma angin tute mitmei emaw veng tawh loin huai takin Lalpa lal ram din turin i bei ang u. Kan ram leh hnam hi Pathian tan hlanin, a lal ram a lo din ngei theih nan huai takin kohhran mipuite chu i hruai tawh zawk ang u, tiin he hla hian min fuih a ni e.

Kan ram timawi lotu sual tireh a, ngam turin kan Pathian hnenah chakna dil chung zelin, kan hnam zinga suala tlute an lo dinchhuah leh theih nan theihtawp chhuahin i bei tak tak teh ang u. Tunah hian, mei alhin thil a kâng duai duai angin kan ram hi sual a kâng duai duai a, kum tinin a kâng chhe zual zel mai si a. Kan zing aṭangin hremhmun panin mi an liam duah duah mai a nih hi, a va rapthlak em, a ti vawng vawng mai a. A va sawi chiang em. Kan tih tur kan tih loh chuan Pathian thinurna pawh kan tawng baw mai ang tih a hlauhawm tawh a ni. Kan ram dinhmun han en hian mihring leh nungchate tan pawh an him tawh si lo a, chuvangin, kan ram leh hnam hi polician-te kutah ringawt chuan i dah tawh lo ang u. Kan ram leh hnam damna turin Pathian rinchhanin Mizo Kristiante hian lungrual takin i bei teh ang u, a ti a ni.

- Hausanga Hauzel