CCM bawk aw

Kan hriat angin nikum October 2024 khan Council of Churches in Mizoram (CCM) chu Mission Veng Kohhran biak inah din a lo ni ta a, CCM-ah hian Mizoram kohhran pasarih kan tel a. Rambuai hnu hun rei fu eng emaw lai khan MKHC a lo awm a, hei hi kohhran rorelna ni lovin, sawrkar (Lt Governor) hmalakna aṭanga zawi zawia lo zi chhuak niin sawi a ni. A lo rei zel a, Mizorama kohhran pawl hrang hruaitute telna committee pawimawh tak a lo ni ta a ni.

Hun a lo kal zel a, kohhran hmalakna aṭanga lo ding chhuak a nih chiah loh deuh vang nge, duhkhawp lohna a lo awm a. Chutih laiin, Mizo Theological Association (MTA) a lo ding a, anni hian engti zawng emaw tala inzawmna neih dan an dap reng a, a ṭha hle. Hemi thu kal zel bakah kohhran pakhat rorelna sangber chuan CCM din thu hi relin, chumi thu kalzel chuan tun hi min lo thlen ta a, a lawmawm hle.

Kan hotute an taimain an thawk rim a, seminar-te buatsaihin hmun hrang hrangah awareness atan programme an siam mek zel a. Kohhran mipuite pawhin kan ṭawiawm tha hle niin a lang a, a lawmawm hle. Hetih lai hian, CCM-a tel rih lo kohhran an la awm nual a, chung kohhran hote pawh chuan an la rawn zawm ve thuai beisei ang. Tuna kohhrante kan inthlun khawmna CCM hi kan theih china Lal Isua ṭawngṭai hlawhtlinna pakhatah ngai ila, a dik ang. Kan hotute pawh hi i ṭawngṭaisak ṭhin ang u.

Kohhran inpumkhatna hi thlarau lam khawih thil a nih avangin a hlu a, kohhran rorelna ngei kaltlanga kan lo nei ta hi kan lawm ṭheuh tur a ni ang. MNF party kha a lo din tirh lam khan Mizote kohhran pakhata kan awmho kha an duh hle a, ṭhat pawh a ṭha a. Mahse, kohhran pumkhatna hi silai hmanga puitlin chi a nih loh avangin rambuai reh hnuah pawh kum sawmthum chuang fe a lo la ngai tihna a ni. Tuna CCM lo awm ta hi party lam zawng pawhin kan rama party lian tak MNF tan pawh lawm hlena tur a ni. Tuna rorel lai ZPM hotupa Pu Lalduhoma pawh hi hemi kawnga ṭhahnemngai mi a ni a, chuvangin tuna ruling lam tan pawh thil lawmawm tak a ni awm e.

Hetih lai hian, kan kohhran hruaitu ṭhenkhatte duhthusam sang tak, Mizote kohhran pakhata awm beisei ni àwm takte kan nei a. An duhthusam hi a ṭha hle a, mahse, a tak tak thlen har tak tur beiseina niin a lang. Tuna CCM lo dinna tur tak tak rel hmasatute hian CCM hi eng emaw la thlentir tura bul ṭanna angin an thlir lo va, rorelnain a tum chu–Mizorama kohhrante Council-a insuih khawm hi ni tawpin a lang. Eng emaw bul ṭan nan tih chu a ni lo.

Tihian ti teh ang, tuna CCM hi Mizoram kohhrante kan phâk tâwkah ngai ila. CCM hian a member kohhrante mahnia ro an inrelna leh an thurin leh tih dan phung (faith, practice and tradition)-ah te inrawlhna nei lovin, zalen takin, an awm dan pangngaiin an awm vek a ni. Kohhran ṭhenkhat leh kan hotu ṭhenkhat te beisei, kohhran pakhat (organic union) hi chu duhthusam, a tak ram thlen harsa tak tur a ni. Kan ram hruaitu ṭhenkhat duhthusam sang tak nei, a tak ram thlen pui theih loh tur ang chi hi a ni ber e.

A tawpna atana ka sawi duh chu, Council neia kan insuih khawmna hi ngaihlu ila, Council-ah kan insuih khawm ta bawk a, tualchhung leh inṭhenawm khawvenga kan khawsak honaah te pawh tun aia inpawhna ṭha zawkte pawh neih tum phah ila a ṭha ngawt ang. Kan hotute pawh tun aia nasa zawkin i ṭawngṭaipui ṭhin ang u.

- Rev. Lalbiaksanga Chinzah