Pa lungmawl dâwn tawi
Patling pakhat nupui nei thar hi a awm a. A nu leh farnute nen in tlawm pangngai takah an cheng a. A nupui neih hma chuan, "Zu ka nghei hmak ang, zuk leh hmuam pawh hi kei leh ka chhungkaw tan a ṭha lo va, ka nghei ang. Pawisa khelh pawh ka sim ang, mobile games khelh te hi ka sim vek ang," tiin biahthu di a hlan thlum viau a. Tin, in chhungkhurah ṭangkai zawkin, chhungte tan hnemhnang turin tha ka thawh ang a, nasa takin kan inchhungkhur ka chawikang bawk ang, tiin a nupui neih ngen khan a chhungte bulah a intiam leh bawk a. Nupui a han nei ta a, mi zawng zawngin an thlir rawn a.
Tih ve a tum loh leh sim a tum zawng zawng kha a hma aiin a uar zawk a; a nupui leh a chhungte pawh an mangang hial a.
Tin, amah lah chuan an in chhungkhur tlabalte chu a thuin a vei a. "Ka nu leh pate hian concrete in lo sa vek tawh se la, hetiang 'longchair' hlui lutukte aiah hian sofa-te lo hung dul se ṭha tur. Kan bual in te hi glazetile lo phah vek sela ṭha tur a nia. Kan sakawr aiah hian lirthei changkang te lo lei neih daih tawh tur a nia," a ti a. Ṭhenawm khawvengte’n zak lo an ti hle. A nupui leh chhungte’n an ning em em bawk.
Chu mai a ni lo, a thla tin sum lak luhna ber ṭhin dawr tê an siamah pawh a minus char char a, a minus loh theih loh chhan chu dawr thil an hralhna sum rawn lut kha hlêp emaw a ti zel a. A capital an hmu tawh em tih lam a chhut lo. Hlepah ngaiin a hmang nghal zel atin ni.
Tlai tin a la rui ziah a, a ruih nawi chang lahin a pa te, a pu te ho a dem em em reng a. "Ka pate khan sorkar hna lo thawk se la chuan kan rethei lo vang maw le," te a ti a. "Ka pu kha lal khawnbawl tal lo ni se, rosum tam deuhte min lo hnutchhiah se la ṭha tur! Ka pa reng reng pawh, kut hnathawktu ni lo khan sorkar hnathawk eiru pha chin tal lo ni se la, kan changkang daih tawh ang maw le!" te a ti a. Mi sawisel leh dem luih luih a hlawh a, zahna chang lah chu a hre der lo va, a la chapo hle zawk a ni.
He pa lungmawl dâwn tawi ang deuh hi a ni, kan enchhin ZPM sorkar kan hrawn kal mek dan hi.
- Makhuma, Khawzawl.