AR ram chhuahsanah mipui mamawh Gas Insulated Sub-Station

Ministry of Power thu angin Mizoram pawh electric pre-paid-ah kan luh dawn avâng te, electric smart meter leh online payment chungchangahte P&E department hotute nen kan inkâwm a. Kan inkawmna tawp lamah AR ram chhuahsana gas insulated sub-station (GIS) dah belh chungchang an sawi zauh a, ka beng a verh hle! A chhan pawh AR ram chhuahsana thil tam tak dah belh hi mi tam takin an duh lo nia a lan avâng leh kan environmentalist ten thing awm sa tihchereu hlauhna an neih avângte a ni ber a. P&E department hotute thil sawi hi ka ûm zui ta a; mipuiin ngaihdan zau an neih theih nan kei pawhin ka hriat thiam chiam bik loh tur technical tak tak ziak bik loin, hetiang hian han sawi zui ka châk deuh a ni.

GIS station hi eng nge tih hi zawhna pawimawh tak a ni. Power sub-station tih hian tun hmaa kan hriat ṭhin ban tam tak, kâk ṭiai ṭuai, hmun awh zau chi kha kan mitthla lo thei lo a, âwm tak a ni. Mahse, mithiamte’n an sawi dan chuan, GIS bun tur hian building pangngai tak pakhatah pawh a leng vek thei an ti! Sorkarin AR ram chhuahsan enkawl dan tur committee a dinin ruahmanna a siam mekte en hian, nakina a hlawhtlin huna kan la mamawh hmasa tur chu power supply ṭha a ni. Chatlak loa power supply ṭha nei tur chuan P&E department rawtna GIS station hi a pawimawh hmel hle. Sub-station hlauhawm lo, electric avânga chetsualna laka him si, hmun awh zim si, in chhawng khat lekah pawh leng, 33kV GIS leh covered conductor/ABC/ underground cable hmangin GIS din theih a ni. A hrui atan pawh mi man thei lo chi (insulated) hman tur a ni.

AR chhuahsan rama Langar (Lammual pavillion thlang, Tuithiang kawng chung)-ah hian distribution transformer 630kVA 11/0.415kV a awm sa reng a, hmun dang tibuai lovin helai hmun hi laih zauh belh hlekin power transformer 33/11kV dah theihna remchang a ni. Helai hmunah hian truck/trailer a thlen theih avangin transformer lian phurh luh leh chhuah a rem dawn a, electric lak luhna hruipui luh leh chhuahna awm sa a nih bawk avângin a remchang dawn hle. A bul maiah GIS awmna tur in lian vak lo sak belhin 33kV Sub-Station a siam theih mai dawn tihna a ni.

P&E engineer-te’n an sawifiah dan en teh ang: “AR Langar-a awm sa transformer hi veng tina transformer kan dah ang chi–11kV aṭanga mipui hman tur 230V (three phase a nih chuan 400V) a ni a, lo tihniam (step-down)-tu 11kV/0.4 transformer a ni. Power hi 11kV line-a pek luh a ni. Tuna AR-a dah kan duh hi chu transformer lian (power transformer) 33kV aṭanga 11 kV-a step down-tu tur a ni. Tichuan, veng hrang hrang chawmtu tur 11kV line a pe chhuak thung ang. 11kV line pakhat hian veng chhunga transformer dah ang chi veng eng emaw zah a chawm, tuna AR chawmtu 11 kV feeder hi Treasury feeder kan ti a, Bazar, Tuithiang, AR, Treasury, Assembly, etc. transfomer eng emaw zat a chawm a. 33kV Sub-Station hian 33kV aṭangin 11kV-ah a step down a, 11 kV feeder eng emaw zat a pe chhuak ve thung. AR ramah 33 KV Sub-station kan dah dawn chuan 33kV line-a kan chawm a ngai dawn a, tuna ruahman chhinnaah chuan Chite Sub-station leh Mualpui Sub-station (hmun hnih) aṭangin kan chawm ang,” tih a ni.

GIS station dah belh sawi a nih chhan hi, tuna Power House, Electric Venga mi 33kV Sub-Station hian min dâwl zawh tâk meuh loh vang a ni. AR leh a chhehvelah hian tun hma aṭangin voltage hniam avângin harsatna a awm ṭhin a, rooftop solar pawh dah a harsat phah! Tin, AR chhuahsan ram hmannaah load demand a awm belh phei chuan a chawmtu tuna Power House-a 33kV sub-station hian a zo dawn lo tihna a ni a, sub-station thar siam loh chuan inên chhawk hial a ngai tawh dawn tihna a ni.

AR ram chhuahsan enkawl dan tur Chief Minister Pu Lalduhoma hoa ngaihtuahtute hi kan ram aiawh atan an kim thawkhat hle a, ṭha fein ro an rel zel turah ngai ila. Tun hnaia ro an rel hnunghnung bera hmalakna tur en khan, power indaih lohna awm mek nen, power mamawhna a nasat belh dawn a, chu chu a hriat pawh an hre sa vekin a rinawm. Thlasikah phei chuan a overload ṭan tawh a, Aizawlah hmun âwl a vâng tawh a, tihlen belh ngaihna a awm tawh si lo. Nakinah chuan inên chhâwkte pawh a la ngai thei dawn ni tein an hria a a ni. P&E hotute’n a sat laia den ngei an duhna hi mipui hma an ngaihna vâng a ni ngei turah ngai ila, chu chu kan hotute pawhin an hai hauh loin a rinawm.

Mak deuh chu, tun hmain hmasawnna hna pawimawh thawhna ṭhenkhatah power supply-a kan dinhmun tur leh a kaihhnawih tur lam ngaihtuah telna hmasa awm mang loin thil kalpui a awm ṭhin a nih hmel a, a hnu fe-ah ngaihtuah tel chauh a nihin, duhthusamin a ṭha thei lo fo niin an sawi. Kalphung thar sorkar hnuaiah chuan, 'I zuan hmain en rawh,' tih kha changchawi ve ngawt phawt teh ang. Hetiang hi kan hmabaka thil awm a nih avângin, AR ram chhuahsan enkawl zui dan tur leh GIS inzawmna hi kan hotute leh mipui hian han hre thar tlang ila, a êng zawngin thlir phawt teh ang.

P&E department hotute hian online payment chungchang pawh an sawi uar hle a, hei hi mipui tan leh thawktute tana awlsamna thlenna tur a ni ber. July ni 29, 2025 khan Power House-ah ka lêng lut a, online payment-a kan dinhmun chu EE-te nen kan enho a. Distribution Division-ah consumer 53,000 vel an neih laiin, online-a bill pe hi chhungkaw 29,736 (56%) an awm. Revenue Division-ah consumer 63,772 an neih laiin, online-a bill pe chu chhungkaw 25,000 (40%) an ni. A chet reng avângin vel tiin sawi a ni. Smart phone, bank account te kan nei tawh a, online-a bill pe heti zat kan awm ta hi a lawmawm a, hma pawh kan sawn hle a. Chutih rualin, hei aia tam hi kan la ni thei a, eng emaw thila harsatna awm thei erawh thu hran ni se. AR ram chhuahsana GIS dah chungchang nen hengte hi mipui tana ngaihtuahna tizautuah a ṭan i beisei ang.

- Lalnunṭawma Fanai, ZRKS Rûn, Electric Veng