Assam Rifles ram chhuahsan leh environment

Aizawl mipuite’n kan engto em em, khawpui laili taka Assam Rifles awm tlat mai chu mumang ram mai ni lovin, an chhuah ni tak tak a lo thleng ta a, lawm avangin kut kan beng a. Chutih mek lain, an chhuah rual chiaha ngaihtuahna tibuai nghal chu engtin nge hman zui a nih dawn tih hi a ni. Veitu an tam, ngaihdan pawh a inchen lo hlawm fu. Keini pawl riangvai leh derdêp tak ASEP pawh hian kan vei ve nasa mai a, green area ni tawp mai se tih chu kan duh dan leh kan auhla chu a ni ve bar mai le! Vei ve ta ngang chuan an chhuah hmain Chief Minister-ah pawh kan duh dante chu kan lo va thlen ve thawt thawt nghe nghe a ni.

An chhuah tákah chuan kan sawrkar chuan Advisory Committee on AR Land a din a; sawrkar mi pawimawh bakah pawl lian leh zahawm tak tak te, political party tinte bakah keini ASEP pawh kan tel ve hlawl mai a. He Advisory Committee-a min telh hi sawrkar hian a ba lem lovin ka hria a, min telh ve duh hrim hrim hi sawrkar a inhawng hle tih a lang nghal a, an fakawm tih loh rual a ni lo. Advisory Committee meeting hmasa ber chu kan han ṭhu ta a, a ram hman dan tura rawtna a tam ta ngiang mai rêng a. Keini lamin green area ni vek tura kan duhna chuan hmachhawn tur a ngah nghal hle. Hemi thilah hian a bik takin Aizawl Hmathlir Pawl (AHP) leh Centre for Environment and Social Justice (CESJ) te nen kan ṭang nasa zual deuh.

Mi tam tak chuan Treasury Square aṭanga Bazar Bungkawn thleng hian kawngpui lianpui awm phei zui mai se tih chu an mitthla dan a ni a. Assembly House sawn luh nana hman duhna te, Aizawl khawpui enkawltu AMC pisapui suan luh nana hman duhna te, ropeway station din nan te, power sub-station bun nan te, mipui tam tak dâwl zo tur convention centre din nante leh, thil dang dang atan rawtna a awm ta nuk mai a. Ram hmasawnna leh changkan zelna atan a va pawimawh hlawm em ve le! Meeting hmasa berah hi chuan thu mûm lutuk kan nei thei vak lo va, sawi hawnna ang deuhin hun kan hmang a ni ber a; meeting leha thutlukna siam turin Chairman; Chief Minister chuan thu a khaikhawm ta a. Meeting leh hmasa bera ngaihdan fumfê tak lo nei turin min chah hlawm a ni.

Meeting vawi hnihna chu July ni 24, 2025-ah CM Conference Hall-ah neih leh a ni ta a. A buaipuitu sawrkar mi thiamte’n Master Plan an lo ruahman chu kan thlir a, sawiho zui a ni ta. Master Plan-ah hian a ram chu Zone 1 & 2-ah ṭhen phawk a ni a. Zone-1 hi development chi hrang hrang beng luhna tura ruahman deuh a ni a, Zone-2 hi green area tawp tura dah a ni thung. Green area hi 52% vel a ni a, buatsaihtute pawhin environment lam atan an ngaihtuahna an hmang hle tih a hriat a, a lawmawm viau mai. Chutih laiin, keini lam chuan eng developmet mah vawm luh loh kan duh avangin zone 1 lama mi nêk chhuah chu kan hna pui a ni ta.

Ropeway kan hnial thla a, chutiang zelin a dang dang pawh dah loh ni se tih chu a tlu chho ta zel a. “Hetianga hmasawnna tur zawng zawng duh loh zelte chu a dik bik nang maw le,” te pawh kan han inti bap bap a. Kei pawhin, “Advisory Committee hian environment humhalhna zawngin ṭha taka kan rel beiseiin, beiseina sang tak nen kan lo nghak a. Hmasawnna thilte hi ṭha hle mah se, kan environment hlutna man nena thleng nan chuan kan phal tawh lo. Kan beng lut lui dawn a nih chuan a key kan la sáng ang a, mipuiah kan zualko tawh mai ang a, chuta chinfel tur chuan kan ti mai ang chu,” te pawh ka’n ti ve hial a. Ṭan a na hle mai.

Tichuan, kan thutlukna pui berah chuan green park ni vek mai se tia kan duhna chu 70% velah chuan a kai chho ta hialin ka ring a. Hmasawnna tur thil zawng zawng han hnial fai vek erawh chu keini tan pawh a inthlahrunawm ve tho bawk a. Aizawl Civil Hospital sak belhna tur sum hmin tawhsa chu a bula Aizawl Police Station hmunah sak zawm ni se, Aizawl PS hi AR ramah hian sawn luh ni thung se tih erawh chu pawm loh hleih theih bik a ni ta lo va. Aizawl Police Station awm hi a ram vengtu atan pawh a ṭhat beiseina kan nei ta deuh. Aizawl khawpuia chengte’n rilru tihzângkhai nan leh thawk lak nan kan hmang thei dawn ta hi a lawmawm tak zet a, hun lo kal zelah pawh kan inchhir loh ka ring.

Aizawl mipuite pawhin kan hriat fo atana pawimawh chu, Aizawl hi thawk lakna tur eih pawh awm mang tawh lovin concrete jungle-in a khat zo ta a ni ber a. Kan ṭhalaite pawhin hawi thawvenna leh len khawthawnna tur hmun takngial pawh an nei lo hi an lainatawm lutuk a ni. Assam Rifles an chhuah azarah hmasawnna thil dang bun belh lova green park nuam taka ruahman hi kan chance ṭha neih chhun leh awm chhun a ni tawh a. Hmasawnna thilte hi a ṭha lo tihna ni lovin, ipik leh chep taka inhnawhkhawm ringawt hi chu a finthlak ber tawh lo va. Environment ṭha leh Aizawl nuam siam leh tura ngaihtuahna kan hman a ngai a. Development aia environment kan thlan ngam hi a ṭul ta a ni.

Ka sawi duh ták em em chu, sawrkar inphahhnuai thei tak leh mipui aw ngaichang thiam tak kan nei hi a lawmawm ka ti a. Kan chairman Chief Minister Pu Duhoma pawh a fakawm khawpin ka hria. Kan ram rorelna inpui luahlum tura mipuite’n kan thlan chhuah roreltute rilru hi ‘green’ fo teh se.

- K. Lalmuansanga Zotei Pa, ASEP